കനേഡിയന്‍ സർക്കാർ കുറഞ്ഞ വേതന നിരക്ക്  പുതുക്കി പുതിയ നിയമനിർദ്ദേശം കൊണ്ടുവന്നിരിക്കുന്നു. ജീവിതച്ചിലവ് വർധിക്കുന്ന സാഹചര്യത്തില്‍ ആണ് പുതുക്കിയ മിനിമം വേതന നിരക്ക് പ്രഖ്യാപിച്ചിരിക്കുന്നത് .

ഓരോ വർഷവും കനേഡിയന്‍ സർക്കർ കുറഞ്ഞ വേതന നിരക്കില്‍ വർധനവ് വരുത്താറുണ്ട്. ഏറ്റവും പുതിയ കണക്ക് അനുസരിച്ച് രാജ്യത്ത് ആകെ മിനിമം വേതനം 2024 ഏപ്രിൽ 1 മുതൽ മണിക്കൂറിന് 16.65 ഡോളറില്‍ നിന്ന് 17.30 ഡോളറായി വർദ്ധിപ്പിക്കും. അതായത് ഇന്ത്യന്‍ രൂപയില്‍ കണക്കാക്കുമ്പോള്‍ 1386 ആയിരുന്ന മിനിമം വേതനം ഇനി മുതല്‍ 1441 രൂപയായി ഉയരും.

 
കാനഡയുടെ 2023-ലെ വാർഷിക ശരാശരി ഉപഭോക്തൃ വില സൂചികയില്‍ 3.9% വർധനവായിരുന്നു രേഖപ്പെടുത്തിയത്. ഈ സാഹചര്യത്തിലാണ് ശമ്പളത്തിലും വർധനവ് വരുത്തിയിരിക്കുന്നത്. ഒരു തൊഴിലുടമ നിയമപരമായി ജീവനക്കാർക്ക് നൽകേണ്ട ഏറ്റവും കുറഞ്ഞ വേതനമാണ് മിനിമം വേതനം. ഓരോ പ്രവിശ്യകള്‍ക്ക് അനുസരിച്ച് മിനിമം വേതന നിരക്കിലും വ്യത്യാസങ്ങളുണ്ട്.

ഉദാഹരണത്തിന് നോവ സ്കോട്ടിയയിൽ  2024 ഏപ്രിൽ 1 മുതൽ പുതിയ നിരക്ക് പ്രാബല്യത്തിൽ വരും. കുറഞ്ഞ വേതന നിരക്ക് നാണയപ്പെരുപ്പത്തിനൊപ്പം പ്രതിവർഷം 1% അധികമായി, അതായത് 15.20 ഡോളറായി ആയി ക്രമീകരിക്കും.

ബ്രിട്ടീഷ് കൊളംബിയയിൽ ബ്രിട്ടീഷ് കൊളംബിയയിലെ മിനിമം വേതനം 2024 ജൂൺ 1-ന് 16.75 ഡോളറിൽ നിന്ന് 17.40 ഡോളറായി ഉയർത്തും. ക്യൂബെക്കിൽ  2024 മെയ് 1- മുതല്‍  മിനിമം വേതനം 15.75 ഡോളറായി ആയി വർദ്ധിക്കും. ന്യൂഫൗണ്ട്‌ലാൻഡ് ലാബ്രഡോർ പ്രവിശ്യകളിൽ  15.60 ഡോളർ, പ്രിൻസ് എഡ്വേർഡ് ദ്വീപ് - 15.40 ഡോളർ, യുക്കോൺ - 17.59 എന്നിങ്ങനെയായിരിക്കും ഇനിയുള്ള കുറഞ്ഞ വേതനം.

ഫെഡറൽ നിയന്ത്രിത സ്വകാര്യമേഖലയിലെ ഏകദേശം 30,000 ജീവനക്കാർക്ക് ഈ വർദ്ധനവ് പ്രയോജനപ്പെടും. 2024 ഏപ്രിൽ 1 മുതൽ എല്ലാ ജീവനക്കാർക്കും കൃത്യമായ മണിക്കൂർ വേതനം ലഭിക്കുന്നുണ്ടെന്ന് ഉറപ്പാക്കാൻ തൊഴിലുടമകൾ അവരുടെ ശമ്പള വിവരങ്ങൾ സർക്കാറിന് കൈമാറേണ്ടി വരും.  

കാനഡ ഗവണ്‍മെന്റ് 2021 ലാണ് ഫെഡറല്‍ മിനിമം വേതനം അവതരിപ്പിച്ചത്. മുന്‍ കലണ്ടര്‍ വര്‍ഷത്തിലെ കാനഡയുടെ വാര്‍ഷിക ശരാശരി ഉപഭോക്തൃ വില സൂചികയെ അടിസ്ഥാനമാക്കിയാണ് ഇത് വര്‍ഷം തോറും ക്രമീകരിക്കുന്നത്. 2022ല്‍ ഫെഡറല്‍ മിനിമം വേതനം 15.55 ഡോളറായും 2023ല്‍ അത് 16.65 ഡോളറായും ഉയര്‍ത്തിയിരുന്നു.

അതേസമയം വിദേശ വിദ്യാര്‍ത്ഥികള്‍ക്ക് കാനഡയില്‍ പരിധിയില്ലാതെ ജോലി ചെയ്യാന്‍ അനുവദിക്കുന്ന വര്‍ക്ക് പെര്‍മിറ്റ് നിയമം 2024 ഏപ്രില്‍ 30 നു അവസാനിക്കും . കഴിഞ്ഞ വര്‍ഷം നവംബറിലാണ് വിദേശ വിദ്യാര്‍ത്ഥികള്‍ക്ക് കാമ്പസിന് പുറത്ത് ആഴ്ചയില്‍ 20 മണിക്കൂറില്‍ കൂടുതല്‍ ജോലി ചെയ്യാന്‍ അനുവദിച്ചുകൊണ്ടുള്ള ഉത്തരവിറങ്ങിയത്.