നമ്മുടെ തൊട്ടടുത്ത്, കോഴിക്കോട് നിന്ന് ഒരു മണിക്കൂറിന്റെയൊക്കെ വഴിദൂരം മാത്രമുള്ള സ്ഥലങ്ങള്‍ നാം തിരിച്ചറിയാതെ പോകരുത്. ഒരിക്കലെങ്കിലും എത്തിപ്പിടിച്ചെങ്കില്‍ മാത്രമേ അവയുടെ വില നമുക്ക് മനസ്സിലാക്കാനാകൂ. അരീക്കോട് നിന്ന് കേവലം പത്ത് കിലോമീറ്റര്‍ മാറി ഊര്‍ങ്ങാട്ടീരി പഞ്ചായത്തിലാണ് 1400-നടുത്ത് അടി ഉയരത്തില്‍ സ്ഥിതി ചെയ്യുന്ന ശൈഖ് കുന്ന് അഥവാ ചെക്കുന്ന്.

ചെക്കുന്നിലേക്കുള്ള ട്രെക്കിംഗ് കരുതലോടെ ആവണം. പാറകളിലൊക്കെ ചവിട്ടുമ്പോള്‍ വല്ലാത്ത വഴുവഴുപ്പ്. മുകളില്‍ നിന്ന് പതിയെ വെള്ളം പാറകളിലൂടെ ഒലിച്ചിറങ്ങിക്കൊണ്ടിരിക്കും. ചുറ്റും മനസ്സ് കുളിരണിയുന്ന പച്ചപ്പും. മഴ കനത്താല്‍ കോട കാഴ്ച്ചക്ക് തടസ്സം നില്‍ക്കും. ട്രക്കിങ്ങ് കൂടുതല്‍ ദുഷ്‌കരമാകും. പാറകളില്‍ ചവിട്ടുമ്പോള്‍ പ്രത്യേകം ശ്രദ്ധിക്കണം. വല്ലാതെ ഇരുട്ടുന്നതിനു മുമ്പ് തിരികെയെത്താന്‍ ശ്രമിക്കണം. ട്രൈബല്‍ കോളനിയിലൂടെയാണ് വഴി. ട്രൈബല്‍ കോളനിയിലേക്ക് വെള്ളമൊഴുകുന്ന പാറക്കൂട്ടങ്ങളിലൂടെ തന്നെയാണ് നടക്കേണ്ടത്. വഴുവഴുപ്പിന്റെ തീവ്രതയും ഇവിടത്തെ ട്രക്കിങ്ങിന്റെ ഏതാണ്ടൊരു സ്വഭാവവും ആ നടത്തത്തിനിടെ തന്നെ ബോധ്യമാകും.

ആദിവാസി കോളനിയില്‍ കുറച്ചു മാറി പലയിടത്തായിട്ടാണ് വീടുകളുള്ളത്. വീടിന്റെ ഘടനയും അവരുടെ വസ്ത്രവും എല്ലാം പുതിയ കാലത്തോട് താദാത്മ്യം പ്രാപിച്ച രീതിയിലായിരുന്നു. വിശ്രമവും നടത്തവും ഒക്കെയായി ട്രക്കിങ്ങ് പുരോഗമിക്കുമ്പോള്‍ കണ്ണുകളിലേക്കെത്തുന്ന ചെക്കുന്നിന്റെ സൗന്ദര്യവും മുമ്പിലേക്കെത്തുന്ന കോടയുടെ ഒളിച്ചുകളിയും ആരുടെയും ക്ഷീണം അകറ്റും.

360 ഡിഗ്രിയില്‍ ഒരു ഭാഗം കോട പുതച്ചും മറ്റു ഭാഗങ്ങള്‍ വ്യക്തതയോടും ചെക്കുന്ന് കാഴ്ച്ചകളുടെ വസന്തം തന്നെ സമ്മാനിക്കും. പ്രകൃതിയുടെ താളത്തിലലിഞ്ഞ് നില്‍ക്കുന്നതിനിടക്ക് കോട അതിന്റെ സ്ഥാനം മാറ്റിക്കൊണ്ടേയിരിക്കും. തണുത്ത കാറ്റും കാര്‍മേഘങ്ങളുടെ അകമ്പടിയും ചെക്കുന്നിലെ കാഴ്ച്ചകള്‍ക്ക് രസം പകരും. ഇവിടെയെത്താന്‍ ഇത്ര കാലം വൈകിയല്ലോ എന്നു ചിന്തിച്ചുപോകും.

കുറച്ചു നേരമങ്ങനെ ആ ഉയരത്തില്‍ കാഴ്ച്ചകള്‍ കണ്ട് മനസ്സിനെ കയറൂരി വിട്ട് സ്വസ്ഥമായിരിക്കണം. ചെക്കുന്ന് കയറാനും ഇറങ്ങാനും മൂന്ന് വഴികളുണ്ട്. ചെക്കുന്നിലേക്കുള്ള ഏറ്റവും ദുര്‍ഘടമായ പാത ആദിവാസി കോളനിയിലൂടെ ഉള്ളതാണ്. മറ്റു രണ്ടു വഴികളും താരതമ്യേന എളുപ്പമാണ്. അതിലൊന്നു പടിഞ്ഞാറേ ചാത്തന്നൂര്‍ വഴിയും മറ്റൊന്ന് പ്ലാന്റേഷന്‍ റോഡ് വഴിയുമാണ്.

അവിടെയുള്ള ഒരു ക്വാറി ചെക്കുന്നിനേല്‍പിക്കുന്ന ആഘാതം എത്രമാത്രമാണെന്ന് ക്വാറിയുടെ സമീപത്ത് എത്തിയാലാണ് ബോധ്യപ്പെടുന്നത്. ചെക്കുന്നിന്റെ താഴ്ഭാഗത്തെ പല കുന്നുകളും തുരന്നു കഴിഞ്ഞിരിക്കുന്നു. എത്ര കാലം ചെക്കുന്ന് ആ രൂപത്തിലവിടെയങ്ങനെ നില്‍ക്കുമെന്ന ആശങ്ക തോന്നിപ്പോകും. ചെക്കുന്നിനെയും കൊല്ലംകൊല്ലിയെയും ഇല്ലായ്മ ചെയ്യുന്ന ക്വാറിയെ കുറിച്ച് ഉത്ക്കണ്ഠപ്പെടുമ്പോഴും സുന്ദരിയായ ചെക്കുന്ന് അതിന്റെ മനോഹാരിത ഇനിയും തലമുറകള്‍ക്ക് പകര്‍ന്നു നല്‍കാനാവുന്ന രീതിയില്‍ നിലനില്‍ക്കട്ടെ എന്ന പ്രാര്‍ത്ഥനയും ഉള്ളില്‍നിന്നുയരും.