സംസ്ഥാനത്ത് സ്വർണവിലയിൽ വർദ്ധനവ്. തുടർച്ചയായി അഞ്ചാംദിനവും സംസ്ഥാനത്ത് സ്വർണവില വർദ്ധിച്ചിരിക്കുകയാണ്. ഗ്രാമിന് 35 രൂപയും പവന് 280 രൂപയുമാണ് വർദ്ധിച്ചത്. ഇതോടെ ഗ്രാമിന് 13065 രൂപയും പവന് 1,04,520 രൂപയുമായി. എക്കാലത്തെയും ഉയർന്ന വിലയാണിത്.

18 കാരറ്റ് സ്വർണവില 25 രൂപ വർദ്ധിച്ച് 10840 രൂപയായി. വെള്ളി വില ഗ്രാമിന് അഞ്ച് രൂപ കൂടി 275 രൂപയായി. ഇന്നലെ സ്വർണം ഗ്രാമിന് 155 രൂപ വർധിച്ചിരുന്നു. പവന് 1240 രൂപ കൂടി 1,04,240 രൂപയായിരുന്നു വില.

അതേസമയം ആഗോളവിപണിയിലും സ്വർണത്തിന് വില കുതിച്ചുയരുന്നു. സ്​പോട്ട് ഗോൾഡ് വില ​ട്രോയ് ഔൺസിന് 4,597.39 ഡോളറായി. 88.19 ഡോളറാണ് ഒറ്റയടിക്ക് കൂടിയത്. ഉയർന്നത്. 1.96 ശതമാനമാണ് വർധന. യു.എസ് ഗോൾഡ് ഫ്യൂച്ചർ നിരക്ക് 4,605.86 ഡോളറായി കുറഞ്ഞു.

കഴിഞ്ഞ ഡിസംബറിൽ ഒരുലക്ഷം കടന്ന സ്വർണവില പിന്നീട് കുറഞ്ഞ് പുതുവത്സര ദിനത്തിൽ 99,040 രൂപയായിരുന്നു. ജനുവരി അഞ്ചിന് വീണ്ടും ലക്ഷം കടന്ന് 1,00,760 രൂപയായി. ജനുവരി ഒമ്പത് മുതൽ തുടർച്ചയായി വില വർദ്ധിച്ചു കൊണ്ടിരിക്കുന്നു.