കഴിഞ്ഞ ദിവസത്തെ നഷ്ടം ഇന്ന് നികത്തി ഓഹരി വിപണിയില്‍ മുന്നേറ്റം. വാഹനം, ഐടി, ഫാര്‍മ, ലോഹം എന്നീ ഓഹരികളുടെ ഇന്നും കരുത്ത് കാട്ടി. ഇതിന്റെ അടിസ്ഥാനത്തില്‍ നിഫ്റ്റി 11,300ല്‍വീണ്ടുമെത്തി. 558.22 പോയന്റാണ് സെന്‍സെക്‌സിലെ നേട്ടം. 1.47ശതമാനമുയര്‍ന്ന് 38,492.95ലാണ് വ്യാപാരം അവസാനിപ്പിച്ചത്. നിഫ്റ്റിയാകട്ടെ 168.70 പോയന്റ് ഉയര്‍ന്ന് 11,300.50ലും. ബിഎസ്ഇയിലെ 1315 കമ്പനികളുടെ ഓഹരികള്‍ നേട്ടത്തിലും 1300 ഓഹരികള്‍ നഷ്ടത്തിലുമായിരുന്നു. 151 ഓഹരികള്‍ക്ക് മാറ്റമില്ലാതെ തുടരുകയാണ്. ഇതും ഓഹരി വിപണിക്ക് നേട്ടമായി.

അള്‍ട്രടെക് സിമെന്റ്, കൊട്ടക് മഹീന്ദ്ര ബാങ്ക്, ടാറ്റ മോട്ടോഴ്‌സ്, ടിസിഎസ്, ഗ്രാസിം ഇന്‍ഡസ്ട്രീസ് തുടങ്ങിയ ഓഹരികളാണ് പ്രധാനമായും നേട്ടമുണ്ടാക്കിയത്. ഭാരതി ഇന്‍ഫ്രടെല്‍, ഐസിഐസിഐ ബാങ്ക്, ഒഎന്‍ജിസി, നെസ് ലെ, ഏഷ്യന്‍ പെയിന്റ്‌സ് തുടങ്ങിയ ഓഹരികള്‍ നഷ്ടത്തിലുമായിരുന്നു. എല്ലാവിഭാഗം സൂചികകളും നേട്ടമുണ്ടാക്കി. ബിഎസ്ഇ മിഡക്യാപ്, സ്‌മോള്‍ ക്യാപ് സചികകള്‍ ഒരുശതമാനത്തിനുതാഴെ ഉയര്‍ന്നു. പ്രതീക്ഷിച്ചതിലും മികച്ച പ്രവര്‍ത്തനഫലങ്ങള്‍ പുറത്തുവിട്ടതാണ് ചില ഓഹരികളുടെ പ്രകടനത്തിനുപിന്നില്‍. നടക്കാനിരിക്കുന്ന യുഎസ് ഫെഡ് റിസര്‍വ് യോഗത്തില്‍ പ്രതീക്ഷയര്‍പ്പിച്ച് ആഗോള സൂചികകള്‍ നേട്ടത്തിലാണ്. അതും ആഭ്യന്തര സൂചികകള്‍ക്ക് കരുത്തേകി.

ഇതിനിടെ സ്വര്‍ണവില പവന് 40,000 എത്താന്‍ ഇനി 800 രൂപയുടെ അകലം മാത്രം. റെക്കോര്‍ഡുകള്‍ ഭേദിച്ച് അനുദിനം വില കുതിക്കുന്നതിനാല്‍ 40,000 രൂപയെന്ന നിര്‍ണായക നിലവാരം ഈ ആഴ്ച തന്നെ മറികടക്കാനാണു സാധ്യത. ഇന്ന് പവന് 600 രൂപയും ഗ്രാമിന് 75 രൂപയും ഉയര്‍ന്നു. ഒരു ഗ്രാമിന്റെ വില ഇതോടെ 4900 രൂപയായി. കഴിഞ്ഞ ഒരാഴ്ചകൊണ്ട് 2200 രൂപയാണ് ഉയര്‍ന്നത്. രാജ്യാന്തര വിപണിയിലുണ്ടാകുന്ന വിലക്കയറ്റമാണ് കേരളത്തിലും പ്രതിഫലിക്കുന്നത്. ദേശീയ ബുള്യന്‍ വിപണിയില്‍ 10 ഗ്രാമിന്റെ വില 52,000 രൂപയായി. രാജ്യാന്തര തലത്തില്‍ ഡിമാന്‍ഡ് ഉയരുന്നതിനാല്‍ വില ഇനിയും ഉയര്‍ന്നേക്കാം.