സംസ്ഥാനത്ത് സ്വർണവിലക്ക് രണ്ടാം ദിവസവും മാറ്റമില്ല. ഗ്രാമിന് 14,845 രൂപയും പവന് 1,18,760 രൂപയുമാണ് ഇന്നത്തെ വില.

ജനുവരി മാസത്തിലെ ഏറ്റവും കൂടിയ വിലയായ 1,19,320 രൂപയാണ് തിങ്കളാഴ്ച രാവിലെ പവന് രേഖപ്പെടുത്തിയത്. രാവിലെ 1,800 രൂപ വർധിച്ച പവൻ വില ഉച്ചക്ക് ശേഷം 560 രൂപയായി കുറഞ്ഞു. ഇന്നലെ വൈകീട്ട് 1,18,760 രൂപയായിരുന്നു ഒരു പവൻ സ്വർണത്തിൻറെ വില. ഒരു ഗ്രാം സ്വർണത്തിൻറെ വില 70 രൂപ കുറഞ്ഞ് 14,845 രൂപയുമായി. സ്വർണവില ആദ്യമായി ഒരു ലക്ഷം കടന്നത് 2025 ഡിസംബർ 23നാണ്.

അന്താരാഷ്ട്ര വിപണിയിലെ മാറ്റങ്ങളാണ് സംസ്ഥാനത്തെ സ്വർണ വിലയെ സ്വാധീനിക്കുന്നത്. കഴിഞ്ഞ കുറേ ദിവസങ്ങളായി സ്വർണ വിലയിൽ വൻ വർധനയാണ് കേരളത്തിൽ രേഖപ്പെടുത്തുന്നത്. അതിനിടെ, തിങ്കളാഴ്ച ചരിത്രത്തിലാദ്യമായി ആഗോള വിപണിയിൽ സ്വർണവില ഔൺസിന് 5,000 ഡോളർ പിന്നിടുകയും ചെയ്തു.