ഒറ്റപ്പന്തില്‍ ഒറ്ററണ്ണിന് റിക്കാര്‍ഡിട്ട് എം.എസ് ധോണി. ഏകദിന ക്രിക്കറ്റില്‍ ഏറ്റവും കൂടുതല്‍ മല്‍സരങ്ങളില്‍ പുറത്താകാതെനിന്ന താരമെന്ന റിക്കാര്‍ഡാണ് ധോണി ചുളുവില്‍ അടിച്ചുമാറ്റിയത്. ശ്രീലങ്ക ഉയര്‍ത്തിയ 239 റണ്‍സ് വിജയലക്ഷ്യത്തിന് രണ്ട് റണ്‍സ് മാത്രം അകലെയെത്തിയപ്പോള്‍ കേദാര്‍ യാദവ് പുറത്തായതാണ് ധോണിക്ക് ഈ പരമ്പരയില്‍തന്നെ റിക്കാര്‍ഡ് മറികടക്കാന്‍ വഴിയൊരുക്കിയത്.

301 ഏകദിനം കളിച്ച ധോണി 73 തവണയാണ് പുറത്താകാതെ നിന്നത്. ലങ്കയുടെ ചാമിന്ദവാസ്, ദക്ഷിണാഫ്രിക്കയുടെ ഷോണ്‍ പൊള്ളോക്ക് എന്നിവരെ പിന്തള്ളിയാണ് ധോണി റിക്കാര്‍ഡ് സ്വന്തമാക്കിയത്.

നാലാം ഏകദിനത്തില്‍ 49 റണ്‍സുമായി പുറത്താകാതെനിന്ന് വിജയത്തിനു ചുക്കാന്‍പിടിച്ച ധോണി റിക്കാര്‍ഡിനൊപ്പമെത്തിയിരുന്നു. അവസാന ഏകദിനത്തില്‍ കോഹ്‌ലിയും യാദവും പാണ്ഡ്യയും തകര്‍ത്ത് മുന്നേറിയപ്പോള്‍ ധോണിയുടെ റിക്കാര്‍ഡ് നേട്ടത്തിനു ഇനിയും കാത്തിരിക്കണമെന്ന് ഉറപ്പിച്ചതായിരുന്നു. എന്നാല്‍ ഭാഗ്യം കേദാറിന്റെ രൂപത്തില്‍ ധോണിയെ തേടിയെത്തി.

ഈ മത്സരത്തില്‍തന്നെ സ്റ്റമ്പിംഗില്‍ സെഞ്ചുറി തികച്ച് മറ്റൊരു റിക്കാര്‍ഡുകൂടി ധോണി പഴങ്കഥയാക്കിയിരുന്നു. ഏകദിനത്തില്‍ സ്റ്റമ്പിംഗിലൂടെ 100 പേരെ പുറത്താക്കിയ ആദ്യത്തെ വിക്കറ്റ് കീപ്പറെന്ന റിക്കാര്‍ഡാണ് ധോണി പോക്കറ്റിലാക്കിയത്. യുസ്‌വേന്ദ്ര ചാഹലിന്റെ പന്തില്‍ ധനുഷ്‌ക ഗുണതിലകയായിരുന്നു എംഎസ്ഡിയുടെ നൂറാമത്തെ ഇര.

രണ്ടാം ഏകദിനത്തില്‍ ധോണി ലങ്കയുടെ സംഗയുടെ റിക്കാര്‍ഡിനൊപ്പമെത്തിയിരുന്നു. കുമാര്‍ സംഗക്കാര 404 മത്സരങ്ങളില്‍ നിന്നാണ് 99 സ്റ്റമ്പിംഗ് നടത്തിയതെങ്കില്‍ ധോണി വെറും 301 മത്സരങ്ങളില്‍നിന്നാണ് സെഞ്ചുറി തികച്ചത്.