സിനിമയിൽ സജീവമല്ലെങ്കിലും ഇപ്പോഴും മലയാളികളുടെ പ്രിയ നടിയാണ് കാവ്യാമാധവൻ. 38-ാം ജന്മദിനം ആഘോഷിക്കുന്ന കാവ്യയ്ക്ക് നിരവധി സുഹൃത്തുക്കളും സഹപ്രവർത്തകരമാണ് ആശംസകൾ നേരുന്നത്. സിനിമയിൽ സജീവമായിരുന്ന 25 വര്‍ഷങ്ങള്‍ കൊണ്ട് 73 ഓളം ചിത്രങ്ങളിലാണ് കാവ്യ അഭിനയിച്ചിട്ടുള്ളത്. 2009ൽ നിശാൽ ചന്ദ്രയുമായിട്ടായിരുന്നു കാവ്യയുടെ വിവാഹം. 2011ൽ ഇവർ‍ വേര്‍പിരിഞ്ഞു.

പിന്നീട് 2016ൽ ജനപ്രിയ നായകൻ ദിലീപിനെ വിവാഹം ചെയ്തു. ദിലീപും നടി മഞ്ജു വാര്യരുമായുള്ള വിവാഹമോചനവും പെട്ടെന്ന് കാവ്യയുമായുള്ള വിവാഹവുമൊക്കെ അക്കാലത്ത് ഏറെ ചര്‍ച്ചയായിരുന്നു. ഇപ്പോഴിതാ സോഷ്യൽ മീഡിയയിൽ വൈറലാകുന്നത് കാവ്യയ്ക്ക് പിറന്നാളാശംസ നേർന്ന നടൻ ഉണ്ണി മുകുന്ദന്റെ പോസ്റ്റാണ്. കാവ്യാ മാധവന്റെ വളരെ പഴയൊരു ഫോട്ടോ പങ്കുവെച്ചുകൊണ്ടാണ് ഉണ്ണി മുകുന്ദൻ ആശംസകൾ നേർന്നിരിക്കുന്നത്.

ഉണ്ണി മുകുന്ദന്റെ പിറന്നാൾ ആശംസ വൈറലായതോടെ നിരവധി രസകരമായ കമന്റുകളാണ് പ്രത്യക്ഷപ്പെടുന്നത്. 'എത്ര നല്ല ഫോട്ടോ ഉള്ള ആളാണ് കാവ്യ.' 'എന്നിട്ട് വിഷ് ചെയ്യാൻ ഈ ഒരു ബ്ലർ പിക് ആണല്ലോ ഉണ്ണി ഏട്ടന് കിട്ടിയേ എന്നോർക്കുമ്പോളാണ് വിഷമം. ഉണ്ണി മുകുന്ദനെ കളിയാക്കി പല കമന്റുകളും നിറയുന്നുണ്ട്.

മുപ്പത്തിനാലുകാരനായ ഉണ്ണി മുകുന്ദൻ വളരെ ചുരുങ്ങിയ കാലം കൊണ്ട് മലയാള സിനിമയിലെ ശ്രദ്ധേയനായ നടനായി മാറിയ താരമാണ്. ട്വൽത്ത് മാനെന്ന മോഹൻലാൽ ചിത്രത്തിലാണ് ഏറ്റവും അവസാനം ഉണ്ണി മുകുന്ദൻ അഭിനയിച്ചത്. ഉണ്ണി മുകുന്ദന്‍ നായകനാകുന്ന പുതിയ ചിത്രം കഴിഞ്ഞ ദിവസമാണ് പ്രഖ്യാപിച്ചത്.

മാളികപ്പുറം എന്ന് പേരിട്ടിരിക്കുന്ന ചിത്രത്തിന്റെ ടൈറ്റില്‍ പോസ്റ്റര്‍ മമ്മൂട്ടിയാണ് പുറത്തുവിട്ടിരിക്കുന്നത്. വിഷ്ണു ശശി ശങ്കറാണ് ചിത്രം സംവിധാനം ചെയ്തിരിക്കുന്നത്. നാരായം, കുഞ്ഞിക്കൂനൻ, മിസ്റ്റർ ബട്ലർ, മന്ത്രമോതിരം എന്നീ ചിത്രങ്ങളിലൂടെ പ്രശസ്തനായ സംവിധായകന്‍ ശശി ശങ്കറിന്റെ മകനാണ് വിഷ്ണു ശശി ശങ്കർ.