സ്ത്രീധനത്തെ പിന്തുണയ്‌ക്കില്ലെന്ന സത്യവാങ്മൂലം വിദ്യാര്‍ത്ഥികളില്‍ നിന്നും എഴുതി വാങ്ങി കാലിക്കറ്റ് സര്‍വകലാശാല
സ്ത്രീധനത്തെ പിന്തുണയ്‌ക്കില്ലെന്ന സത്യവാങ്മൂലം വിദ്യാര്‍ത്ഥികളില്‍ നിന്നും എഴുതി വാങ്ങി കാലിക്കറ്റ് സര്‍വകലാശാല. ബിരുദ സര്‍ട്ടിഫിക്കറ്റുകള്‍ കൈപ്പറ്റുന്നതിന് മുമ്ബായാണ് സ്ത്രീധന വിരുദ്ധ സത്യവാങ്മൂലത്തില്‍ വിദ്യാര്‍ത്ഥികള്‍ ഒപ്പുവച്ചത്. സത്യവാങ്മൂലത്തിന് വിരുദ്ധമായുള്ള പ്രവര്‍ത്തനങ്ങള്‍ ബിരുദ സര്‍ട്ടിഫിക്കറ്റ് റദ്ദാക്കുന്നതിലേക്ക് നയിക്കുമെന്നാണ് നിയമം.
സര്‍വകലാശാല ചാന്‍സലര്‍ കൂടിയായ ഗവര്‍ണര്‍ ആരിഫ് മുഹമ്മദ് ഖാന്റെ നിര്‍ദേശ പ്രകാരമാണ് കാലിക്കറ്റ് യൂണിവേഴ്‌സിറ്റിയില്‍ സത്യവാങ്മൂലം നിര്‍ബന്ധമാക്കിയത്. കഴിഞ്ഞയാഴ്ച കേരള സര്‍വകലാശാല ഫിഷറീസ് ആന്റ് ഓഷ്യന്‍സ് സയന്‍സിലെ ബിരുദ സര്‍ട്ടിഫിക്കറ്റുകള്‍ സ്വീകരിക്കാനെത്തിയ 386 വിദ്യാര്‍ത്ഥികളും ഇത്തരത്തില്‍ സ്ത്രീധന വിരുദ്ധ സത്യവാങ്മൂലത്തില്‍ ഒപ്പുവച്ചിരുന്നു.
സംസ്ഥാനത്തെ സ്ത്രീധന പീഡനങ്ങളുടെയും മരണങ്ങളുടെയും പശ്ചാത്തലത്തിലായിരുന്നു ഗവര്‍ണര്‍ സ്ത്രീധന വിരുദ്ധ സത്യവാങ്മൂലമെന്ന ചിന്ത മുന്നോട്ടുവച്ചത്. കൊല്ലത്തെ വിസ്മയയുടെ മരണത്തിന് പിന്നാലെയായിരുന്നു ഗവര്‍ണറുടെ നടപടി.
https://www.facebook.com/Malayalivartha
