ബഹിരാകാശ ചരിത്രത്തില്‍ ചൈന മറ്റൊരു വന്‍ നേട്ടം സ്വന്തമാക്കി. കടലില്‍ നിന്നും റോക്കറ്റ് വിക്ഷേപിച്ചാണ് ചൈന ചരിത്രനേട്ടം കുറിച്ചത്. കടലില്‍ നങ്കൂരമിട്ട വന്‍ കപ്പലില്‍ നിന്നാണ് ലോങ് മാര്‍ച്ച്-11 എന്ന റോക്കറ്റ് വിക്ഷേപിച്ചത്. ബഹിരാകാശ ലോകത്തെ ആദ്യ സംഭവമാണിത്. കടലിലൂടെ സഞ്ചരിക്കുന്ന ലോഞ്ചിങ് പാഡില്‍ നിന്നും ബഹിരാകാശത്തേക്ക് റോക്കറ്റ് വിക്ഷേപിക്കാമെന്ന് തെളിയിക്കുന്നതായിരുന്നു ചൈനയുടെ ദൗത്യം.

ലോങ് മാര്‍ച്ച് റോക്കറ്റിന് ഒന്നിലധികം ഉപഗ്രഹങ്ങളെയും മറ്റു പേടകങ്ങളെയും ലക്ഷ്യത്തിലെത്തിക്കാന്‍ ശേഷിയുണ്ട്. ഇതേ റോക്കറ്റ് ഉപയോഗിച്ച് നേരത്തെ 305 വിക്ഷേപണങ്ങള്‍ ചൈന നടത്തിയിട്ടുണ്ട്. ചൈനയുടെ തന്നെ ബൂഫെങ്-1 എ, ബൂഫെങ്-1 ബി എന്നിവ ഉള്‍പ്പടെ ഏഴു സാറ്റലൈറ്റുകളാണ് വിക്ഷേപിച്ചത്.

കാറ്റുകളുടെ ഗതിനിര്‍ണയത്തിനും വന്‍ ചുഴലിക്കാറ്റുകളുടെ നിരീക്ഷണത്തിനും ലക്ഷ്യമിട്ടാണ് ബൂഫെങ് സാറ്റലൈറ്റുകള്‍ വിക്ഷേപിച്ചത്. ചൈനീസ് അക്കാദമി ഓഫ് സ്‌പേസ് ഫ്‌ലൈറ്റ് ടെക്‌നോളജിയാണ് രണ്ടു സാറ്റലൈറ്റുകളും നിര്‍മിച്ചത്. കഴിഞ്ഞ കുറച്ചു വര്‍ഷങ്ങളായി ബഹിരാകാശ രംഗത്ത് ചൈനീസ് ഗവേഷകര്‍ വന്‍ പരീക്ഷണങ്ങളും നിരീക്ഷണങ്ങളുമാണ് നടത്തുന്നത്. ഇതിനായി വന്‍ തുകയാണ് ചൈനീസ് സര്‍ക്കാരും നിക്ഷേപിക്കുന്നത്.