പെട്രോള്‍, ഡീസല്‍ വിലകള്‍ തമ്മിലുളള വ്യത്യാസം കുറഞ്ഞത് ഡീസല്‍ വാഹനങ്ങളുടെ ആവശ്യകതയിലും കുറവ് വന്നതായി കണക്കുകള്‍ സൂചിപ്പിക്കുന്നു. കാര്‍വിപണിയില്‍ ഡീസല്‍ വാഹനങ്ങളുടെ വിഹിതം 22 ശതമാനമായി താഴ്ന്നു. 2012 13 സാമ്പത്തിക വര്‍ഷത്തില്‍ 50 ശതമാനം ഉണ്ടായിരുന്ന വിഹിതമാണ് ഈ നിലയില്‍ കുറഞ്ഞത്. ഡീസല്‍ വാഹനങ്ങള്‍ക്ക് വിപണിയില്‍ ഉണ്ടായിരുന്ന താല്പര്യത്തില്‍ മങ്ങലേറ്റതിന്റെ തെളിവായിട്ടാണ് ഇത് കണക്കാക്കുന്നത്. 

ഒരു ഘട്ടത്തില്‍ പെട്രോള്‍ വിലയില്‍ നിന്നും 29 രൂപയുടെ വരെ കുറവുണ്ടായിരുന്ന സ്ഥാനത്ത് ഇന്ന് വിലകള്‍ തമ്മിലുളള അന്തരം അഞ്ചു രൂപ മുതല്‍ എട്ടുരൂപ വരെ മാത്രമാണ്. പശ്ചിമ ബംഗാള്‍ പോലുളള സംസ്ഥാനങ്ങളില്‍ ഇത് ഒരു രൂപ മാത്രമാണ് എന്നാണ് കണക്കുകള്‍ വ്യക്തമാക്കുന്നത്.

നിലവില്‍ പെട്രോള്‍ ഡീസല്‍ കാറുകള്‍ തമ്മില്‍ ചുരുങ്ങിയത് ഒരു ലക്ഷം രൂപയുടെ വില വ്യത്യാസമുണ്ട്. ഡീസല്‍ വിലയിലെ കുറവ്്, ഇന്ധനക്ഷമത എന്നിവ കണക്കാക്കിയാണ് ഡീസല്‍ കാറുകള്‍ക്ക് കൂടുതല്‍ വില ഈടാക്കുന്നത്. എന്നാല്‍ ഇന്ധനക്ഷമത മാത്രം കണക്കാക്കി ഇനിമുതല്‍ ഡീസല്‍ കാറുകള്‍ വാങ്ങേണ്ടതുണ്ടോ എന്ന ചോദ്യമാണ് ഉയരുന്നത്.

ഡീഡലിന് കൂടുതല്‍ ഇന്ധനക്ഷമതയുളളതു കൊണ്ട് മാസം 1500 രൂപ വരെ ലാഭിക്കാന്‍ കഴിയുമെന്നാണ് കണക്കുകള്‍ വ്യക്തമാക്കുന്നത്. എന്നാല്‍ പെട്രോള്‍, ഡീസല്‍ വെരിയേന്റുകള്‍ തമ്മിലുളള വിലവ്യത്യാസവുമായി താരതമ്യം ചെയ്യുമ്പോള്‍ ഈ ലാഭം വലിയ കാര്യമല്ല. ഏകദേശം ആറുവര്‍ഷം കഴിഞ്ഞാല്‍ മാത്രമേ ഇതിന്റെ പ്രയോജനം ലഭിക്കുകയുളളു. നിലവില്‍ ഒരു കാര്‍ വാങ്ങി അഞ്ചു വര്‍ഷം വരെ മാത്രം ഉപയോഗിക്കുന്നവരുടെ എണ്ണം വര്‍ധിച്ചുവരികയാണ്. അങ്ങനെ നോക്കിയാല്‍ ദീര്‍ഘകാല നേട്ടം ഒട്ടും ആകര്‍ഷണീയമല്ല.