സ്ത്രീ തൊഴിലാളികളുടെ രാത്രികാല ജോലി; ആശങ്ക അറിയിച്ച് തൊഴിലാളികള്
രാത്രികാലങ്ങളില് ജോലിക്ക് സ്ത്രീകളെ നിയോഗിക്കാമെന്ന കേരളാ ഷോപ്പ് ആന്റ് എസ്റ്റാബ്ലിഷ്മെന്റ് നിയമത്തിലെ ഭേദഗതിയില് സ്ത്രീ തൊഴിലാളികള്ക്ക് ആശങ്ക. രാത്രിയിലെ ജോലി സുരക്ഷയെ ബാധിക്കുമെന്ന ആശങ്കയിലാണ് സ്ത്രീ തൊഴിലാളികള്. കൂടാതെ രാത്രികാലങ്ങളില് ജോലിക്ക് നിയോഗിക്കുമ്പോള് തൊഴില് ചൂഷണത്തിന് വഴിവയ്ക്കുമോ എന്ന ആശങ്കയും അവര് പങ്കിടുന്നു.
സ്ത്രീതൊഴിലാളികളുടെ നിലവിലുള്ള ജോലിസമയത്തിലും ഭേദഗതി വരുത്തിയിട്ടുണ്ട്. നേരത്തെ സ്ത്രീകള് ചെയ്യേണ്ട പരമാവധി ജോലി സമയം രാത്രി 7 മണി വരെ ആയിരുന്നത് 9 മണിവരെയാക്കി. കൂടാതെ രാത്രികാലങ്ങളിലും സ്ത്രീകളെ തൊഴിലുടമക്ക് ജോലിക്ക് നിയോഗിക്കാം. ഇതിന് തൊഴിലാളിയുടെ സമ്മതപത്രം ആവശ്യമാണ്. 5 അനുപാതം 2 എന്ന നിലയിലാണ് രാത്രികാലങ്ങളില് സ്ത്രീകളെ നിയോഗിക്കേണ്ടത്. ആഴ്ചയില് ഒരു ദിവസം കടകള് അടച്ചിടണമെന്ന വ്യവസ്ഥയിലും മാറ്റം വരുത്തിയിട്ടുണ്ട്. പകരം ആഴ്ചയില് ഒരുദിവസം തൊഴിലാളികള്ക്ക് അവധി നല്കണമെന്ന് നിയമത്തില് പറയുന്നു. 35 ലക്ഷം തൊഴിലാളികളാണ് നിയമത്തിന്റെ പരിധിയില് വരിക. കഴിഞ്ഞ ആഴ്ചയാണ് കേരളാ ഷോപ്പ് ആന്റ് എസ്റ്റാബ്ലിഷ്മെന്റ് നിയമഭേദഗതി നിയമസഭ പാസാക്കിയത്. തൊഴിലിടങ്ങളില് ഇരുന്ന് ജോലി ചെയ്യാനുള്ള അവകാശമാണ് ഭേദഗതിയിലെ പ്രാധാന വ്യവസ്ഥ.
നിയമത്തിലെ വ്യവസ്ഥകള് ലംഘിക്കുന്ന തൊഴിലുടമകള്ക്കുള്ള പിഴ ഓരോ വകുപ്പിനും അയ്യായിരം രൂപയില് നിന്ന് ഒരു ലക്ഷം രൂപയായി വര്ധിപ്പിച്ചു. നിയമലംഘനം ആവര്ത്തിക്കുന്നവര്ക്ക് ചുമത്തുന്ന പിഴ പതിനായിരം രൂപയില് നിന്ന് രണ്ടു ലക്ഷം രൂപയായാണ് ഉയര്ത്തിയത്.
https://www.facebook.com/Malayalivartha