ധനകാര്യബില്ലിലെ വാഹനങ്ങളുടെ നികുതി നിര്‍ദേശങ്ങള്‍ പ്രാബല്യത്തില്‍ വന്നതോടെ ഇതരസംസ്ഥാന വാഹനങ്ങള്‍ക്കു കേരളത്തിലേക്കു കടക്കാന്‍ ചെലവേറി. കാറുകള്‍ മുതല്‍ ബസുകള്‍ വരെ എല്ലാ വാഹനങ്ങളിലെ യാത്രയ്ക്കും നിലവിലെ നിരക്കിനെക്കാള്‍ മൂന്നിരട്ടിയും നാലിരട്ടിയും നികുതിയായി അടയ്‌ക്കേണ്ടിവരും.

നികുതി വര്‍ധന മൂലം കേരളത്തിനു വരുമാനം കൂടുമെങ്കിലും വിനോദസഞ്ചാര വാഹനങ്ങളുടെ വരവു കുറയുമെന്നു ചൂണ്ടിക്കാണിക്കപ്പെടുന്നു. കേരളത്തിലേക്കുള്ള തീര്‍ഥാടക യാത്രകളും ചെലവേറും. ഒരു തവണത്തെ യാത്രയാണെങ്കില്‍ പോലും കേരളത്തിലെ വാഹനങ്ങളില്‍ നിന്നു വാര്‍ഷിക നികുതി സ്വീകരിക്കുന്ന കര്‍ണാടകയിലേതു പോലെ കര്‍ണാടക വാഹനങ്ങളില്‍ നിന്നു അതേ മാനദണ്ഡപ്രകാരം നികുതി സ്വീകരിക്കാന്‍ വ്യവസ്ഥ ചെയ്യുന്നതാണു ബില്ല്. 

കേരളത്തിലേക്കു പ്രത്യേക പെര്‍മിറ്റ് എടുത്തു വരുന്ന ടൂറിസ്റ്റ് വാഹനങ്ങള്‍ക്കും ഓള്‍ ഇന്ത്യാ പെര്‍മിറ്റ് വാഹനങ്ങള്‍ക്കും സാധാരണ സീറ്റുള്ള വാഹനമാണെങ്കില്‍ ആളൊന്നിനു 2250 രൂപയും പുഷ്ബാക്ക് സീറ്റുള്ള വാഹനമാണെങ്കില്‍ 3500 രൂപയും നികുതിയായി നിജപ്പെടുത്തി. നേരത്തേ ഇതു സാധാരണ സീറ്റിനു ശരാശരി 150 രൂപയും പുഷ്ബാക്ക് സീറ്റിന് 200 രൂപയും ആയിരുന്നു.

ഇനി മുതല്‍ കേരളത്തിലേക്കുള്ള ഓള്‍ ഇന്ത്യാ പെര്‍മിറ്റ് വാഹനങ്ങളില്‍ നിന്നു മൂന്നു മാസത്തേക്കുള്ള നികുതിയാണു സ്വീകരിക്കുക. അതേസമയം, കര്‍ണാടകയില്‍ റജിസ്റ്റര്‍ ചെയ്ത ഓള്‍ ഇന്ത്യാ പെര്‍മിറ്റ് വാഹനങ്ങള്‍ ഒരു വര്‍ഷത്തെ നികുതി ഒരുമിച്ചടയ്ക്കണം.

സ്‌പെഷല്‍ പെര്‍മിറ്റ് എടുത്തു വരുന്ന വാഹനങ്ങള്‍ക്ക് ഒരു തവണ കടന്നുപോകാന്‍ മൂന്നു മാസത്തെ നികുതിയോ കുറഞ്ഞ ദിവസമാണെങ്കില്‍ മൂന്നു മാസത്തെ നികുതിയുടെ മൂന്നിലൊന്നോ പത്തിലൊന്നോ ഈടാക്കും. വീണ്ടും കടന്നു വരുന്നുണ്ടെങ്കില്‍ വീണ്ടും നികുതി സ്വീകരിക്കും.

35 പുഷ്ബാക്ക് സീറ്റുള്ള, ഇതര സംസ്ഥാനത്തു റജിസ്റ്റര്‍ ചെയ്ത ഓള്‍ ഇന്ത്യാ പെര്‍മിറ്റ് ബസിന് മൂന്നു മാസത്തെ നികുതിയായ 1,22,500 രൂപ അടയ്ക്കണം. (ഒരാള്‍ക്ക് 3500 രൂപ വീതം 35 പേര്‍ക്കുള്ള തുക) കര്‍ണാടക വാഹനമാണെങ്കില്‍ അവരില്‍ നിന്ന് ഒരു വര്‍ഷത്തെ നികുതിയായ 4,90,000 രൂപ ഈടാക്കും. 

ഏഴു ദിവസത്തേക്കു കേരളത്തിലേക്കു സ്‌പെഷല്‍ പെര്‍മിറ്റ് എടുത്തുവരുന്ന 35 സീറ്റുള്ള ഇതരസംസ്ഥാന വാഹനത്തിന് ഒരാളുടെ നികുതിയായ 3500 രൂപയുടെ പത്തിലൊന്നു കണക്കാക്കി 350 രൂപ പ്രകാരം 12,250 രൂപ നികുതിയായി അടയ്ക്കണം. സ്‌പെഷല്‍ പെര്‍മിറ്റ് വാഹനങ്ങളുടെ കാര്യത്തില്‍ കര്‍ണാടകയ്ക്കും ഒരേ മാനദണ്ഡമാണ്‌a