അഷ്‌റഫിനിത് ഒരു ഒന്നൊന്നര ഫാന്‍ മൊമന്റ്! ഓസിലിനെ കണ്ടു, കെട്ടിപ്പിടിച്ചു!
ജര്‍മന്‍ ഫുട്‌ബോളര്‍ മെസൂട്ട് ഓസിലിനോടുള്ള കടുത്ത ആരാധനയുടെ പേരില്‍ നാട്ടില്‍ പ്രസിദ്ധനാണ് വൈലത്തൂരുകാരന്‍ മുഹമ്മദ് അഷ്‌റഫ്. ഈ 'ആരാധനാപ്രാന്ത്'മൂലം നാട്ടില്‍ മാക് ഓസില്‍ എന്നാണ് അറിയപ്പെടുന്നത് പോലും!
അങ്ങനെയുള്ള മുഹമ്മദ് അഷ്‌റഫിന്റെ മുന്നില്‍ മെസൂട്ട് ഓസില്‍ പ്രത്യക്ഷപ്പെട്ടാലോ? മുഹമ്മദ് അഷ്‌റഫ് ഓസിലിനോട് ഏറെനേരം സംസാരിച്ചു, കെട്ടിപ്പിടിച്ചു, ഫോട്ടോയെടുത്തു. ഓസിലിനെക്കൊണ്ട് മലയാളത്തില്‍ സുഖമാണോ എന്നുവരെ ചോദിപ്പിച്ചു. തിങ്കളാഴ്ച ദുബായില്‍വച്ചായിരുന്നു വൈലത്തൂരിന്റെ ഓസിലും ജര്‍മനിയുടെ ശരിക്കുള്ള ഓസിലും തമ്മിലുള്ള കൂടിക്കാഴ്ച.
ദുബായില്‍ സൗഹൃദ മത്സരത്തിന് ആര്‍സനല്‍ ടീമിനൊപ്പം എത്തിയതായിരുന്നു മെസൂട്ട് ഓസില്‍. സുഹൃത്തും കാസര്‍കോട് ചെറുവത്തൂര്‍ സ്വദേശിയുമായ മന്‍സൂര്‍ മുഹമ്മദലിക്കൊപ്പം ടീം താമസിക്കുന്ന ഹോട്ടലിലെത്തിയാണ് അഷ്‌റഫ് ഓസിലിനെ കണ്ടത്. സ്‌നേഹത്തിനും പിന്തുണയ്ക്കും നന്ദിപറഞ്ഞ ഓസില്‍ ഇരുവരുടെയും വിശേഷങ്ങള്‍ ചോദിച്ചറിഞ്ഞു.
മകന് ഓസില്‍ എന്നു പേരിട്ട വിവരം മന്‍സൂര്‍ അറിയിച്ചതോടെ അദ്ഭുതമായി. അഷ്‌റഫിന്റെ ഓസില്‍ ആരാധനയുടെ കഥകള്‍ കേട്ട് അമ്പരന്നു. കയ്യൊപ്പിട്ട ജഴ്‌സികള്‍ സമ്മാനിച്ചാണ് താരം ഇരുവരെയും യാത്രയാക്കിയത്.അഷ്‌റഫിനും മന്‍സൂറിനുമൊപ്പം നിന്ന് ആരാധകരോട് 'സുഖമാണോ' എന്നു ചോദിക്കുന്ന ഓസിലിന്റെ വിഡിയോ സമൂഹമാധ്യമങ്ങളില്‍ വൈറലാണിപ്പോള്‍.
ഫുജൈറയിലെ കണ്‍സ്ട്രക്ഷന്‍ കമ്പനിയില്‍ ജോലി ചെയ്യുന്ന അഷ്‌റഫ് ഓസിലിനെ കാണുന്നതിനായി 3 ദിവസമാണ് ജോലിയില്‍നിന്ന് അവധിയെടുത്ത് കാത്തിരുന്നത്. മെസൂട്ട് ഓസിലിന്റെ സുഹൃത്തും ജര്‍മന്‍ സ്വദേശിയുമായ റംസാനുമായുള്ള ഇന്‍സ്റ്റഗ്രാം സൗഹൃദമാണ് പ്രിയതാരത്തെ നേരില്‍ക്കാണാന്‍ അഷ്‌റഫിന് അവസരമൊരുക്കിയത്.
ടീം മാനേജര്‍ അറിയിച്ചതനുസരിച്ച് ഓസിലിനെ കാണാന്‍ ശനിയാഴ്ച ഉച്ചയ്ക്കുതന്നെ അഷ്‌റഫ് ടീം ഹോട്ടലിലെത്തിയിരുന്നു. പാതിരാത്രി വരെ കാത്തിരുന്നെങ്കിലും കാണാനായില്ല. തുടര്‍ന്നാണു തിങ്കളാഴ്ച വീണ്ടും ശ്രമം നടത്തിയത്.
ചൊവ്വാഴ്ച അല്‍ മക്തോം സ്റ്റേഡിയത്തിലുമെത്തിയ അഷ്‌റഫിന് മെസൂട്ട് ഓസിലിന്റെ കളി ആദ്യമായി നേരില്‍ക്കാണാനുമായി.
സ്വപ്നതുല്യമായ കൂടിക്കാഴ്ചയ്ക്കുശേഷം അഷ്‌റഫ് ഫെയ്‌സ്ബുക്കില്‍ കുറിച്ചതിങ്ങനെ:'എന്റെ ജീവിതത്തിലെ ഏറ്റവും വലിയ ആഗ്രഹം സാധിച്ചു. ഇത്രയും കാലം കൊണ്ടു നടന്ന ആ സ്‌നേഹം ഒരു കെട്ടിപ്പിടിത്തത്തിലൂടെ ഞാന്‍ കൈമാറി'.
ജര്‍മനിയോടും ഓസിലിനോടുമുള്ള ആരാധനമൂത്ത് മുന്‍പ് വിവാഹ മണിയറ ജര്‍മന്‍ പതാകയുടെ നിറത്തില്‍ അലങ്കരിച്ച ആളാണ് അഷ്‌റഫ്. 'ഓസിലും പിള്ളേരും' എന്ന വൈലത്തൂരിലെ ആരാധനക്കൂട്ടായ്മയിലും അംഗമാണ് മുഹമ്മദ് അഷ്‌റഫ് അഥവാ മാക് ഓസില്‍.
https://www.facebook.com/Malayalivartha
