ശ്രീലങ്കയ്ക്കെതിരായ ടെസ്റ്റ് പരമ്പര ഇന്ത്യയ്ക്ക്
ശ്രീലങ്കയ്ക്കെതിരായ രണ്ടാം ക്രിക്കറ്റ് ടെസ്റ്റില് ഇന്ത്യയ്ക്ക് വിജയം. ഇന്നിംഗ്സിനും 53 റണ്സിനുമാണ് ഇന്ത്യ ശ്രീലങ്കയെ പരാജയപ്പെടുത്തിയത്. ഇതോടെ മൂന്ന് മത്സരങ്ങളുള്ള പരമ്പര ഇന്ത്യ സ്വന്തമാക്കി. മൂന്നാമത്തെയും അവസാനത്തെയും ടെസ്റ്റ് ആഗസ്റ്റ് 12 ന് നടക്കും. ബൗളിംഗിലും ബാറ്റിംഗിലും ഒരുപോലെ തിളങ്ങിയ ഇന്ത്യ കളിയിലുടനീളം ആധിപത്യം പുലര്ത്തി. രണ്ടാമിന്നിംഗ്സില് അഞ്ച് വിക്കറ്റ് വീഴ്ത്തിയ രവീന്ദ്ര ജഡേജയാണ് ശ്രീലങ്കയെ തകര്ത്തത്. ശ്രീലങ്ക രണ്ടാമിന്നിംഗ്സില് 386 റണ്സിന് എല്ലാവരും പുറത്തായി.
ഒന്നാമിന്നിംഗ്സില് ചേതേശ്വര് പൂജാരയുടെയും (133), അജിങ്ക്യ രഹാനെയുടെയും (132) സെഞ്ച്വറികളും ഓപ്പണര് ലോകേഷ് രാഹുല് (57), ആര്.അശ്വിന് (54), വൃദ്ധിമാന് സാഹ (67), രവീന്ദ്ര ജഡേജ (പുറത്താകാതെ 70) എന്നിവരുടെ അര്ദ്ധസെഞ്ച്വറികളുമടക്കം 622 എന്ന കൂറ്റന് സകോറാണ് ഇന്ത്യ ശ്രീലങ്കയ്ക്ക് മുന്നില് വച്ചത്. എന്നാല് ബാറ്റിംഗില് തകര്ന്ന ലങ്ക 183 റണ്സെടുക്കുന്നതിനിടെ എല്ലാവരും പുറത്താകുകയായിരുന്നു. ഫോളോ ഓണ് വഴങ്ങി രണ്ടാമിന്നിംഗ്സിനിറങ്ങിയ ശ്രീലങ്ക ആദ്യ ഇന്നിംഗ്സിലെ പാഠം ഉള്ക്കൊണ്ടാണ് ബാറ്റിംഗ് ആരംഭിച്ചത്. രണ്ടാമിന്നിംഗ്സില് ലങ്കയ്ക്കായി കുശാല് മെന്ഡിസും(110) കരുണരത്നെ(144)യും സെഞ്ച്വറി നേടി.
മൂന്നാം ദിനം കളി നിര്ത്തുമ്പോള് രണ്ടിന് 209 എന്ന ഭേദപ്പെട്ട സ്കോറിലെത്തിയിരുന്ന ലങ്കയ്ക്ക് നാലാം ദിനത്തില് ആ ഫോമം നിലനിര്ത്താനായില്ല. നാലാം ദിനത്തിന്റെ തുടക്കത്തില് പുഷ്പ കുമാര(16)യെയും ക്യാപ്റ്റന് ചാന്ദിമാല്(2)നെയും ആദ്യം തന്നെ നഷ്ടമായെങ്കിലും പിന്നീട് വന്ന ആഞ്ജലോ മാത്യൂസും സെഞ്ച്വറി നേടിയ കരുണരത്നെയെും ടീമിനെ 300 കടത്തി. കരുണരത്നയെ ജഡേജ പുറത്താക്കിയതോടെ ശ്രീലങ്കയുടെ പതനവും ആരംഭിച്ചിരുന്നു. അഞ്ച് റണ്സ് കൂടി ചേര്ക്കുന്നതിനിടെ മാത്യൂസ്(36) പുറത്തായി. പിന്നീട് വന്ന പെരേരയ്ക്കും ധനഞ്ജയ ഡിസില്വയ്ക്കും ഇന്ത്യന് ബൗളിംഗിനു മുന്നില് പിടിച്ചു നില്ക്കാനായില്ല. ചെറിയ രീതിയില് പൊരുതിയ നിരഞ്ജന് ഡിക്വാലെ (31)യെ ഹര്ദിക് പാണ്ഡ്യയും ഫെര്ണാണ്ടസിനെ അശ്വിനും പുറത്താക്കിയതോടെ ഇന്ത്യ വിജയം ഉറപ്പിച്ചു
.
ഇന്ന് പുറത്തായ ഏഴ് ലങ്കന് ബാറ്റ്സ്മാന്മാരില് അഞ്ചു പേരുടെയും വിക്കറ്റ് ജഡേജയ്ക്കാണ്. ഇന്ത്യയ്ക്കായി പാണ്ഡ്യയും അശ്വിനും രണ്ടും ഉമേഷ് യാദവും ഓരോ വിക്കറ്റും വീഴ്ത്തി.
https://www.facebook.com/Malayalivartha