യൂറോപ്യന്‍ ഫുട്‌ബോള്‍ ചാംപ്യന്‍ഷിപ്പായ യുവേഫ നേഷന്‍സ് ലീഗ് കടുപ്പമേറിയ മല്‍സരത്തിലേക്കു കടക്കുന്നു. ലീഗ് ഘട്ടത്തിലെ അഞ്ചാം മല്‍സരദിനത്തില്‍ ഇന്നു മുതല്‍ ചൊവ്വാഴ്ച വരെ വമ്പന്‍ കളികള്‍. ലോക ചാംപ്യന്‍മാരായ ഫ്രാന്‍സ്, മൂന്നാം സ്ഥാനക്കാരായ ബല്‍ജിയം, ലോകകപ്പില്‍ ഇടം കിട്ടാതെ പോയ ഹോളണ്ട് തുടങ്ങിയവര്‍ക്കെല്ലാം മല്‍സരങ്ങളുണ്ട്. അടുത്ത വര്‍ഷം ജൂണില്‍ നടക്കുന്ന ഫൈനല്‍സ് മല്‍സരങ്ങള്‍ക്ക് യോഗ്യത നേടാന്‍ ഇതു കൂടാതെ ഇനിയൊരു റൗണ്ട് മാത്രമേ ശേഷിക്കുന്നുള്ളൂ. ജൂണ്‍ 19-നാണ് ഫൈനല്‍.

വെറുതെ എന്തിനു സൗഹൃദ മല്‍സരം കളിച്ചു സമയം കളയണം എന്ന ചിന്തയില്‍ നിന്നാണു യൂറോപ്യന്‍ ഫുട്‌ബോള്‍ ഭരണകൂടമായ യുവേഫ, നേഷന്‍സ് ലീഗ് ഫുട്‌ബോള്‍ തുടങ്ങിയത്.എ,ബി,സി,ഡി എന്നിങ്ങനെ നാലു ലീഗുകളിലായി നടക്കുന്ന ചാംപ്യന്‍ഷിപ്പില്‍ യൂറോപ്പിലെ 55 ദേശീയ ടീമുകളാണ് കളത്തില്‍.

ഫിഫയുടെ മികച്ച താരത്തിനുള്ള പുരസ്‌കാരം നേടിയ ലൂക്കാ മോഡ്രിച്ച് ഇടവേളയ്ക്കു ശേഷം സാഗ്രെബില്‍ സ്വന്തം കാണികള്‍ക്കു മുന്നില്‍ കളിക്കാനിറങ്ങുന്നു.ലോകകപ്പ് ഫൈനലിസ്റ്റുകളായ ക്രൊയേഷ്യയുടെ എതിരാളികള്‍ സ്‌പെയിന്‍.ഇംഗ്ലണ്ടിനെതിരെ ഗോള്‍ രഹിത സമനില വഴങ്ങിയ ക്രൊയേഷ്യയ്ക്കു വിജയിക്കണം.

ഞായറാഴ്ച ലൗസെയ്‌നില്‍ സ്വിറ്റ്‌സര്‍ലന്‍ഡിനെ നേരിടുന്ന ലോകകപ്പ് മൂന്നാം സ്ഥാനക്കാരായ ഏദന്‍ ഹസാഡിന്റെ ബെല്‍ജിയത്തിന് ജയിച്ചില്ലെങ്കിലും മുന്നോട്ടു പോകാം. ഇന്ന് ഐസ്‌ലന്‍ഡിനെ നേരിടുന്ന ബല്‍ജിയത്തിന് വിജയിച്ചാല്‍ ധാരാളം.

ഫ്രാന്‍സിനെ ഫൈനല്‍ റൗണ്ടിലേക്ക് നയിക്കാന്‍ കഴിവുള്ള താരമാണ് കൗമാരക്കരുത്തുള്ള കിലിയന്‍ എംബപെ. റോട്ടര്‍ഡാമില്‍ പുതിയ ശക്തിയായി മാറിയ ഹോളണ്ടിനെതിരെ നാളത്തെ കളിയില്‍ ഒരു സമനില നേടിയാലും ഫ്രാന്‍സിനു മുന്നേറ്റം. സെപ്റ്റംബറില്‍ ഇരു രാജ്യങ്ങളും തമ്മില്‍ കളിച്ചപ്പോള്‍ ഫ്രാന്‍സ് 2-1 നാണ് ജയിച്ചത്.