ജനുവരിയോടെ പ്രതിദിനം 13 വിമാനങ്ങളുമായി കണ്ണൂര് വിമാനത്താവളം
രണ്ടായിരത്തി മുന്നൂറ്റമ്പത് കോടി രൂപ മുതല് മുടക്കി നിര്മ്മിച്ച കണ്ണൂര് അന്താരാഷ്ട്ര വിമാനത്താവളത്തില് നിന്ന് ജനുവരിയോടെ പ്രതിദിനം 13 ഫ്ലൈറ്റുകള് സര്വീസ് ആരംഭിക്കും. ഉദ്ഘാടന ദിവസമായ ഡിസംബര് ഒന്പതിന് തന്നെ വിമാനത്താവളം പ്രവര്ത്തനസജ്ജമാകും. കണ്ണൂരില്നിന്നുള്ള ആദ്യ വിമാന സര്വീസായ അബുദാബിയിലേക്കുള്ള എയര് ഇന്ത്യ എക്സ്പ്രസ് രാവിലെ പത്തിന് മുഖ്യമന്ത്രി പിണറായി വിജയനും കേന്ദ്ര വ്യോമയാന മന്ത്രി സുരേഷ് പ്രഭുവും ചേര്ന്ന് ഫ്ലാഗ് ഓഫ് ചെയ്യും. രാത്രി ഏഴിനാണ് അബുദാബിയില്നിന്ന് കണ്ണൂരിലേക്ക് തിരിച്ചുള്ള വിമാനം. ഉദ്ഘാടനദിവസം മാത്രമായിരിക്കും ഈ സമയത്ത് സര്വീസ് നടത്തുക. മറ്റു ദിവസങ്ങളില് രാവിലെ ഒന്പതിന് കണ്ണൂരില്നിന്ന് അബുദാബിയിലേക്ക് പുറപ്പെടുന്ന വിമാനം രാത്രി 8.20ന് കണ്ണൂരില് തിരിച്ചെത്തും. ദോഹ, ഷാര്ജ, റിയാദ് എന്നിവിടങ്ങളിലേക്കും എയര് ഇന്ത്യ എക്സ്പ്രസ് സര്വീസിന് തയാറായിട്ടുണ്ട്. ഇപ്പോള് അറ്റകുറ്റപ്പണിയിലുള്ള ഒരു വിമാനംകൂടി എത്തുന്നതോടെ മസ്കറ്റിലേക്കും സര്വീസ് തുടങ്ങും. ഇതോടൊപ്പം ആഴ്ചയില് നാലുദിവസം മാത്രമുള്ള ഷാര്ജ സര്വീസ് ദിവസേനയാക്കും.
ഡിസംബറില് തന്നെ ഗോ എയറിന്റെ ആഭ്യന്തര സര്വീസും ആരംഭിക്കും. ബംഗളൂരു, ചെന്നൈ, ഹൈദരാബാദ്, മുംബൈ എന്നിവിടങ്ങളിലേക്കാണ് ഗോ എയര് സര്വീസ് നടത്തുക. അന്താരാഷ്ട്ര സര്വീസിനും ഗോ എയര് വ്യോമയാന മന്ത്രാലയത്തിന്റെ അനുമതി തേടിയിട്ടുണ്ട്. അനുമതി ലഭിച്ചാല് അബുദാബി, ദമാം, മസ്കറ്റ് എന്നിവിടങ്ങളിലേക്ക് സര്വീസ് തുടങ്ങും. ദോഹ, കുവൈത്ത് സര്വീസിനും ഗോ എയറിന് പദ്ധതിയുണ്ട്. ഇന്ഡിഗോ ജനുവരി പകുതിയോടെ ബംഗളൂരു, ചെന്നൈ, ഗോവ, ഹൈദരാബാദ്, ഹൂബ്ലി, തിരുവനന്തപുരം എന്നിവിടങ്ങളിലേക്ക് സര്വീസ് നടത്തുന്നതിന് താത്പര്യം പ്രകടിപ്പിച്ചിട്ടുണ്ട്.
ആദ്യദിവസം മുതല്ത്തന്നെ കാര്ഗോ സര്വീസിനും താത്കാലിക സംവിധാനം ഏര്പ്പെടുത്തും. എയര് ഇന്ത്യ എയര്ട്രാന്സ്പോര്ട്ട് സര്വീസ് ലിമിറ്റഡുമായി ഇതിന് ധാരണയായി. യാത്രക്കാര്ക്ക് ബാഗേജുകള് കൗണ്ടറില് കൊണ്ടുപോയി ചെക്ക് ചെയ്യേണ്ട ആവശ്യമില്ലാത്ത സെല്ഫ് ബാഗേജ് ഡ്രോപ് മെഷീന് സൗകര്യം കേരളത്തില് ആദ്യമായി ഏര്പ്പെടുത്തുന്നത് കണ്ണൂരിലാണ്. ഹാന്ഡ് ബാഗേജുകളും ബോര്ഡിംഗ് പാസുകളും സ്റ്റാമ്ബ് ചെയ്യാതെ സെക്യൂരിറ്റി സ്ക്രീനിംഗ് നടത്താനുള്ള സംവിധാനവും ആലോചിക്കുന്നുണ്ട്. വിമാനത്താവളത്തിലെ കസ്റ്റംസ് വിഭാഗം ഡിസംബര് ഒന്നിന് ചുമതലയേല്ക്കും.
https://www.facebook.com/Malayalivartha
