ഫുട്ബോള്‍ ഇതിഹാസം ഡീഗോ മറഡോണ മൂന്ന് കുട്ടികളുടെ കൂടി പിതൃത്വം ഏറ്റെടുത്തു. മറഡോണയുടെ അഭിഭാഷകനാണ് ക്യൂബന്‍ കുട്ടികളുടെ പിതൃത്വം ഏറ്റെടുത്തതായി അറിയിച്ചത്. പിതൃത്വ പരിശോധനകള്‍ക്കും മക്കളെ ഔദ്യോഗികമായി ഏറ്റെടുക്കാനും ഈ വര്‍ഷം അവസാനം മറഡോണ ഹവാനയിലേക്ക് പോകും. മുന്‍ ഭാര്യയിലുണ്ടായ കുട്ടികള്‍ മാത്രമെ ഉള്ളൂവെന്നായിരുന്നു മറഡോണ ഇത്രനാള്‍ വാദിച്ചിരുന്നത്. മറ്റ് കുട്ടികളില്ലെന്ന് പറഞ്ഞിരുന്ന മറഡോണയ്‌ക്ക് ഇപ്പോള്‍ ഔദ്യോഗികമായി എട്ട് മക്കളുണ്ട്.

2000 മുതല്‍ 2005 വരെ ക്യൂബയില്‍ ചികിത്സയിലായിരുന്നു മറഡോണ. ആ സമയത്ത് ക്യൂബന്‍ പ്രസിഡന്റ് ഫിഡല്‍ കാസ്ട്രോയുമായി നല്ല അടുപ്പമായിരുന്നു. കാസ്ട്രോയുടെ ചിത്രം മറഡോണ കാലില്‍ പച്ച കുത്തിയിട്ടുണ്ട്. 20 വര്‍ഷത്തെ ദാമ്ബത്യജീവിതം അവസാനിപ്പിച്ച്‌ 2003 ലാണ് മറഡോണയും മുന്‍ ഭാര്യ ക്ലോഡിയ വില്‍ഫെനയും വേര്‍പിരിഞ്ഞത്.

ജിയാനിയ(29), ഡാല്‍മ(31) എന്നിവരാണ് മക്കള്‍. ഇവരെക്കൂടാതെ മറ്റ് മക്കളില്ലെന്നായിരുന്നു മറഡോണയുടെ അവകാശവാദം. എന്നാല്‍, പിന്നീട് ഡീഗോ ജൂനിയര്‍(32), ജാന (22) എന്നിവരും മറഡോണയുടെ മക്കളാണെന്ന് തെളിഞ്ഞു. മാഞ്ചസ്റ്റര്‍ സിറ്റി താരം സെര്‍ജിയോ അഗ്യൂറോയുടെ മുന്‍ ഭാര്യയാണ് ജിയാനീന. വെറോണിക ഒജേഡയുമായുള്ള ബന്ധത്തിലുണ്ടായ ആറുവയസ്സുകാരന്‍ ഡീഗോ ഫെര്‍ണാണ്ടോയും മറഡോണയുടെ മകനാണ്. നിലവില്‍ മെക്‌സിക്കന്‍ ഫുട്ബോള്‍ ക്ലബ്ബിന്റെ പരിശീലകനാണ് മറഡോണ.