ഇന്ഷുറന്സ്ഇല്ലാതെ അപകടത്തില്പ്പെട്ടുന്ന വാഹനം ഇനി ഉടമയ്ക്ക് തിരികെ ലഭിക്കില്ല; പുതിയ നിയമം പ്രാബല്യത്തില്
ഇന്ഷുറന്സ് ഇല്ലാത്ത വാഹനങ്ങള് മൂലമുണ്ടായ അപകടങ്ങളില് മരിച്ചവരുടെ ആശ്രിതര്ക്കും പരുക്കേറ്റവര്ക്കും നാശനഷ്ടങ്ങളുണ്ടായവര്ക്കും നഷ്ടപരിഹാരം ഉറപ്പാക്കാന് ലക്ഷ്യമിട്ടുള്ള മോട്ടോര് വാഹന നിയമ ചട്ടം സര്ക്കാര് ഭേദഗതി ചെയ്തു. ഈ ഭേദഗതിയോടെ അപകടത്തില്പ്പെട്ടുന്ന ഇന്ഷുറന്സ് ചെയ്യാത്ത വാഹനം ഇനി പൊലീസ് സ്റ്റേഷനില്നിന്നുള്പ്പെടെ ഉടമയ്ക്കു വിട്ടു നല്കുന്നത് വിലക്കിയിട്ടുണ്ട്. ഇത്തരം വാഹനങ്ങള് കോടതി മുഖേന ലേലം ചെയ്തു വില്ക്കാനാണ് പുതിയ വ്യവസ്ഥ.
അപകടത്തില്പ്പെട്ട വാഹന ഉടമ, അല്ലെങ്കില് ഡ്രൈവറുടെ അപേക്ഷയില് വാഹനം മോട്ടോര് വാഹന വകുപ്പിന്റെ പരിശോധനയ്ക്കുശേഷം ബോണ്ടില് വിട്ടുകൊടുക്കുകയാണ് നിലവില് പൊലീസ് ചെയ്യുന്നത്. ചില കേസുകളില് പിഴ ഈടാക്കും. ഇന്ഷുറന്സ് നിര്ബന്ധമായി എടുക്കാനും നിര്ദേശിക്കും. മരണം നടന്ന കേസുകളില് വാഹനം കോടതി മുഖേന വിട്ടുകൊടുക്കുന്ന നടപടിയും അടുത്തിടെ ആരംഭിച്ചിട്ടുണ്ട്.
ഇത്തരം അപകടങ്ങളില് പിന്നീട് മോട്ടോര് ആക്സിഡന്റ് ക്ലയിം ട്രൈബ്യൂണല് നഷ്ടപരിഹാരം വിധിച്ചാല് അത് കൊടുക്കാനുള്ള സാമ്പത്തിക ശേഷിയില്ലാത്തവരായിരിക്കും ഭൂരിഭാഗം ഡ്രൈവര്മാരും ഉടമകളും. അതിനാല് മിക്കപ്പോഴും ഇരകള്ക്ക് നഷ്ടപരിഹാരത്തുക ലഭിക്കാത്ത സാഹചര്യമാണ് നിലവിലുള്ളത്. ചട്ടത്തില് വരുത്തിയ ഭേദഗതിയനുസരിച്ച് പൊലീസ് പിടികൂടി ഹാജരാക്കുന്ന വാഹനം കോടതി മുഖേന ലേലം ചെയ്തുകിട്ടുന്ന തുക എം എ സി ടിയില് നിക്ഷേപിക്കണം. അപകടം സംബന്ധിച്ച കേസ് നടക്കുന്ന കോടതി മഖേന പ്രതികളില്നിന്ന് ബാങ്ക് ഗാരന്റി വാങ്ങാനും വ്യവസ്ഥയുണ്ട്.
ഈ ഭേദഗതി ഇന്ഷുറന്സ് മേഖലയില് വലിയ മാറ്റങ്ങളുണ്ടാക്കുമെന്നാണ് വിലയിരുത്തുന്നത്. ഇന്ഷുറന്സ് ഇല്ലാതെ വാഹനം ഓടിക്കുന്നവരുടെ എണ്ണം ഇതുവഴി കുറയ്ക്കാനാകും. വാഹനങ്ങളില് വലിയൊരു വിഭാഗത്തിന് തേഡ് പാര്ട്ടി ഇന്ഷുറസ് ഇല്ലെന്നാണ് വിവിധ ഏജന്സികള് നടത്തിയ പഠനത്തിലെ കണ്ടെത്തല്.
https://www.facebook.com/Malayalivartha
