'അമ്മ'യുടെ നേതൃത്വത്തില്‍ കൊച്ചി ദര്‍ബാര്‍ ഗ്രൗണ്ടില്‍ സംഘടിപ്പിച്ച പ്രതിഷേധ യോഗത്തില്‍ സംസാരിക്കുന്നതിനിടെ നടിക്കു നേരെയുണ്ടായ അതിക്രമം ആസൂത്രിതമെന്ന് ആവര്‍ത്തിച്ച് മഞ്ജു വാരിയര്‍. നേരത്തെ നടി ആക്രമിക്കപ്പെട്ട സംഭവത്തില്‍ ക്രിമിനല്‍ ഗൂഢാലോചന നടന്നിട്ടുണ്ടെന്ന് മഞ്ജു വാരിയര്‍ വ്യക്തമാക്കിയിരുന്നു. ഇതിനു പിന്നില്‍ പ്രവര്‍ത്തിച്ചവരെ നിയമത്തിനു മുന്നില്‍ കൊണ്ടുവരണം. ഈ ഒരു സാഹചര്യം ഏതൊരു പെണ്‍കുട്ടിക്കും വരാം. പക്ഷെ ആ കുട്ടിയുടെ മനോധൈര്യം അത്ഭുതപ്പെടുത്തിയെന്നും മഞ്ജു പറഞ്ഞു. പ്രതിയെ പിടിച്ചതില്‍ സന്തോഷമുണ്ടെന്നും അന്വേഷണത്തിലൂടെ സത്യം പുറത്തുവരട്ടെയെന്നും മഞ്ജു പ്രതികരിച്ചു. 

ഇന്ന് ഉച്ചയ്ക്ക് ഒരുമണിയോടെയാണ് നടിയെ ആക്രമിച്ച കേസിലെ മുഖ്യ പ്രതി പള്‍സര്‍ സുനിയും രണ്ടാം പ്രതി വിജീഷും കോടതില്‍ കീഴടങ്ങാന്‍ എത്തുന്നതിനിടെ പോലീസ് പിടിയിലാവുകയും സിനിമയെ വെല്ലുന്ന തരത്തിലുള്ള രംഗങ്ങള്‍ അരങ്ങേറിയതും. എറണാകുളത്തപ്പന്‍ ഗ്രൗണ്ട് വരെ പള്‍സര്‍ ബൈക്കിലാണ് സുനി എത്തിയത്. വിജീഷും ഒപ്പമുണ്ടായിരുന്നു.

എറണാകുളത്തപ്പന്‍ ഗ്രൗണ്ടിനു സമീപം മതിലിനോടു ചേര്‍ത്തു ബൈക്ക് നിര്‍ത്തി ഇരുവരും അഭിഭാഷകരുടെ ഗൗണ്‍ ഇട്ട് മതില്‍ ചാടുകയായിരുന്നു. മതില്‍ ചാടിയാല്‍ നേരെ എത്തുന്നത് എസിജെഎം കോടതിക്കു സമീപമാണ്. നേരെ ഇരുവരും പൊലീസിനെയും മറ്റുള്ളവരുടെയും കണ്ണുവെട്ടിച്ച് കോടതിയിലെ പ്രതിക്കൂട്ടില്‍ കയറി നില്‍ക്കുകയായിരുന്നു. യൂണിഫോമിലും മഫ്തിയിലുമായി നിറയെ പൊലീസ് കോടതിയില്‍ ഉണ്ടായിരുന്നു. പൊലീസ് മാജിസ്‌ട്രേറ്റിന്റെ ചേംബറില്‍ കയറി ഇരുവരെയും പിടികൂടുകയായിരുന്നു. മാജിസ്‌ട്രേറ്റുമായി സംസാരിക്കും മുമ്പു തന്നെ ഇരുവരും പൊലിസിന്റെ കസ്റ്റഡിയിലായി. തുടര്‍ന്ന് പൊലിസ് ഇരുവരെയും തൊട്ടടുത്തു പാര്‍ക്ക് ചെയ്തിരുന്ന ജീപ്പിലേക്കു കയറ്റുകയായിരുന്നു.