സെക്സ് ടേപ്പ് ബ്ലാക്ക്മെയില്‍ കേസ്; ഫ്രഞ്ച് താരം കരീം ബെന്‍സേമ കുറ്റക്കാരനെന്ന് കോടതി
ഫ്രഞ്ച് ഫുട്ബാളില്‍ കോളിളക്കം സൃഷ്ടിച്ച സെക്സ് ടേപ്പ് ബ്ലാക്ക്മെയില്‍ കേസില്‍ റയല്‍ മാഡ്രിഡിന്‍റെ ഫ്രഞ്ച് താരം കരീം ബെന്‍സേമ കുറ്റക്കാരനെന്ന് കോടതി. ഒരു വര്‍ഷത്തെ സസ്പെന്‍ഡഡ് തടവും 75,000 യൂറോ പിഴയുമാണ് ജഡ്ജ് വിധിച്ചത്.
ദേശീയ ടീമിലെ സഹതാരം മാത്യു വാല്‍ബുവേനയെ ബ്ലാക്ക്മെയില്‍ ചെയ്യാന്‍ പുറത്തുവിട്ട സെക്സ് ടേപ്പിനു പിന്നില്‍ ബെന്‍സേമക്കും പങ്കുണ്ടെന്നായിരുന്നു ആരോപണം. 2015ല്‍ ഫ്രഞ്ച് ദേശീയ ടീമിന്‍റെ പരിശീലന ക്യാമ്ബിനിടെയാണ് കേസിനാസ്പദമാ‍യ സംഭവം. വിവാദം ഫ്രഞ്ച് ഫുട്ബാളിനെ പിടിച്ചുകുലുക്കി. പിന്നാലെ ഇരുവരെയും ദേശീയ ടീമില്‍നിന്ന് പുറത്താക്കി.
ക്യാമ്ബില്‍വെച്ച്‌ വാല്‍ബുവേനയുമായി ബന്ധപ്പെട്ട അശ്ലീല വീഡിയോ പുറത്തുവിടുമെന്ന് ചിലര്‍ താരത്തെ ഭീഷണിപ്പെടുത്തുകയും ഇവര്‍ക്ക് പണം നല്‍കാന്‍ ബെന്‍സേമ നിര്‍ബന്ധിച്ചെന്നുമാണ് കേസ്. ബ്ലാക്ക്മെയില്‍ ചെയ്ത് പണം തട്ടാനുള്ള പദ്ധതിയില്‍ ബെന്‍സേമക്കും പങ്കുണ്ടെന്നായിരുന്നു ആരോപണം.
കുറ്റകൃത്യത്തില്‍ ബെന്‍സേമക്ക് വ്യക്തിപരാമായി പങ്കുള്ളതായി കോടതി പറഞ്ഞു. ബെന്‍സേമക്കൊപ്പം കുറ്റക്കാരനെന്ന് കണ്ടെത്തിയ നാലുപേരെയും കോടതി ശിക്ഷിച്ചു. സസ്പെന്‍ഡഡ് തടവുശിക്ഷ ആയതിനാല്‍ ബെന്‍സേമ ജയിലില്‍ കിടക്കേണ്ട.
തനിക്ക് കുറ്റകൃത്യത്തില്‍ പങ്കില്ലെന്നും പ്രശ്നം പരിഹരിക്കാന്‍ വാല്‍ബുവേനയെ സഹായിക്കുക മാത്രമാണ് ചെയ്തതെന്നുമാണ് തുടക്കംമുതലേ ബെന്‍സേമയുടെ നിലപാട്. വിവാദത്തിനു പിന്നാലെ ടീമില്‍നിന്ന് പുറത്തുപോയ ബെന്‍സേമ, ആറുവര്‍ഷത്തിനുശേഷം അടുത്തിടെയാണ് ദേശീയ ടീമില്‍ തിരിച്ചെത്തിയത്. കോടതി വിധിക്കെതിരെ അപ്പീല്‍ നല്‍കുമെന്ന് ബെന്‍സേമയുടെ അഭിഭാഷകന്‍ അറിയിച്ചു.
https://www.facebook.com/Malayalivartha
