നടൻ ബാബു ആന്റണിയുടെ ശബ്ദത്തിൽ ആരാധകനെയും കുടുംബത്തെയും പറ്റിച്ച് അജ്ഞാതൻ. തന്റെ ശബ്ദം അനുകരിച്ച് പറ്റിക്കാൻ വിളിക്കുന്നവർക്ക് മുന്നറിയിപ്പുമായി താരം തന്നെ രംഗത്തെത്തി. മിമിക്രി കലാകാരന്മാർ അനുകരിക്കുന്ന ശബ്ദത്തിൽ നിന്ന് തികച്ചും വ്യത്യസ്തമാണ് തന്‍റെ ശബ്ദമെന്നും നടൻ ഫേസ്ബുക്കിൽ കുറിച്ചു. അത്തരത്തിൽ വഞ്ചിതരായ ഒരു കുടുംബം തനിക്കയച്ച മെയിലിന്‍റെ സ്ക്രീൻഷോട്ട് പങ്കുവച്ചുകൊണ്ടാണ് നടന്‍റെ കുറിപ്പ്.

ഫേസ്ബുക്കിൽ നിന്നാണ് ആരാധകനായ അച്ഛന് ബാബു ആന്റണിയുടെ നമ്പർ ലഭിച്ചതെന്ന് ഈമെയിലിൽ പറയുന്നു. കഴിഞ്ഞ രണ്ടു വർഷമായി ബാബു ആന്റണി ആണെന്നു പറഞ്ഞു പറ്റിക്കുകയാണ്. ഫോൺ വിളിച്ചെങ്കിലും എടുത്തില്ല. തുടർന്ന് വാട്സ്ആപ്പിൽ മെസേജ് അയച്ചു. റിപ്ലേ ലഭിച്ചു. കാണാനുള്ള താൽപ്പര്യം പറഞ്ഞപ്പോൾ പൊൻകുന്നം വരാൻ പറഞ്ഞു. മണിക്കൂറുകളോളം അവിടെ കാത്തു നിന്നിട്ടും വരാതെയിരുന്നതോടെയാണ് വഞ്ചിക്കപ്പെട്ടതായി തിരിച്ചറിഞ്ഞത്. തുടർന്നാണ് താരത്തിന്റെ മെയിൽ ഐഡി കണ്ടെത്തി ബന്ധപ്പെട്ട് ഈ വിവരം അറിയിച്ചത്.

ദയവായി വ്യാജന്മാരിൽ വഞ്ചിതരാകരുത്. മിക്ക മിമിക്രി കലാകാരന്മാരും അനുകരിക്കുന്ന ശബ്ദത്തിൽ നിന്ന് തികച്ചും വ്യത്യസ്തമാണ് എന്റെ ശബ്ദം. ജാക്‌സൺ എന്ന കഥാപാത്രത്തിന് വേണ്ടി സൃഷ്ടിച്ച “നാടോടി” എന്ന സിനിമയിൽ നിന്നാണ് അവർ എന്‍റെ ശബ്ദം കൂടുതലായി അനുകരിക്കുന്നത്. യഥാർത്ഥ ജീവിതത്തിൽ ജാക്സനെപ്പോലെ ഞാൻ ചിരിക്കുക പോലും ചെയ്യാറില്ല” ബാബു ആന്‍റണി ഫേസ്ബുക്കില്‍ കുറിച്ചു.