പ്രതിസന്ധിയില് നിന്നും പ്രതിസന്ധിയിലേക്ക് ജെറ്റ് എയര്വേയ്സ്
സാമ്പത്തിക പ്രതിസന്ധിയില് നട്ടംതിരിയുന്ന ജെറ്റ് എയര്വേയിസിന് പാട്ടത്തിന് നല്കിയ വിമാനങ്ങളുടെ പാട്ടത്തുക കുടിശ്ശിക വരുത്തിയതിനാല് വിമാനങ്ങള് തിരികെ നല്കാന് ആവശ്യപ്പെട്ടതാണ് കമ്പനി നേരിടുന്ന പുതിയ പ്രതിസന്ധി. നിലവില് ഏതാണ്ട് 8500 കോടിയോളം രൂപയുടെ ബാധ്യതയിലാണ് കമ്പനി നീങ്ങുന്നത്. ഇതില് പാട്ടത്തിനെടുത്ത വിമാനങ്ങളുടെ പാട്ടത്തുകയും ഉള്പ്പെടും. ഇക്കഴിഞ്ഞ ഡിസംബറോടെ കുടിശിക മുഴുവനായി അടയ്ക്കാനാകുമെന്ന് കമ്പനി ഇവരെ അറിയിച്ചെങ്കിലും തുക തിരിച്ചടയ്ക്കാന് ഇനിയും വഴി കണ്ടെത്താന് കഴിയാതായതോടെയാണ് വിമാനങ്ങള് നല്കിയ കമ്പനികളുടെ ഭീഷണി.
രാജ്യത്ത് കഴിഞ്ഞ ഏതാനും വര്ഷങ്ങളായി കുതിച്ചുയരുന്ന ഇന്ധനവിലയെത്തുടര്ന്നാണ് കമ്പനി പ്രതിസന്ധിയിലായത്. രാജ്യത്തെ ആഭ്യന്തര സെക്ടറില് നില നില്ക്കുന്ന കടുത്ത മല്ത്സരം മൂലം ടിക്കറ്റു നിരക്കുയര്ത്താന് കഴിയാത്തതും കമ്പനിയെ വലച്ചു. ഇതുകാരണം പല സര്വീസുകളും നിര്ത്തേണ്ട അവസ്ഥയായി. രാജ്യത്തെ സ്വകാര്യ മേഖലയിലെ ആദ്യ ഫുള്സര്വീസ് വിമാനക്കമ്പനിയാണ് ജെറ്റ് എര്വേയിസ്.
ഇതിനിടെ ജെറ്റിന്റെ മുഖ്യ ബാങ്കിങ് പങ്കാളിയായ എസ്ബിഐ 6300 കോടി രൂപയുടെ ഒരു പുനരുദ്ധാരണ പാക്കേജ് പുതുതായി നിര്ദ്ദേശിച്ചിട്ടുണ്ട്. നിലവിലുള്ള 3150 കോടി രൂപയുടെ വായ്പ പുനക്രമീകരണം ചെയ്തും പുതിയ ഓഹരികള് വിറ്റഴിച്ചും ഈ തുക കണ്ടെത്താനാണ് ലക്ഷ്യമിടുന്നത്. എന്നാല് ജി ഇ കാപിറ്റല് ഏവിയേഷന് സര്വീസസ്, എസ് എം ബി സി ഏവിയേഷന് ക്യാപിറ്റല്, ജാക്സണ് സ്ക്വയര് തുടങ്ങിയവര് ജെറ്റിന് ഡെലിവറിക്ക് തയാറായിരുന്ന ബോയിങ് 737 മാക്സ് വിമാനങ്ങള് നല്കണോ എന്നത് സംബന്ധിച്ച് പുനരാലോചനയിലാണ്. നല്കിയ വിമാനങ്ങള് തിരികെ നല്കാനും ആവശ്യപ്പെട്ടിട്ടുണ്ട്.
https://www.facebook.com/Malayalivartha
