മുരുകന്റെ അനുഗ്രഹവും ആശീര്‍വാദവും തേടി മോഹന്‍ലാല്‍ പളനിമല കയറി. കഴിഞ്ഞദിവസം രാവിലെയായിരുന്നു ദര്‍ശനം. സുഹൃത്തും ചാര്‍ട്ടേഡ് അക്കൗണ്ടന്റുമായ സനല്‍കുമാറും ഒപ്പമുണ്ടായിരുന്നു. വാഗമണ്ണിലെ ചിത്രീകരണത്തിന് ശേഷം പത്തനംതിട്ട ഇലന്തൂരിലെ കുടുംബ വീട്ടിലെത്തിയ താരം പിന്നീട് കൊച്ചിയിലേക്ക് മടങ്ങിയിരുന്നു. അവിടെ നിന്നാണ് കാറില്‍ പളനിക്ക് പോയത്. സിനിമകളുടെ ചിത്രീകരണവുമായി ബന്ധപ്പെട്ട് പൊള്ളാച്ചിയിലും മറ്റും ഇടയ്ക്കിടെ പോകാറുണ്ടെങ്കിലും വര്‍ഷങ്ങള്‍ക്ക് ശേഷമാണ് പളനിയില്‍ ദര്‍ശനം നടത്തുന്നത്. മുമ്പ് പറഞ്ഞ ചില വഴിപാടുകള്‍ ചെയ്തു തീര്‍ക്കാനുണ്ടായിരുന്നു. 

ഷൂട്ടിംഗിന്റെയും മറ്റും തിരക്കുകള്‍ കാരണം പലപ്പോഴും ക്ഷേത്രദര്‍ശനം നടക്കാറില്ല. രണ്ട് വര്‍ഷം മുമ്പാണ് വര്‍ഷങ്ങള്‍ക്ക് ശേഷം ശബരിമല ദര്‍ശനം നടത്തിയത്. അതും സീസണ്‍ സമയത്തല്ലായിരുന്നു. ആറ് മാസങ്ങള്‍ക്ക് മുമ്പ് പത്മനാഭസ്വാമിക്ഷേത്രത്തിലും ദര്‍ശനം നടത്തിയിരുന്നു. സിനിമയില്‍ അഭിനയിച്ച് തുടങ്ങിയ കാലത്ത് മൂകാംബികയില്‍ താരം ഒറ്റയ്ക്ക് പോയിട്ടുണ്ട്. ഋഷികേശിലും ഹരിദ്വാറിലും യാത്ര ചെയ്തിട്ടുണ്ട്. കൈലാസത്തില്‍ പോകണമെന്നുള്ളത് വലിയ ആഗ്രഹമാണ്. എന്നാല്‍ പ്രതികൂല കാലാവസ്ഥയും ചില ശാരീരിക പ്രശ്‌നങ്ങളും കാരണം അത് ഒഴിവാക്കുകയായിരുന്നു.