മമ്മൂട്ടിക്കും കൂട്ടര്‍ക്കും ആശ്വസിക്കാം. പ്രേക്ഷകനെ ബോറടിപ്പിക്കാത്ത കളിയാക്കാത്ത ഒരു കൊച്ച് മനോഹര ചിത്രം. ഒരു സൂപ്പര്‍ സ്റ്റാര്‍ ചിത്രമെന്ന ഫീല്‍ നല്‍കാത്തതാണ് ഈ ചിത്രത്തിന്റെ വിജയം. 
അമിത പ്രതീക്ഷകളുടെ ഭാരമില്ലാതെ പുള്ളിക്കാരന്‍ സ്റ്റാറാ അതെ സൂപ്പര്‍ സ്റ്റാര്‍. പുള്ളിക്കാരന്‍ സ്റ്റാറാ ഒരു ഫീല്‍ ഗുഡ് ചിത്രം തന്നെയാണ്. സ്റ്റാര്‍ എന്നതു പേരില്‍ മാത്രമുള്ള സാധാരണക്കാരുടെ കഥ പറയുന്ന സാധാരണ ചിത്രം. 
അധ്യാപകരെ പഠിപ്പിക്കുന്ന അധ്യാപകനായ രാജകുമാരനാണ് (മമ്മൂട്ടി) ചിത്രത്തിലെ കേന്ദ്രകഥാപാത്രം. സ്ത്രീകളോടുള്ള സമ്പര്‍ക്കം കുറവാണെങ്കിലും സ്ത്രീവിഷയത്തില്‍ ഒട്ടേറെ പേരുദോഷവും അദ്ദേഹത്തിനുണ്ട്. പ്രായമേറെയായിട്ടും വിവാഹിതനാവാത്ത രാജകുമാരന്റെ ജീവിതത്തിലേക്ക് ചില സ്ത്രീകള്‍ കടന്നു വരുന്നതും തുടര്‍ന്നുണ്ടാകുന്ന സംഭവവികാസങ്ങളുമാണ് ചിത്രം പറയുന്നത്. 

ചിത്രത്തിലെ ഏറ്റവും ആകര്‍ഷണീയമായ ഭാഗം അതിന്റെ ആദ്യ പകുതി തന്നെയാണ്. നര്‍മരസപ്രധാനവും ഒപ്പം കാര്യമാത്രപ്രസക്തവുമാണ് അദ്യ ഭാഗങ്ങള്‍. മമ്മൂട്ടി, ഹരീഷ് കണാരന്‍, ദിലീഷ് പോത്തന്‍, ഇന്നസെന്റ് എന്നിവര്‍ ചേര്‍ന്നുള്ള പ്രകടനം പ്രേക്ഷകനെ രസിപ്പിക്കും. ലളിതമായ എന്നാല്‍ കഥാപാത്രത്തോട് യോജിച്ച രീതിയിലുള്ള മമ്മൂട്ടിയുടെ പ്രകടനം എടുത്തു പറയണം. ലൗഡ്‌സ്പീക്കര്‍ എന്ന സിനിമയിലെ തോപ്രാംകുടിക്കാരന്‍ കഥാപാത്രവുമായി സാമ്യമുണ്ടെന്ന് പറയാം. ബോറടിപ്പിക്കാത്ത രീതിയില്‍ അവതരിപ്പിക്കാന്‍ എഴുത്തുകാരനും സംവിധായകനും ശ്രദ്ധിച്ചിട്ടുണ്ട്.

നായികമാരായെത്തിയ ആശാ ശരത്തും ദീപ്തി സതിയും കഥാപാത്രങ്ങളോട് നീതി പുലര്‍ത്തി. സെവന്‍ത് ഡേ എന്ന െ്രെകം ത്രില്ലര്‍ ഒരുക്കിയ ശ്യാംധറിന്റെ മേക്കോവര്‍ തന്നെയാണ് ഈ സിനിമ. മെഗാസ്റ്റാറിനെ വച്ച് ലളിതമായി സിനിമയെടുത്തെന്നു മാത്രമല്ല തന്റെ ആദ്യ ചിത്രത്തിന്റെ ഒരു ഛായ പോലും രണ്ടാം സിനിമയ്ക്ക് അദ്ദേഹം കൊടുത്തുമില്ല. രതീഷ് രവിയുടെ രചനയും ഒപ്പം വിനോദ് ഇല്ലമ്പള്ളിയുടെ ഛായാഗ്രഹണവും മികച്ചു നിന്നു. സംഗീതവും ഗാനങ്ങളും ചിത്രത്തിനു യോജിച്ചതായി.