സിനിമ ലോകത്തെ ലീലാവിലാസങ്ങളുടെ ചുരുളഴിയുന്ന കാലമാണിതെന്ന് പറയേണ്ടിവരും ഇപ്പോള്‍ പുറത്തുവരുന്ന സംഭവങ്ങള്‍ അറിയുമ്പോള്‍. ഇപ്പോള്‍ പുറത്തുവന്നിരിക്കുന്നത് സംഗീതലോകത്തെ വിക്രിയകളാണ്. പുസ്സിക്യാറ്റ് ഡോള്‍സ് എന്ന സംഗീത ബാന്‍ഡിനേക്കുറിച്ച് ഗുരുതര ആരോപണങ്ങളുമായി മുന്‍അംഗവും ഗായികയുമായ കായ ജോണ്‍സാണ് രംഗത്തെത്തിയിരിക്കുന്നത്. അതൊരു സംഗീത ബാന്‍ഡ് അല്ല സെക്‌സ് റാക്കറ്റ് ആണെന്നായിരുന്നു കായ ജോണ്‍സിന്റെ ആരോപണം.

താന്‍ അംഗമായിരുന്ന പുസ്സിക്യാറ്റ് ഡോള്‍സ് ഒരു സംഗീത ബാന്‍ഡല്ല സെക്‌സ് റാക്കറ്റ് ആയിരുന്നെന്നായിരുന്നു കായയുടെ ആരോപണം. ബാന്‍ഡിലെ അംഗങ്ങള്‍ വ്യാപകമായി ലൈംഗീക ചൂഷണത്തിന് ഇരയായി. ട്രൂപ്പില്‍ തുടരണമെങ്കില്‍ പുരുഷന്മാര്‍ക്കൊപ്പം അന്തിയുറങ്ങണമെന്നും കായ ട്വിറ്ററിലൂടെ വെളിപ്പെടുത്തി. 2003ല്‍ ട്രൂപ്പില്‍ ചേര്‍ന്ന കായ ജോണ്‍സ് രണ്ട് വര്‍ഷത്തിന് ശേഷം ട്രൂപ്പ് വിട്ടു. താന്‍ ട്രൂപ്പില്‍ നിന്ന് പോകാന്‍ കാരണം ലൈംഗീക ചൂഷണമാണെന്നും കായ വെളിപ്പെടുത്തുന്നു. ഹാര്‍വി വെയ്ന്‍സ്റ്റീനെതിരായ പരാതികളുടെ വെളിച്ചത്തിലാണ് കായയുടെ പുതിയ വെളിപ്പെടത്തിലുകളും ശ്രദ്ധിക്കപ്പെടുന്നത്.

13 ദശലക്ഷം ഡോളറിന്റെ കരാറൊക്കെ ലഭിച്ച് തങ്ങള്‍ ഒന്നാം സ്ഥാനത്തേക്ക് കുതിക്കുന്ന സമയത്തായിരുന്നു കായ ട്രൂപ്പില്‍ നിന്നു പിന്മാറിയത്. സ്വപ്‌നത്തില്‍ നിന്നും നടന്നകന്നു എന്നാണ് കായ തന്റെ പിന്മാറ്റത്തെ വിശേഷിപ്പിക്കുന്നത്. അത് എത്രമാത്രം മോശമാണെന്ന് ഊഹിക്കാവുന്നതേയുള്ളു എന്നു കായ പറയുന്നു.
ഒരു ടീമിന്റെ ഭാഗമാകണമെങ്കില്‍ നമ്മള്‍ ടീമംഗമാകണം. അവര്‍ ആവശ്യപ്പെടുന്നവര്‍ക്കൊപ്പം അന്തിയുറങ്ങണം. അതിന് തയാറായില്ലെങ്കില്‍ സമ്മര്‍ദത്തിലാക്കും. അത് പെണ്‍കുട്ടികളുടെ ഒരു സംഘമായിരുന്നില്ല. ഒന്നാന്തരമൊരു സെക്‌സ് റാക്കറ്റ് ആയിരുന്നെന്നും കായ വെളിപ്പെടുത്തുന്നു. തങ്ങള്‍ പാട്ടുപാടി പ്രശസ്തരായപ്പോള്‍ ഉടമകള്‍ കാശ് വാരി.

ബാന്‍ഡിന്റെ ഉടമകള്‍ കുമ്പസരിക്കണം. ബാന്‍ഡിലെ അംഗമായ ഒരു പെണ്‍കുട്ടി ആത്മഹത്യ ചെയ്തത് എന്തിനാണെന്ന് വെളിപ്പെടുത്തണം. തങ്ങളെ എങ്ങനെ മാനസീകമായി തകര്‍ത്തുവെന്ന് ജനങ്ങളോട് പറയണമെന്നു കായ ആവശ്യപ്പെടുന്നു. അവര്‍ ആദ്യം നമ്മളെ വശീകരിക്കും. പിന്നെ മയക്കുമരുന്നിന്റേയോ മറ്റോ കെണിയിലാക്കും.

എന്നിട്ട് അത് നമുക്കെതിരെ ഉപയോഗിക്കും. ഇരയെ വീണ്ടും വേട്ടയാടുന്നത് പോലെയായിരുന്നു അത്. എല്ലാവരു ഭീഷണിയുടെ നിഴലിലായിരുന്നു. ആര്‍ക്കും പരാതിപ്പെടാനുള്ള സാഹചര്യം ഉണ്ടായിരുന്നില്ലെന്നും കായ വെളിപ്പെടുത്തുന്നു. തങ്ങള്‍ നേരിടുന്ന പീഡനങ്ങള്‍ പുറത്ത് പറഞ്ഞാല്‍ കൊന്ന് കളയുമെന്ന് തന്നേയും ഭീഷണിപ്പെടുത്തിയിട്ടുണ്ട്. ഒന്നുകില്‍ മരണം, അല്ലെങ്കില്‍ കരിയറിന്റെ അവസാനം. ഇത് മാത്രമായിരുന്നു തങ്ങള്‍ക്ക് മുമ്പിലുണ്ടായിരുന്നതെന്ന് ട്വീറ്റുകളുടെ പരമ്പരയില്‍ കായ ജോണ്‍സ് വെളിപ്പെടുത്തുന്നു.