ജര്‍മനിയില്‍ എത്തുന്ന തൊഴില്‍ പ്രാവീണ്യമുള്ള, വിദ്യാഭ്യാസമുള്ള അഭയാര്‍ത്ഥികള്‍ക്ക് ബ്ലൂ കാര്‍ഡ്
ജര്‍മനിയില്‍ എത്തുന്ന ഉന്നത വിദ്യാഭ്യാസവും, വിദഗ്ദ്ധ തൊഴില്‍പരിശീലനവും നേടിയിട്ടുള്ള അഭയാര്‍ത്ഥികള്‍ക്ക് ബ്ലൂ കാര്‍ഡ് നല്‍കി നിയമാനുസൃത വിസാ നല്‍കാന്‍ ജര്‍മന്‍ തൊഴില്‍ വകുപ്പിന്റെ കീഴിലുള്ള ഫെഡറല്‍ എംപ്ലോയ്‌മെന്റ് ഏജന്‍സി ആവശ്യപ്പെട്ടു.
ഇപ്പോള്‍ ജര്‍മനിയില്‍ എത്തുന്ന അഭയാര്‍ത്ഥികളില്‍ 28 ശതമാനം ഉന്നത വിദ്യാഭ്യാസവും, വിദഗ്ദ്ധ പരിശീലനം സിദ്ധിച്ചിട്ടുള്ളവരുമാണെന്നും ഇവര്‍ക്ക് ബ്ലൂ കാര്‍ഡ് നല്‍കി ജര്‍മന്‍ കമ്പനികളില്‍ നിയമനം നല്‍കി അവരുടെ ദൗര്‍ലഭ്യം പരിഹരിക്കണമെന്നും ഫെഡറല്‍ എംപ്ലോയ്‌മെന്റ് ഏജന്‍സി പ്രസിഡന്റ് റെയ്മുണ്ട് ബെക്കര്‍ ആവശ്യപ്പെട്ടു.
യൂറോപ്യന്‍ യൂണിയന്‍ രാജ്യങ്ങള്‍ക്കു പുറത്തു നിന്നുമുള്ള ഉന്നത വിദ്യാഭ്യാസവും വിദഗ്ദ്ധ പരിശീലനവുമുള്ളവര്‍ക്ക് ബ്ലൂ കാര്‍ഡ് സമ്പ്രദായത്തില്‍ ജോലി സാദ്ധ്യത ഉറപ്പു നല്‍കണമെന്ന് യൂറോപ്യന്‍ യൂണിയന്‍ ആഭ്യന്തരനീതിന്യായ വകുപ്പ് കമ്മീഷണര്‍ ഫ്രാങ്കോ ഫ്രറ്റീനി കഴിഞ്ഞയാഴ്ച്ച ബ്രസല്‍സില്‍ ആവശ്യപ്പെട്ടിരുന്നു.
ബ്ലൂ കാര്‍ഡ് വ്യവസ്ഥയില്‍ ഉന്നത വിദ്യാഭാസമുള്ള ഡോക്ടര്‍മാര്‍, വിവരസാങ്കേതിക മേഖലയിലുള്ളവര്‍, ഗവേഷണ മേഖലയിലുള്ളവര്‍, സയന്റിസ്റ്റുകള്‍ എന്നിവര്‍ക്കാണ് ജോലി സാദ്ധ്യത. ബ്ലൂ കാര്‍ഡ് വ്യവസ്ഥയില്‍ 27 യൂറോപ്യന്‍ യൂണിയന്‍ രാജ്യങ്ങളിലും കരാര്‍ വ്യവസ്ഥയില്‍ ജോലി ചെയ്യുന്നതിനും, സ്വതന്ത്രമായി സഞ്ചരിക്കുന്നതിനും, ഭാര്യ അല്ലെങ്കില്‍ ഭര്‍ത്താവിനെയും, സ്വന്തം കുട്ടികളെയും കൊണ്ടു വരുന്നതിനും ഉദാര വ്യവസ്ഥകളാണുള്ളത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
