ക്രിസ്തുമസ് ദിനങ്ങള്‍ അടുത്തതോടെ ഉണ്ണിയേശുവിന്റെ തിരുപ്പിറവിയെ വരവേല്‍ക്കാന്‍ ക്രിസ്തുമസ് വിപണി സജീവമാകുന്നു. അലങ്കാര വസ്തുക്കളുടേയും നക്ഷത്രങ്ങളുടേയും പുല്‍ക്കൂടുകളുടേയും വിപുലമായ ശേഖരമൊരുക്കി വ്യാപാരികള്‍ വിപണി കയ്യടക്കാന്‍ സജ്ജരായിട്ടുണ്ട്. ക്രിസ്തുമസ് കടകളില്‍ വിവിധ നിറത്തിലും തരത്തിലും വലുപ്പത്തിലുമുള്ള നക്ഷത്രങ്ങള്‍ക്കൊണ്ട് നിറച്ചിട്ടുണ്ട്. രാത്രിയില്‍ പ്രകാശപൂരിതമാകുന്ന നക്ഷത്രങ്ങള്‍ കണ്ണുകള്‍ക്ക് നവ്യാനുഭവമാണ് നല്‍കുന്നത്. ഇവ വാങ്ങുന്നതിന് ആവശ്യക്കാരേറെയാണ്. കരകൗശലക്കാര്‍ സ്വയം നിര്‍മ്മിക്കുന്ന നക്ഷത്രങ്ങളുടെ വില്പനയും സജീവമായിട്ടുണ്ട്. പുതിയ തരത്തിലുള്ള നക്ഷത്രങ്ങള്‍ക്കാണ് ആവശ്യക്കാരേറെയുള്ളത്. 

പ്ലാസ്റ്റിക് രൂപത്തില്‍ ഇലിമിനേഷന്‍ ബള്‍ബുകള്‍ പതിപ്പിച്ച ഫാന്‍സി നക്ഷത്രങ്ങളാണ് ഈ വര്‍ഷത്തെയും താരം. ഒടിയന്‍, 2.0 തുടങ്ങിയ സിനിമാ പേരുകളിലുള്ള നക്ഷത്രങ്ങളും ആകര്‍ഷണീയമാണ്. 55 രൂപയുടെ ചെറിയ നക്ഷത്രങ്ങള്‍ മുതല്‍ 4000 രൂപാ വരെ വിലയുള്ളവ ഇക്കൂട്ടത്തിലുണ്ട്. കാലാകാലങ്ങളായി വീടുകളെ അലങ്കരിക്കുന്ന വാല്‍ നക്ഷത്രങ്ങള്‍ക്കും നല്ല ഡിമാന്റുണ്ട്. പുല്‍ക്കൂടുകള്‍ ഒരുക്കുന്നതിനും ക്രിസ്തുമസ് ട്രീ അലങ്കരിക്കുന്നതിനും വിവിധ നിറങ്ങളോടുകൂടിയ ഇല്യൂമിനേഷന്‍ ലൈറ്റുകള്‍ വാങ്ങുന്നവര്‍ ഏറെയാണ്. ഇല്യൂമിനേഷന്‍ ചെയ്ത ട്രീകളും വിവിധ നക്ഷത്രങ്ങളും ഇത്തവണയും ലഭ്യമാണ്.

ജനജീവിതം തിരക്കിലേക്ക് മാറിയതോടെ നഗരപ്രദേശങ്ങളില്‍ പലരും സ്വയം നിര്‍മ്മിക്കുന്ന പുല്‍ക്കൂടുകള്‍ ഉപേക്ഷിച്ചു കഴിഞ്ഞു. വിപണിയില്‍ ഇത്തരക്കാര്‍ക്കായി റെഡിമെയ്ഡ് പുല്‍ക്കൂടുകള്‍ യഥേഷ്ടം ലഭ്യമാണ്. എന്നാല്‍ ഒരിക്കല്‍ വാങ്ങിയ കൂടുകള്‍ പലതവണ ഉപയോഗിക്കാമെന്നതിനാല്‍ ഇതിന് ആവശ്യക്കാര്‍ കുറയാനാണ് സാധ്യത. 

ക്രിസ്തുമസ് കച്ചവടം മുന്‍വര്‍ഷങ്ങളെ അപേക്ഷിച്ച് തീര്‍ത്തും മോശമായ അവസ്ഥയിലാണ്. പ്രളയക്കെടുതിയും സാമ്പത്തിക രംഗത്തെ തകര്‍ച്ചയുമാണ് ഇതിന് കാരണം. ക്രിസ്തുമസിന് ഇനിയും ദിവസങ്ങള്‍ ശേഷിക്കെ വിപണിയും കച്ചവടവും കൂടുതല്‍ സജീവമാകുമെന്നാണ് പ്രതീക്ഷിക്കുന്നത്.