ഇനി മരുന്നുവില നീതി ആയോഗ് നിയന്ത്രിക്കും
മരുന്നുവില നിശ്ചയിക്കാന്‍ നീതി ആയോഗിന് കീഴില്‍ ഏഴംഗ സമിതിയ്ക്ക് കേന്ദ്രം സര്‍ക്കാര്‍ രൂപം നല്‍കി. ഇതുവരെ ആരോഗ്യമന്ത്രാലയവും ഫാര്‍മസ്യൂട്ടിക്കല്‍ വകുപ്പും തയ്യാറാക്കുന്ന അവശ്യ മരുന്നുകളുടെ പട്ടികയനുസരിച്ച് മെഡിക്കല്‍ ഉപകരണങ്ങളുടേയും മരുന്നിന്റെയും വില നിയന്ത്രിക്കുന്നത് സ്വയംഭരണ സ്ഥാപനമായ എന്‍ പി പി എ ആണ്. പുതിയ സമിതി വന്നതോടെ വില നിശ്ചയിക്കുന്നതില്‍ മരുന്നുവില നിര്‍ണയ അതോറിറ്റിയ്ക്ക് ഉണ്ടായിരുന്ന പരമാധികാരം നഷ്ടപ്പെട്ടും. നീതി ആയോഗിന്റെ ആരോഗ്യവിഭാഗത്തിലെ അംഗം, ധനമന്ത്രാലയത്തിലെ മുഖ്യ സാമ്പത്തിക ഉപദേഷ്ടാവ്, ആരോഗ്യ സേവനവിഭാഗം ഡയറക്ടര്‍ ജനറല്‍, ബയോമെഡിക്കല്‍ രംഗത്തെ വിദഗ്ധന്‍ എന്നിവരുള്‍പ്പെടുന്നതായിരിക്കും ഏഴംഗസമിതി.
എന്‍ പി പി എ ഒരു ഉപകരണം അല്ലെങ്കില്‍ മരുന്ന് അവശ്യ മരുന്നുകളുടെ പട്ടികയില്‍ ഉള്‍പ്പെടുത്തിയാല്‍, അത് സ്വാഭാവികമായും വിലനിയന്ത്രണത്തിന്റെ പരിധിയില്‍ വരും. ഇതേ അധികാരമുപയോഗിച്ചാണ് സ്‌റ്റെന്റുകള്‍ക്കും കാല്‍മുട്ട് മാറ്റിവെക്കല്‍ ശസ്ത്രക്രിയയ്ക്കുപയോഗിക്കുന്ന അസ്ഥിഘടകങ്ങള്‍ക്കും എന്‍ പി പി എ വില കുറച്ചത്. നീതി ആയോഗ് പാനല്‍ പ്രവര്‍ത്തിച്ചുതുടങ്ങിയാല്‍ ഈ രീതിക്കെല്ലാം മാറ്റം വരും. അവശ്യമരുന്നുകളെ നിര്‍ബന്ധമായും വിലനിയന്ത്രണപട്ടികയില്‍ ഉള്‍പ്പെടുത്തുന്ന രീതിയും അവസാനിക്കും. അതേസമയം, അവശ്യമരുന്നുകളുടെ പട്ടികയില്‍ നിലവിലുള്ള 750 മരുന്നുസംയുക്തങ്ങളുടെ വിലനിയന്ത്രണം മാറ്റമില്ലാതെ തുടരും. എന്നാല്‍ ഇത്തരമൊരു നീക്കം മരുന്നിന്റെ വില കൂടാനേ സഹായിക്കൂ എന്നാണ് ആരോഗ്യ രംഗത്തെ വിദഗ്ദ്ധര്‍ പറയുന്നത്.
https://www.facebook.com/Malayalivartha
