വിദ്യാര്ത്ഥികള്ക്ക് ക്ലാസെടുക്കാന് ലാല് എത്തുന്നു
വിദ്യാര്ത്ഥികളെ പഠിപ്പിക്കാന് ഇനി മന്ത്രി ഡോ.എം.കെ മുനീറും മലയാളത്തിന്റെ പ്രിയനടന് മോഹന്ലാലും. വിദ്യാഭ്യാസ മേഖലയില് ഇന്ത്യയില് ആദ്യമായി കേരളം നടപ്പിലാക്കിയ ഡിജിറ്റല് കൊളാബറേറ്റീവ് ടെക്സ്റ്റ് ബുക്കിലാണ് മുനീറും മോഹന്ലാലും ഉള്പ്പെടെയുള്ള പ്രശസ്തര് വിവിധ വിഷയങ്ങള് പഠിപ്പിക്കാനെത്തുന്നത്. പത്താംക്ലാസിലെ ജീവശാസ്ത്രം പാഠപുസ്തകത്തില് പ്രതിപാദിക്കുന്ന പ്രമേഹ രോഗത്തെ കുറിച്ചുള്ള വിശദീകരണം ആവശ്യപ്പെടുന്ന വിദ്യാര്ത്ഥിക്ക് മുന്നില് ഡിജിറ്റല് സ്ക്രീനില് മന്ത്രി മുനീര് എത്തും.
എന്താണ് പ്രമേഹം, എങ്ങനെ തടയാം, എന്തൊക്കെയാണ് ശ്രദ്ധിക്കേണ്ട കാര്യങ്ങള്.. എന്നിങ്ങനെ ഡോക്ടര് കൂടിയായ മന്ത്രി വിശദീകരിക്കും. തന്മാത്ര സിനിമയില് അള്ഷിമേഴ്സ് രോഗം ബാധിച്ചയാളായി അഭിനയിച്ച് വിസ്മയിപ്പിച്ച മോഹന്ലാല് ഡിജിറ്റല് ടെക്സ്റ്റില് അള്ഷിമേഴ്സിനെ കുറിച്ചുതന്നെയാണ് പഠിപ്പിക്കുന്നത്.
ചന്ദ്രനെയും ചന്ദ്രയാനെയും കുറിച്ച് വിശദീകരിക്കുന്നത് ഐ.എസ്.ആര്.ആ മുന് ചെയര്മാന് ഡോ. മാധവന്നായരാണ്. മന്ത്രി ആര്യാടന് മുഹമ്മദ്, ഡോ.അച്യുത് ശങ്കര് എസ് നായര്, ഡോ. ബി. ഇക്ബാല് എന്നിവര് ജീവശാസ്ത്ര പാഠഭാഗങ്ങള് വിശദീകരിക്കും. ഐ.എ.എസുകാരായ നളിനി നെറ്റോ, എ.പി.എം മുഹമ്മദ് ഹനീഷ്, എം. ശിവശങ്കര് എന്നിവരും ഡി.സി.ടിയുടെ ഭാഗമാകുന്നു.
ആനന്ദകൃഷ്ണന് ഐ.പി.എസും വിവിധ മേഖലകളിലെ വിദഗ്ധരും വിദ്യാര്ത്ഥികള്ക്ക് മനസിലാകുന്ന വിധം ലളിതമായി ഓരോ വിഷയത്തെ കുറിച്ചും വിശദീകരണം നല്കും. മനുഷ്യ ശരീരത്തിലെ കണ്ണ്, കരള്, ഹൃദയം തുടങ്ങിയവയുടെ പ്രവര്ത്തനം വിശദീകരിക്കുന്നതിന് പ്രശസ്തരായ ഡോക്ടര്മാരാണ് എത്തുന്നത്. പാരമ്പര്യ കൃഷിരീതികളെ കുറിച്ച് പാരമ്പര്യ കര്ഷകര് തന്നെ പഠിപ്പിക്കും. നെല്വിത്തുകളെ കുറിച്ച് വിശദീകരിക്കുന്നതാകട്ടെ കാര്ഷിക മേഖലയിലെ വിദഗ്ധരും.
സ്കൂള് വിദ്യാഭ്യാസ രംഗത്ത് വിവരവിനിമയ സാങ്കേതിക വിദ്യയുടെ സാധ്യതകള് പ്രയോജനപ്പെടുത്തിക്കൊണ്ട് കാതലായ മാറ്റങ്ങള്ക്ക് വഴിയൊരുക്കുന്നതാണ് ഡിജിറ്റല് കൊളാബറേറ്റീവ് ടെക്സ്റ്റ് ബുക്ക്. ഈ പാഠ്യപദ്ധതിയില് ഏറ്റവും ശ്രദ്ധേയമാകുന്നത് വിവിധ മേഖലകളിലെ പ്രമുഖര് വിദ്യാര്ത്ഥികള്ക്ക് നേരിട്ട് അറിവ് പകരാനെത്തുന്നു എന്നതാണ്.
പാഠപുസ്തകത്തിലുള്ള ഭാഗങ്ങള്ക്ക് കൂടുതല് ആശയ വ്യക്തത ആവശ്യമെന്ന് തോന്നിയാല് ആവശ്യമുള്ള ഭാഗങ്ങളിലെ ഹാര്ഡ്സ്പോര്ട്ടുകളായി രേഖപ്പെടുത്തിയിട്ടുണ്ട്. കൂടുതല് അറിയേണ്ട ഭാഗത്ത് ക്ലിക്ക് ചെയ്യുമ്പോള് അതത് മേഖലകളിലെ വിദഗ്ധര് സ്ക്രീനിലെത്തി വിശദീകരണം നല്കും.
വീഡിയോ ദൃശ്യങ്ങളിലൂടെ പഠിക്കുന്നത് കുട്ടികള്ക്ക് വേഗത്തില് മനസിലാക്കാന് സാധിക്കും. ഇത്തരത്തില് പ്രശസ്തരായ വ്യക്തികളില് നിന്ന് കണ്ടും കേട്ടും പഠിക്കുന്നത് മറന്നുപോകില്ലെന്നും വിദഗ്ധര് പറയുന്നു. അഗളി, അട്ടപ്പാടി പോലുള്ള സ്ഥലങ്ങളില് പോലും കുട്ടികള്ക്ക് ഈ വീഡിയോ കണ്ടന്റുകള് എത്തിക്കാന് സംവിധാനം ഒരുക്കിയിട്ടുണ്ട്. പുതിയ അധ്യയന വര്ഷം ആരംഭിക്കാന് ഒരാഴ്ച മാത്രം ബാക്കിനില്ക്കെ കുട്ടികളെ കാത്തിരിക്കുന്നത് പുതിയ അനുഭവമായിരിക്കുമെന്ന് ഡിജിറ്റല് കൊളാബറേറ്റീവ് ടെക്സ്റ്റ് തയാറാക്കിയ ഐ.ടി അറ്റ് സ്കൂളിന്റെ ഐ.ടി അറ്റ് സ്കൂള് പ്രോജക്ട് എക്സിക്യുട്ടീവ് ഡയറക്ടര് കെ.പി നൗഫല് പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha