എല്ലാം ശരിയാകും എന്ന് ഓരോ ദിവസവും സ്വയം പറഞ്ഞു ജീവിച്ചു തീർക്കാൻ നോക്കുന്നു; എന്റെ പ്രിയപ്പെട്ടവരെ വിഷമിപ്പിക്കരുത് എന്ന് വിചാരിച്ച് സങ്കടങ്ങൾ മാറ്റിവയ്ക്കാൻ നോക്കുന്നു; ഞാനെന്തു ചെയ്താലും ആക്ഷേപിക്കാനും ചീത്ത വാക്കുകൾ ഉപയോഗിച്ച് എന്നെ വേദനിപ്പിച്ചു വീണ്ടും ഇരുട്ടിലേക്ക് വിടാൻ നോക്കുന്ന ഒരുപാട് പേരുണ്ട് എന്ന് എനിക്കറിയാം; അങ്ങനെയാണ് നിങ്ങൾക്ക് സന്തോഷം കിട്ടുന്നതെങ്കിൽ അതിലും ഞാൻ തടസ്സം നിൽക്കില്ല; പൊട്ടിത്തെറിച്ച് ഭാവന
ദുബായിയിൽ ഗോൾഡൻ വിസ സ്വീകരിക്കാനെത്തിയ ഭാവനയുടെ വസ്ത്രത്തിനെതിരെ വ്യാപക വിമർശനമുയർന്നിരുന്നു. ടോപ്പിനിടയിൽ ഭാവന വസ്ത്രം ധരിച്ചില്ലെന്ന ആക്ഷേപമാണ് ഉയർത്തിയത് . ഈ വിമർശനങ്ങൾക്ക് മറുപടി ഇൻസ്റ്റഗ്രാം പോസ്റ്റായി ഭാവനപങ്കു വച്ചിരിക്കുകയാണ്. ഭാവനയുടെ വാക്കുകൾ ഇങ്ങനെ;
''എല്ലാം ശരിയാകും എന്ന് ഓരോ ദിവസവും സ്വയം പറഞ്ഞു ജീവിച്ചു തീർക്കാൻ നോക്കുമ്പോൾ എന്റെ പ്രിയപ്പെട്ടവരെ വിഷമിപ്പിക്കരുത് എന്ന് വിചാരിച്ച് സങ്കടങ്ങൾ മാറ്റിവയ്ക്കാൻ നോക്കുമ്പോഴും ഞാനെന്തു ചെയ്താലും ആക്ഷേപിക്കാനും ചീത്ത വാക്കുകൾ ഉപയോഗിച്ച് എന്നെ വേദനിപ്പിച്ചു വീണ്ടും ഇരുട്ടിലേക്ക് വിടാൻ നോക്കുന്ന ഒരുപാട് പേരുണ്ട് എന്ന് എനിക്കറിയാം അങ്ങനെയാണ് അവരൊക്കെ സന്തോഷം കണ്ടെത്തുന്നതെന്നും എനിക്ക് ബോധ്യമുണ്ട് അങ്ങനെയാണ് നിങ്ങൾക്ക് സന്തോഷം കിട്ടുന്നതെങ്കിൽ അതിലും ഞാൻ തടസ്സം നിൽക്കില്ല''എന്നാണ് നടി പറഞ്ഞിരിക്കുന്നത്.
അതേസമയം നടിയുടെ പ്രതികരണത്തെ പിന്തുണച്ച് കൊണ്ട് നിരവധി പേർ രംഗത്തെത്തി. ഇഷ്ടമുള്ള വസ്ത്രം അത് ആണിനായാലും പെണ്ണിനായാലും തിരഞ്ഞെടുക്കാനുള്ള സ്വാതന്ത്ര്യം ഉണ്ടെന്നും വസ്ത്ര ധാരണത്തെ വിമർശിക്കുന്നവർ സ്വയം ചെറുതാവുകയാണെന്നും ചിലർ പ്രതികരിച്ചു.
ഭാവനയുടെ വസ്ത്രത്തിനല്ല പ്രശ്നം എന്നും അത് കണ്ട് വിമർശിക്കാൻ നിൽക്കുന്നവരുടെ കണ്ണിനും മനസിനുമാണ് പ്രശ്നമെന്നായിരുന്നു മറ്റ് ചിലരുടെ പ്രതികരണം. വിമർശനങ്ങളെ അർഹിക്കുന്ന അവഞ്ജയോടെ പുച്ഛിച്ച് തള്ളണമെന്നും നടിയെ പിന്തുണയ്ക്കുന്നവർ പറയുന്നു.
https://www.facebook.com/Malayalivartha