കേരളത്തില്‍ പ്രദര്‍ശനവിജയം നേടിയ മലയാള ചിത്രം പ്രേമത്തിന് ചെന്നൈയിലെ തിയറ്ററില്‍ ഇന്ന് അവസാന പ്രദര്‍ശനം. 230 ദിവസം പിന്നിട്ടുകഴിഞ്ഞാണ് എക്‌സ്പ്രസ് അവന്യൂവിലെ എസ്‌കേപ് തിയറ്ററില്‍ നിന്നും പ്രേമം വിടുന്നത്. മലയാളികള്‍ നെഞ്ചിലേറ്റിയ ജോര്‍ജിനെയും മലരിനെയും തമിഴ് പ്രേക്ഷകരും കൈ വിട്ടില്ല.
അല്‍ഫോന്‍സ് സംവിധാനം ചെയ്ത് നിവിന്‍ പോളി നായകനായി എത്തിയ പ്രേമം മലയാളത്തില്‍ മാത്രമല്ല തമിഴിലും ചരിത്രം സൃഷ്ടിക്കുകയാണ്. ചെന്നൈയില്‍ ഇത്രയും കൂടുതല്‍ ദിവസം തുടര്‍ച്ചയായി പ്രദര്‍ശിപ്പിച്ച മലയാളചിത്രം അപൂര്‍വമാണ്. പ്രേമത്തിന്റെ 222ാം ദിനം സിനിമ കാണാന്‍ നിവിന്‍ പോളിയും തിയറ്ററില്‍ പ്രദര്‍ശനത്തിന് എത്തിയത് വാര്‍ത്തയായിരുന്നു.
തമിഴ്‌നാട്ടില്‍ തന്നെ ചില ചിത്രങ്ങള്‍ തിയറ്ററുകളില്‍ 25 ദിവസം പിന്നിടാന്‍ കഷ്ടപ്പെടുമ്പോഴാണ് ഒരു മലയാളചിത്രം 230 ദിവസം പിന്നിടുന്നത്. ആറുമാസത്തിന് ശേഷം ഹൗസ്ഫുള്‍ ഷോയും തിരക്കുമായി മികച്ച പ്രതികരണമാണ് ആളുകള്‍ക്കിയില്‍. പ്രേമം പ്രദര്‍ശനത്തിന്റെ 100, 150, 200 ദിവസങ്ങളിലും ചെന്നൈ എസ്‌കേപ്പ് സിനിമാസ് വാര്‍ത്തയില്‍ ഇടംപിടിച്ചിരുന്നു.
മലയാളികള്‍ ഏറെ സന്തോഷത്തോടെ കാണേണ്ട മറ്റൊരു നേട്ടമാണ് പ്രേമത്തിനുണ്ടായിരിക്കുന്നത്. അന്യഭാഷ സിനിമകള്‍ കേരളത്തിലെ തിയറ്റകളില്‍ വൈഡ് റീലീസ് ചെയ്ത് മലയാളസിനിമകള്‍ക്ക് തന്നെ പ്രതിസന്ധികള്‍ സൃഷ്ടിക്കുമ്പോള്‍ പ്രേമം സിനിമയ്ക്ക് തമിഴ്‌നാട്ടില്‍ കിട്ടുന്ന സ്വീകാര്യത ഒരു അംഗീകാരമാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക