മലയാള സീരിയൽ നടിയും സുഹൃത്തും സഞ്ചരിച്ച കാർ 50 അടി താഴ്ചയിലേക്ക് മറിഞ്ഞ് അപകടം
നിയന്ത്രണം വിട്ട കാർ 50 അടി താഴ്ചയിലേക്ക് മറിഞ്ഞ് സീരിയൽ നടിയും സുഹൃത്തും അദ്ഭുതകരമായി രക്ഷപ്പെട്ടു. ആനമല റോഡില് പത്തടിപ്പാലത്തിന് സമീപം തകര്ന്നുകിടക്കുന്ന റോഡിലാണ് നിയന്ത്രണം വിട്ട കാർ മറിഞ്ഞത്. എറണാകുളം സ്വദേശിയായ സിനിമ-സീരിയല് താരം അനു നായര്, സുഹൃത്ത് അഞ്ജലി എന്നിവരാണ് കാറിലുണ്ടായിരുന്നത്.
മലക്കപ്പാറയില്നിന്ന് ചാലക്കുടിക്ക് വരുകയായിരുന്ന കാര് റോഡിലെ കല്ലില് കയറി താഴേക്ക് മറിയുകയായിരുന്നു. കാര് പലതവണ കരണം മറിഞ്ഞ് അവസാനം ഒരു മരത്തില് തട്ടിനിന്നു. എയര് ബാഗ് ഉണ്ടായിരുന്നതിനാല് ഇവര്ക്ക് കാര്യമായ പരിക്കേറ്റില്ല.
കാറില്നിന്ന് പുറത്തിറങ്ങിയ ഇവര് കൊക്കയില് നിന്ന് ഏറെ ബുദ്ധിമുട്ടി റോഡിലേക്ക് കയറുകയായിരുന്നു. സംഭവം നടക്കുമ്പോൾ റോഡില് തിരക്ക് കുറവായിരുന്നതിനാല് കാർ കൊക്കയിലേയ്ക്ക് പതിയുന്നത് ആരും കണ്ടിരുന്നില്ല. റോഡിലേക്ക് കയറിയ ഇവർ മലക്കപ്പാറയിലേക്ക് പോയ വിനോദസഞ്ചാരികളുടെ വാഹനത്തില് കയറി.
തുടർന്ന് മലക്കപ്പാറ ഫോറസ്റ്റ് സ്റ്റേഷനിലെത്തി വനപാലകരെ വിവരം അറിയിച്ചു. വനപാലകര് ഇവര്ക്ക് പ്രഥമശുശ്രൂഷയും ഭക്ഷണവും നല്കി. തിരികെ പോകാന് ജീപ്പും തരപ്പെടുത്തി. അതേ സമയം ആനമല റോഡില് അമ്പലപ്പാറ മുതല് മലക്കപ്പാറ വരെ നിര്മാണത്തിനായി പൊളിച്ചിട്ടിരിക്കുന്നതിനാല് അപകടം പതിവാണെന്ന് സമീപ വാസികൾ പറയുന്നു.
https://www.facebook.com/Malayalivartha
