സാമൂഹ്യക്ഷേമ പദ്ധതികള്‍ക്ക് ആധാര്‍; സമയപരിധി ഡിസംബര്‍ 31 വരെ നീട്ടി
സാമൂഹ്യക്ഷേമ പദ്ധതികള്‍ക്ക് ആധാര്‍ നിര്‍ബന്ധമാക്കാനുള്ള സമയപരിധി നീട്ടി. സെപ്തംബര്‍ 30ല്‍ നിന്ന് ഡിസംബര്‍ 31 വരെയാണ് സമയപരിധി നീട്ടിയത്. സമയമുണ്ടെന്ന് കേന്ദ്രസര്‍ക്കാര്‍ സുപ്രീംകോടതിയെ അറിയിച്ചു. ആധാര്‍ കേസ് നവംബര്‍ ആദ്യവാരം സുപ്രീംകോടതി പരിഗണിക്കും.
വിവിധ സാമൂഹ്യക്ഷേമ പദ്ധതികള്‍ക്ക് ആധാര്‍ നിര്‍ബന്ധമാക്കാനുള്ള നീക്കത്തിനെതിരെ ഇടക്കാല ഉത്തരവ് പുറപ്പെടുവിക്കാന്‍ സുപ്രീം കോടതി വിസമ്മതിച്ചിരുന്നു. ആധാര്‍ ഇല്ലാത്തിന്റെ പേരില്‍ ക്ഷേമപദ്ധതികളുടെ പ്രയോജനം നിഷേധിക്കപ്പെട്ടത് ആര്‍ക്കാണെന്ന് വ്യക്തമാകാതെ ഇടക്കാല ഉത്തരവ് പുറപ്പെടുവിക്കാന്‍ കഴിയില്ലെന്നായിരുന്നു സുപ്രീം കോടതി ബഞ്ച് വ്യക്തമാക്കിയത്.
ആധാര്‍ നിര്‍ബന്ധമാക്കാനുള്ള നീക്കം സ്‌കൂള്‍ ഉച്ചഭക്ഷണ പരിപാടി അടക്കമുള്ളവ കുട്ടികള്‍ക്ക് നിഷേധിക്കപ്പെടാന്‍ ഇടയാക്കുമെന്ന് ഹര്‍ജിക്കാര്‍ക്കുവേണ്ടി ഹാജരായ മുതിര്‍ന്ന അഭിഭാഷകന്‍ ശ്യാം ദിവാന്‍ വാദിച്ചു. എന്നാല്‍ വോട്ടര്‍ ഐ.ഡി. പാന്‍ കാര്‍ഡ്, ഡ്രൈവിങ് ലൈസന്‍സ് എന്നിവ ആധാറിന് പകരം ക്ഷേമ പദ്ധതികള്‍ക്ക് ഉപയോഗിക്കാന്‍ അനുമതി നല്‍കിയിട്ടുണ്ടെന്ന് അഡീഷണല്‍ സോളിസിറ്റര്‍ ജനറല്‍ തുഷാര്‍ മേത്ത കോടതിയെ അറിയിച്ചു.
https://www.facebook.com/Malayalivartha
