ഇന്ത്യന്‍ ടീമിന്റെ പ്രധാന പരിശീലകനായുള്ള രവി ശാസ്ത്രിയുടെ നിയമനത്തിന് അംഗീകാരം. എന്നാല്‍, മുന്‍ താരങ്ങളായ രാഹുല്‍ ദ്രാവിഡിനേയും സഹീര്‍ ഖാനേയും ഇന്ത്യന്‍ ക്രിക്കറ്റ് ടീമിന്റെ കണ്‍സല്‍ട്ടന്റുകളാക്കാനുള്ള തീരുമാനത്തില്‍ വ്യക്തമായ നിലപാട് അറിയിച്ചില്ല. സപ്പോര്‍ട്ടിങ് സ്റ്റാഫുകളെ നിയശ്ചയിക്കുന്നത് രവി ശാസ്ത്രിയുമായി ചര്‍ച്ച നടത്തിയശേഷം മതിയെന്നാണ് തീരുമാനമെന്ന് സമിതി അധ്യക്ഷന്‍ വിനോദ് റായി അറിയിച്ചു. രവി ശാസ്ത്രിയ്ക്ക് ജൂലൈ 22 മുതലാണ് നിയമനം.

പുതിയ പരിശീലകന്റെ വേതനം, സപ്പോര്‍ട്ടിങ് സ്റ്റാഫുകളുടെ നിയമനം എന്നിവ തീരുമാനിക്കുന്നതിനായി നാലംഗ സമിതിയേയും നിയോഗിച്ചിട്ടുണ്ട്. സുപ്രീംകോടതി നിയോഗിച്ച അഡ്മിനിസ്‌ട്രേറ്റര്‍മാരുടെ യോഗത്തിലാണ് തീരുമാനങ്ങള്‍. എഡുലുജി, ബിസിസിഐ ആക്ടിങ് സെക്രട്ടറി അമിതാബ് ചൗധരി എന്നിവര്‍ അംഗങ്ങളായ കമ്മിറ്റി ജൂലൈ 19ന് വീണ്ടും യോഗം ചേരും. ഈ കമ്മിറ്റിയുടെ ശുപാര്‍ശകള്‍ ജൂലൈ 22ന് ഭരണസമിതിക്ക് സമര്‍പ്പിക്കും.

രവി ശാസ്ത്രിയെ പരിശീലകനായി നിയമിക്കുന്നതിന് ക്രിക്കറ്റ് ഉപദേശക സമിതി സമര്‍പ്പിച്ച മുഴുവന്‍ ശുപാര്‍ശകളും സ്വീകരിച്ചതായി ഭരണസമിതി വ്യക്തമാക്കി. മറ്റ് പരിശീലകരെ സംബന്ധിച്ച് ശാസ്ത്രിയുമായി കൂടിയാലോചിച്ച് തീരുമാനിക്കും. പരിശീലക ടീമിന്റെ നിര്‍ണായകമായ മൂന്ന് നിയമനങ്ങള്‍ തീരുമാനിച്ചിട്ടുണ്ട്. എന്നാല്‍, മുഖ്യപരിശീലകനുമായി കൂടിയാലോചിച്ച ശേഷമേ ഇക്കാര്യത്തില്‍ അന്തിമ തീരുമാനം എടുക്കൂവെന്നും ഭരണസമിതി വ്യക്തമാക്കി.