കണ്ണൂര്‍ സര്‍വകലാശാലയില്‍ 172 തസ്തികകള്‍ ഉടന്‍ അനുവദിക്കുമെന്ന് മന്ത്രി സി.രവീന്ദ്രനാഥ് ടി.വി.രാജേഷിന്റെ സബ്മിഷന് മറുപടിയായി നിയമസഭയെ അറിയിച്ചു. പ്രൊഫസര്‍ 10, അസോസിയറ്റ് പ്രൊഫസര്‍ 22, അസി.പ്രൊഫസര്‍ 40 എന്നിങ്ങനെ തസ്തികകള്‍ അനുവദിക്കാനുള്ള ശുപാര്‍ശ ധനവകുപ്പ് പരിശോധിക്കുകയാണ്. 100 അനദ്ധ്യാപക തസ്തിക സൃഷ്ടിക്കുന്നത് ധനവകുപ്പ് അംഗീകരിച്ചു.
മന്ത്രിസഭ ഉടന്‍ ഇത് സംബന്ധിച്ച് തീരുമാനമെടുക്കും.

തസ്തിക സൃഷ്ടിച്ചിട്ടില്ലാത്ത എയ്ഡഡ് കോളേജുകളില്‍ ജോലിഭാരം നിര്‍ണയിച്ച് ഗസ്റ്റ് അദ്ധ്യാപകരെ നിയമിക്കാന്‍ അനുമതി നല്‍കിയിട്ടുണ്ടെന്ന് പി.കെ.ബഷീറിനെ മന്ത്രി അറിയിച്ചു. ഇവര്‍രുടെ ശമ്പളം പ്രതിദിനം 1470രൂപയാക്കി വര്‍ദ്ധിപ്പിച്ചിട്ടുണ്ടെന്നും മന്ത്രി അറിയിച്ചു. തൃശൂര്‍ കുറ്റിപ്പുറം നാലുവരിപ്പാതയാക്കുന്നതിന്റെ ഭാഗമായി തൃശൂരിലെ 26സര്‍വേ നമ്പറുകളില്‍പെട്ട 1.09ഹെക്ടര്‍ ഭൂമി ഡയറക്ട് പര്‍ച്ചേസിലൂടെ ഏറ്റെടുക്കാന്‍ അനുമതി നല്‍കിയതായും അടിസ്ഥാനവില നിശ്ചയിച്ചതായും മന്ത്രി ഇ.ചന്ദ്രശേഖരന്‍ അറിയിച്ചു.

കേന്ദ്രമാനദണ്ഡപ്രകാരം സംസ്ഥാനത്തെ ഒരു പ്രദേശവും വരള്‍ച്ചാബാധിതമായി പ്രഖ്യാപിക്കാന്‍ സാധിക്കില്ല. വയനാട്ടില്‍ ലഭിക്കേണ്ട മഴയില്‍ ശരാശരി 37ശതമാനം കുറവുണ്ട്. മിക്കജില്ലകളിലും മഴ കുറവാണ്. കുടിവെള്ളക്ഷാമം രൂക്ഷമാവാനിടയുള്ള പ്രദേശങ്ങള്‍ കണ്ടെത്തി റിപ്പോര്‍ട്ട് നല്‍കാന്‍ ജില്ലാകളക്ടര്‍മാര്‍ക്ക് നിര്‍ദ്ദേശം നല്‍കിയിട്ടുണ്ട്. പൈപ്പ് ലൈന്‍ സ്ഥാപിക്കാന്‍ ദുരന്തപ്രതികരണ നിധി ഫണ്ടുപയോഗിക്കാനാവില്ല. കുടിവെള്ളക്ഷാമം നേരിടാന്‍ എല്ലാ നടപടിയുമെടുക്കുമെന്നും മന്ത്രി പറഞ്ഞു.

എസ്.ഐമാരുടെ 131ഒഴിവുകള്‍ പി.എസ്.സിക്ക് റിപ്പോര്‍ട്ട് ചെയ്യാമെന്ന് പൊലീസ് മേധാവി അറിയിച്ചിട്ടുണ്ടെന്നും ഇക്കാര്യത്തില്‍ കൂടുതല്‍ പരിശോധന വേണ്ടിവരുമെന്നും എം.സ്വരാജിനെ മുഖ്യമന്ത്രി പിണറായി വിജയന്‍ അറിയിച്ചു. അഡ്മിനിസ്‌ട്രേറ്റീവ് െ്രെടബ്യൂണലിന്റെ ഉത്തരവ് പ്രകാരം എസ്.ഐമാരുടെ 50ശതമാനം നിയമനം നേരിട്ട് നടത്തണം.

137സൂപ്പര്‍ന്യൂമററി തസ്തിക സൃഷ്ടിച്ചത് െ്രെടബ്യൂണല്‍ റദ്ദാക്കി. 490 എ.എസ്.ഐമാരെ എസ്.ഐയാക്കിയതിനാലും 128 ഗ്രേഡ് എസ്.ഐമാരെ സിവില്‍ പൊലീസിലേക്ക് മാറ്റിയതിനാലും എസ്.ഐമാരുടെ എണ്ണത്തില്‍ വര്‍ദ്ധനവുണ്ടായി.