തന്റെ ജീവിതത്തില്‍ ഒരേ ഒരു പെണ്ണിനോട് മാത്രമേ ഇഷ്ടം തോന്നിയിട്ടുള്ളൂവെന്നും അത് ശാലുവിനോട് മാത്രമാണെന്നും സീരിയല്‍ താരം സജി ജി നായര്‍ മുമ്പ് പ്രതികരിച്ചിരുന്നു. എന്നാൽ അപ്രതീക്ഷിതമായാണ് നടി ശാലുവും സീരിയൽ നടൻ സജിയും വേർപിരിയുന്നുവെന്ന വാർത്ത പുറത്ത് വന്നത്. ജനപ്രീയ പരമ്പരയായ നന്ദനത്തിലൂടെയാണ് സജി വീണ്ടും അഭിനയത്തില്‍ സജീവമായത്. ഇപ്പോഴിതാ സജി പങ്കിട്ട ഒരു കുറിപ്പാണു വൈറലായി മാറുന്നത്. 2022 നോട് വിട പറയുന്ന സജിയുടെ കുറിപ്പാണ് ശ്രദ്ധ നേടുന്നത്.

2022 മരണത്തിനും ജീവിതത്തിനുമിടയിലൂടെ കടന്നുപോയ വര്‍ഷം, സ്വാര്‍ത്ഥ താല്‍പര്യങ്ങള്‍ക്ക് വേണ്ടി എന്നോടൊപ്പം കൂടിയ പലരുടേയും മുഖം മൂടികള്‍ തിരിച്ചറിഞ്ഞ വര്‍ഷം, എന്നെ സ്‌നേഹിച്ചവരേയും ചതിച്ചവരെയും എന്റെ നന്‍മ ആഗ്രഹിക്കുന്നവരേയും തിരിച്ചറിഞ്ഞ വര്‍ഷം, ഭയന്നോടാന്‍ എനിക്ക് മനസ്സില്ല എന്നാണ് സജി ജി നായര്‍ പറയുന്നത്. ചതിച്ചവരേ നിങ്ങള്‍ക്ക് നന്ദി പുതിയ പാഠങ്ങള്‍ പഠിക്കാന്‍ സഹായിച്ചതിന്, കൂടെ നിന്നവരേ സഹായിച്ചവരേ നിങ്ങള്‍ക്കും നന്ദി എന്നെ സ്‌നേഹിച്ചതിന് എന്നും സജി പറയുന്നുണ്ട്.

2023 മുന്നിലെത്തി എനിക്ക് എന്നും ഞാനാകാനേ കഴിയൂ. ആ പഴയ ഞാന്‍ . എല്ലാവര്‍ക്കും എന്റെ ഹൃദയം നിറഞ്ഞ പുതുവത്സര ആശംസകള്‍ എന്ന് പറഞ്ഞാണ് അദ്ദേഹം കുറിപ്പ് അവസാനിപ്പിക്കുന്നത്. പിന്നാലെ നിരവധി പേരാണ് സജിയുടെ കുറിപ്പിന് മറുപടിയുമായി എത്തിയിരിക്കുന്നത്. 2016 ല്‍ ആയിരുന്നു സജിയുമായി ശാലുവിന്റെ വിവാഹം. തുടര്‍ന്നും ശാലു അഭിനയത്തില്‍ സജീവമായി മാറിയിരുന്നു. എന്നാല്‍ അടുത്തിടെയാണ് സജി അഭിനയത്തിലേക്ക് മടങ്ങി എത്തിയത്. കുടുംബശ്രീ ശാരദയിലൂടെയാണ് സജിയുടെ തിരിച്ചുവരവ്.

ആലിലത്താലി എന്ന സീരിയലില്‍ അഭിനയിക്കുന്ന സമയത്താണ് ശാലുവും സജി നായരും പരസ്പരം അടുക്കുന്നത്. ആ ബന്ധം തുടര്‍ന്ന് വിവാഹത്തിലേക്ക് എത്തുകയായിരുന്നു. ഏഴ് കൊല്ലത്തെ പ്രൊഫഷണല്‍ നാടകത്തിന് ശേഷമാണ് സജി സീരിയല്‍ ലോകത്തേക്ക് എത്തുന്നത്. കരിയര്‍ അതോടെ മാറി മറയുകയായിരുന്നു. തുടര്‍ന്ന്, കൃഷ്ണകൃപാസാഗരം മുതല്‍ സ്വാമി അയ്യപ്പന്‍ വരെയുള്ള സീരിയലുകളില്‍ അഭിനയിച്ചു. തമിള്‍, തെലുങ്ക് ഭാഷകളിലും അഭിനയിച്ചു. നാരദനായി അഭിനയിച്ചാണ് സജി കയ്യടി നേടുന്നത്.

സോളാര്‍ കേസിലൂടെയാണ് ശാലു മേനോന്‍ വിവാദത്തില്‍ പെടുന്നത്. ഇതിന് ശേഷമാണ് താരം വിവാഹം കഴിക്കുന്നത്. ഈയ്യടുത്ത് നല്‍കിയൊരു അഭിമുഖത്തില്‍ തങ്ങളുടെ വിവാഹ മോചനത്തെക്കുറിച്ച് ശാലു മേനോന്‍ സംസാരിച്ചിരുന്നു. കേസ് കോടതിയില്‍ നടക്കുകയാണെന്നാണ് ശാലു പറയുന്നത്. താന്‍ പരിപാടികള്‍ക്കും മറ്റും പോകുന്നതും അത് മൂലമുണ്ടായ അഭിപ്രായ ഭിന്നതകളുമാണ് പിരിയാന്‍ കാരണമെന്നാണ് ശാലു പറഞ്ഞത്.

എന്തിനാണ് വെറുതെ ഇഷ്യൂസ് ഒക്കെയായി മുന്‍പോട്ട് പോകുന്നത്. ഡിവോഴ്‌സ് തന്നെയാണ് ലക്ഷ്യമെന്നാണ് ശാലു പറഞ്ഞത്. മീഡിയേഷന്‍ ഒക്കെ നടന്നിരുന്നു. എന്നാല്‍ എനിക്ക് അത് മുന്‍പോട്ട് കൊണ്ട് പോകാന്‍ ആകില്ല എന്ന് മനസിലായിരിക്കുന്നു. അപ്പോള്‍ അത് വസാനിപ്പിക്കുന്നതല്ലേ നല്ലത് എന്ന് തോന്നിയെന്നാണ് ശാലു നേരത്തെ പറഞ്ഞത്.