കറുത്തമുത്ത് സീരിയലിലെ അഭിനയത്തിന് കിഷോര്‍സത്യ പ്രതിഫലം കൂട്ടി ചോദിച്ചോ? സീരിയലില്‍ നിന്നുള്ള നടന്റെ പിന്മാറ്റത്തെക്കുറിച്ച് സോഷ്യല്‍മീഡിയയില്‍ ഇത്തരം കഥകളാണ് പ്രചരിക്കുന്നത്. സീരിയലില്‍ നിന്ന് ഒരു കഥാപാത്രം മാറുമ്പോള്‍ എന്തിനാണ് നെഗറ്റീവ് ആയി ചിന്തിക്കുന്നതെന്നാണ് നടന്‍ കിഷോര്‍ സത്യ ചോദിക്കുന്നത്. കറുത്തമുത്ത് എന്ന മെഗാപരമ്പരയിലെ തന്റെ പിന്മാറ്റത്തെക്കുറിച്ച് കിഷോര്‍ സത്യ.

കറുത്തമുത്ത് എന്ന മെഗാ പരമ്പരയില്‍ നിന്ന് താന്‍ പടിയിറങ്ങുകയാണ് എന്ന് കിഷോര്‍ തന്റെ ഫെയ്‌സ് ബുക്ക് പേജിലൂടെ അറിയിച്ചിരുന്നു. ഈ വാര്‍ത്ത പുറത്തുവന്ന ശേഷം കിഷോര്‍ പ്രതിഫലം കൂട്ടി ചോദിച്ചുവെന്നും നിര്‍മാതാവുമായി പിണങ്ങിയെന്നും വരെ വാര്‍ത്തകള്‍ പ്രചരിച്ചിരുന്നു. എന്നാല്‍ എന്താണ് കാര്യം എന്നറിയാനായി നിരവധി ആരാധകര്‍ കിഷോറിനെ വിളിച്ചിരിക്കുകയാണ്. സ്വാഭാവികമായ പിന്മാറ്റം മാത്രമാണിതെന്നാണ് കിഷോറിന്റെ പ്രതികരണം.

''കറുത്തമുത്തില്‍ കഴിഞ്ഞ രണ്ടര വര്‍ഷമായി ഞാന്‍ ഡോക്ടര്‍ ബാലചന്ദ്രന്‍ എന്ന കഥാപാത്രമായി അഭിനയിച്ചു. കഥ പറഞ്ഞ് പോയതും ഇത് വരെ ഡോ. ബാലചന്ദ്രന്റെയും ഭാര്യ കാര്‍ത്തികയുടെയും മകളുടെയും കഥയായിരുന്നു. എന്നാല്‍ കഥാഗതി മാറുകയാണ്. സീരിയലിന്റെ സ്വാഭാവികമായ പരിണാമത്തില്‍ പല കഥാപാത്രങ്ങള്‍ക്കും മാറി നില്‍ക്കേണ്ടി വരും. റേറ്റിങ്ങില്‍ കറുത്തമുത്ത് ഏറെ മുന്നിലാണ് എന്നത് കൊണ്ട് തന്നെ മറ്റൊരു കഥാസന്ദര്‍ഭത്തിലൂടെ സീരിയല്‍ പുരോഗമിക്കും. അതില്‍ എനിക്ക് റോളില്ല അത് കൊണ്ട് തന്നെയാണ് പടിയിറക്കം.

പെണ്‍കുട്ടികള്‍ക്കാണെങ്കില്‍ അവരുടെ വിവാഹം കുടുംബ ജീവിതം ഒക്കെയായി മറി നില്‍ക്കേണ്ടി വരും. ഇതൊക്കെ സര്‍വ സാധാരണമാണ്. ഒരു സീരിയലില്‍ നിന്ന് ഏതെങ്കിലും കഥാപാത്രം മാറുമ്പോള്‍ അതിന് മറ്റു പല വ്യാഖ്യാനങ്ങളും ദയവു ചെയ്ത് നടത്തരുത്. സിനിമയില്‍ ഒരു കഥാപാത്രത്തിന്റെ റോള്‍ കഴിയുകയോ മരണപ്പെടുകയോ ചെയ്യുന്നതു പോലെയാണ് ഇതും. സീരിയലിന്റെ കഥ സ്‌നേഹിച്ച് ഞാന്‍ ചെയ്ത കഥപാത്രത്തെ ഇപ്പോഴും ഇഷ്ടപ്പെടുന്ന പ്രേക്ഷകര്‍ക്കെല്ലാം നന്ദി'' കിഷോര്‍ സത്യ പറയുന്നു. ജിത്തുജോസഫിന്റെ തിരക്കഥയില്‍ അന്‍സാര്‍ ഖാന്‍ സംവിധാനം ചെയ്യുന്ന 'ലക്ഷ്യം' സിനിമയില്‍ ബിജുമേനോന്‍, ഇന്ദ്രജിത്ത് എന്നിവര്‍ക്കൊപ്പം ശ്രദ്ധേയമായ വേഷത്തില്‍ കിഷോര്‍ സത്യയും എത്തുന്നുണ്ട്. മെയ് അഞ്ചിന് ലക്ഷ്യം തിയേറ്ററുകളിലെത്തും.

കിഷോറിന്റെ ഫെയ്‌സ്ബുക്ക് പോസ്റ്റ്