സംസ്ഥാനത്ത് ഇന്ന് സ്വര്‍ണവിലയില്‍ മാറ്റമില്ല. പവന് 38,200 രൂപയിലും ഗ്രാമിന് 4,775 രൂപയിലുമാണ് വ്യാപാരം പുരോഗമിക്കുന്നത്. ഇന്നലെ പവന് 280 രൂപയും, ഗ്രാമിന് 35 രൂപയും കുറഞ്ഞിരുന്നു.

ഇക്കഴിഞ്ഞ മൂന്നിന് പവന് ഒറ്റയടിക്ക് 400 രൂപ വര്‍ധിച്ചിരുന്നു. ഈ മാസം തുടക്കം മുതല്‍ സ്വര്‍ണവില അസ്ഥിരമാണ്. ആഗോള വിപണിയില്‍ എണ്ണവില കുതിച്ചതോടെ പണപ്പെരുപ്പം ഉയര്‍ന്നതും സാമ്പത്തിക മാന്ദ്യ ഭീഷണി ശക്തമായതുമാണ് സ്വര്‍ണവിലയില്‍ പ്രതിഫലിക്കുന്നത്.

ഓഹരി വിപണികള്‍ അസ്ഥിരമായതോടെ സ്വര്‍ണത്തിലേക്ക് നിക്ഷേപ ശ്രദ്ധ മാറുന്നുണ്ട്. യു.എസില്‍ തൊഴില്‍ ഡേറ്റ മെച്ചപ്പെട്ടത് ഫെഡ് റിസര്‍വിന് നിരക്കുയര്‍ത്താന്‍ കരുത്തേകുന്നുണ്ട്. ഇതു നിക്ഷേപകരെ സ്വാധീനിച്ചേക്കും. വിപണികള്‍ തുടര്‍ന്നും ഇടിഞ്ഞാല്‍ സ്വര്‍ണത്തിന് ആവശ്യകത കൂടാനാണ് സാധ്യതയെന്നാണ് റിപ്പോര്‍ട്ടുകള്‍.

ആഗോള വിപണിയിലേയും, ഡല്‍ഹി ബുള്ളിയന്‍ വിപണിയിലേയും വിലമാറ്റങ്ങളാണു നിലവില്‍ പ്രാദേശിക ആഭരണ വിപണികളില്‍ പ്രതിഫലിക്കുന്നത്. നിലവില്‍ രാജ്യാന്തര വിപണിയില്‍ ഔണ്‍സിന് 1,851.10 ഡോളറിലാണ് വ്യാപാരം പുരോഗമിക്കുന്നത്.

ഈ മാസം ഒന്നിന് പവന് 38,000 രൂപയായിരുന്നു. മാസത്തെ ഏറ്റവും താഴ്ന്ന നിരക്കും ഇതാണ്. ഈ മാസം രണ്ടിന് പവന് 80 രൂപ കൂടി 38,080 രൂപയിലെത്തി. തുടര്‍ന്ന് മൂന്നിന് 400 രൂപ വര്‍ധിച്ച് 38,480 രൂപയിലെത്തി. മാസത്തെ ഏറ്റവും ഉയര്‍ന്ന നിരക്കാണിത്.