സര്വസന്നാഹങ്ങളുമായി ഇറങ്ങുന്ന കൊളംബിയയോട് ഇന്ത്യ ഇന്ന് മത്സരിക്കും
ആതിഥേയരായ ഇന്ത്യ ഇന്ന് ലോകകപ്പിലെ രണ്ടാം മത്സരത്തിന് ഇറങ്ങും. തെക്കെ അമേരിക്കയിലെ കരുത്തരായ കൊളംബിയയാണ് എതിരാളികള്. ആദ്യ മത്സരങ്ങളില് തോല്വി വഴങ്ങിയവരാണ് ഇരു ടീമുകളും.
ആദ്യ മത്സരത്തിലെ എതിരാളികളായ അമേരിക്കയേക്കാള് കളിയറിയുന്നവരാണ് കൊളംബിയ. അതിശക്തരായ ഘാനയോട് ഒരു ഗോളിനു മാത്രമാണ് കൊളംബിയ കീഴടങ്ങിയത്. അടുത്ത റൗണ്ടിലേക്ക് പ്രവേശം സാധ്യമാകണമെങ്കില് ഇന്ത്യക്കെതിരെ ജയം ആവശ്യമാണ്. അതുകൊണ്ട് സര്വസന്നാഹങ്ങളുമായി ഇറങ്ങുന്ന കൊളംബിയക്കു മുന്നിലേക്കാണ് ഇന്ത്യ എത്തുന്നത്.
അമേരിക്കയ്ക്കെതിരെ ഇന്ത്യയുടെ കൗമാരപ്പട ഹൃദയം കൊണ്ട് പന്തു തട്ടിയെങ്കിലും കളിമികവിലും തന്ത്രങ്ങളിലും ശാരീരികശേഷിയിലും ഏറെ പിന്നിലായിരുന്നു. തിങ്കളാഴ്ച ഡല്ഹിയിലെ ജവഹര്ലാല് നെഹ്റു സ്റ്റേഡിയത്തില് കാത്തിരിക്കുന്ന സാഹചര്യവും മറ്റൊന്നല്ല. പന്ത് പിടിച്ചുകളിക്കുന്നതില് മിടുക്കരാണ് കൊളംബിയ. ഘാനയ്ക്കെതിരെ പന്ത് കൈവശം വയ്ക്കുന്നതില് മുന്നില് (56 ശതമാനം) നിന്നത് ആ മികവിന് തെളിവാണ്. ഫിഫറാങ്കിങ്ങിലെ 10ാം സ്ഥാനക്കാരുടെ അനുജന്മാര് പാസിങ്ങിലും പന്തിന്റെ നിയന്ത്രണത്തിലും ഒന്നാംകിടക്കാരാണ്.
അമേരിക്കയ്ക്കെതിരെ ഫസ്റ്റ് ടച്ച്, പാസിങ്ങിലെ കൃത്യത, പൊസിഷന് തിരിച്ചറിഞ്ഞ് കളിക്കുക എന്നീ അടിസ്ഥാനഘടകങ്ങളില്ഇന്ത്യ തീര്ത്തും പിന്നിലായി. പാതിയില് നിലച്ച പാസുകള് മുന്നേറ്റക്കാരിലേക്ക് എത്തിയില്ല. ഇതൊന്നും പെട്ടെന്ന് പരിഹരിക്കാവുന്ന കുറവുകളല്ല. അതുകൊണ്ടുതന്നെ രണ്ടാം മത്സരത്തിലും കളിയുടെ നിയന്ത്രണം ഏറ്റെടുക്കുകയെന്നത് ഇന്ത്യക്ക് അസാധ്യമാകും. ശാരീരികശേഷിയിലെ അന്തരം ഇക്കാര്യത്തില് നിര്ണായകമാണ്. മാര്ക്ക് ചെയ്യുന്ന കൊളംബിയ പ്രതിരോധക്കാരെ കടന്നുപോകാന് കോമള് തട്ടാലും സഞ്ജീവ് സ്റ്റാലിനും സുരേഷ് വാങ്ജമും പാടുപെടും. പ്രതിരോധത്തില് ആളെ കൂട്ടി, കൊളംബിയയുടെ ആക്രമണത്തെ കഴിയുന്നത്ര ചെറുക്കുക മാത്രമാണ് മുന്നിലുള്ള ഏകമാര്ഗം. മധ്യനിരയും ഏറെ മെച്ചപ്പെടേണ്ടതുണ്ട്. പ്രതിരോധത്തില് ഫലപ്രദമായി ഇടപെടാനും പ്രത്യാക്രമണങ്ങള്ക്ക് സഹായം നല്കാനും നായകന് അമര്ജിത്തിനും കൂട്ടര്ക്കുമാകണം.
ഘാനയെ വലിയൊരളവില് പിടിച്ചുകെട്ടിയ കൊളംബിയന് പ്രതിരോധം ഭദ്രമാണ്. ഇടതുവിങ്ങില് കളിക്കുന്ന ലിയാന്ഡ്രോ കാംപസ് ആകും മുന്നേറ്റക്കാരില് ഇന്ത്യയ്ക്ക് ഏറ്റവും വലിയ ഭീഷണി. ഘാനയ്ക്കെതിരെ കൊളംബിയയുടെ ആക്രമണങ്ങളെല്ലാം കാംപസിനെ കേന്ദ്രീകരിച്ചായിരുന്നു. മുന്നേറ്റത്തില് ഡെയ്മന് കോട്സ്, ബ്രയാന് ഗോമസ് എന്നിവരും ഗോളടിക്കാന് നല്ല വിരുതുള്ളവര്. മധ്യനിരയില് ആന്ദ്രെ പെരേര ഫോമിലാണ്. അമേരിക്കയ്ക്കെതിരെ മൂന്നു ഗോള് വഴങ്ങിയെങ്കിലും മികച്ച പ്രകടനം കാഴ്ചവച്ച ഇന്ത്യയുടെ കാവല്ഭടന് ധീരജ് സിങ്ങിന് ഇന്നും പിടിപ്പതു പണിയാകും.
തെക്കെ അമേരിക്കന് അണ്ടര് 17 ചാമ്പ്യന്ഷിപ്പില് ഉറുഗ്വെ, പരാഗ്വെ, ഇക്വഡോര് എന്നിവരെ തോല്പ്പിച്ചാണ് കൊളംബിയ വരുന്നത്. മത്സരപരിചയത്തില് ഇന്ത്യ ഏറെ പിന്നിലാണ്. വളരെ നേരത്തെ ഇന്ത്യയിലെത്തിയ കൊളംബിയ കാലാവസ്ഥയുമായി ഏറെക്കുറെ പൊരുത്തപ്പെട്ടു.
https://www.facebook.com/Malayalivartha
