ചാനല് നിശകളില് സഹകരിക്കാതിരുന്നാല് ദോഷം സിനിമയ്ക്കും നിര്മാതാക്കള്ക്കും തന്നെ, ചേമ്പര് നിലപാടില് അഭിപ്രായ ഭിന്നത രൂക്ഷം
സര്ക്കാര് അംഗീകൃത സംഘടനയല്ലാത്ത ഫിലിം ചേമ്പറിന്, താരങ്ങള് സിനിമയില് അഭിനയിക്കുന്നതില് നിന്ന് വിലക്കാന് എന്ത് അധികാരം? യാതൊരു അധികാരവുമില്ല. കഴിഞ്ഞ ഓണത്തിന് താരങ്ങള് സഹകരിക്കാതിരുന്നിട്ടും ഒരു ചാനലിന്റെയും റേറ്റിംഗ് കുറഞ്ഞില്ല. ഇതൊന്നും മനസിലാക്കാതെയാണ് ഉമ്മാക്കി കാട്ടാന് ഫിലിം ചേമ്പര് ഇറങ്ങിത്തിരിച്ചിരിക്കുന്നത്. ഒരു സിനിമയുടെ പേര് രജിസ്റ്റര് ചെയ്യുന്നത് നിലവില് ഫിലിം ചേമ്പറിലാണ് . ഇങ്ങനെ ചെയ്യണം എന്ന് കൃത്യമായ ഒരു നിയമം യഥാര്ത്ഥത്തില് ഇല്ലെന്ന് സര്ക്കാര് നല്കിയ വിവരാവകാശ നിയമപ്രകാരം നല്കിയ മറുപടിയില് വ്യക്തമാക്കുന്നു. ഒരു സിനിമ സെന്സറിങ്ങിന് അപേക്ഷിക്കുമ്പോള് ഫിലിം ചേമ്പറില് നിന്നുള്ള ടൈറ്റില് രജിസ്ട്രേഷനും പബ്ലിസിറ്റി ക്ലിയറന്സും നല്കണമെന്ന് ആവശ്യപ്പെടാറുണ്ട് . സെന്സര് ബോര്ഡ് അധികൃതര് പറയുന്നത് അതില്ലെങ്കിലും സെന്സര് ചെയ്യുമെന്നാണ്.
എന്നാല് ഫിലിം ചേമ്പറിലെ രെജിസ്ട്രേഷന് ഒരു നടപടി പോലെ എല്ലാ സിനിമകളും ചെയ്യുന്നുണ്ട്. അതിന് ഏതാണ്ട് 25000 രൂപ ചിലവ് വരും. പുതിയ ഒരു സംവിധായകനോ നിര്മാതാവോ ആണെങ്കില് സിനിമ രജിസ്റ്റര് ചെയ്യുവാനായി നിങ്ങള് ഫിലിം ചേംബറിനെ സമീപിക്കുന്നു. അവര് ഉടനെ അങ്ങ് രജിസ്റ്റര് ചെയ്തു തരികയല്ല. നിര്മാതാവ് പ്രൊഡ്യൂസേഴ്സ് അസോസിയേഷനില് രജിസ്റ്റര് ചെയ്തിട്ടുണ്ടെങ്കില് മാത്രമേ ഫിലിം ചേമ്പറില് രജിസ്റ്റര് ചെയ്യാന് സാധിക്കൂ. സംവിധായകനും മറ്റ് പ്രധാന സാങ്കേതിക വിദഗ്ദ്ധര്ക്കും സാങ്കേതിക വിദഗ്ദ്ധരുടെ സംഘടനയില് അംഗത്വം ഉണ്ടെങ്കിലേ രജിസ്റ്റര് ചെയ്യാനാകൂ . അതുകൊണ്ട് അതൊക്കെ ആദ്യം ചെയ്തിട്ട് വരാനാണ് നിര്ദ്ദേശിക്കുന്നത് . നിര്മാതാക്കളുടെ സംഘടനയില് ഏതാണ്ട് 75000 രൂപ നല്കിയാലേ അംഗത്വം ലഭിക്കൂ. സാങ്കേതിക പ്രവര്ത്തകരുടെ സംഘടനയില് അംഗത്വം എടുക്കണമെങ്കില് ലക്ഷങ്ങള് ആണ് അംഗത്വ ഫീസ്. അല്ലെങ്കില് താല്ക്കാലിക മെമ്പര്ഷിപ് എങ്കിലും നിര്ബന്ധമായും എടുക്കണം .
സിനിമ സെന്സര് ചെയ്യണമെങ്കില് ഫിലിം ചേമ്പറില് സിനിമയുടെ പേരും പബ്ലിസിറ്റി ക്ലിയറന്സും രജിസ്റ്റര് ചെയ്യണം. ഫിലിം ചേമ്പറില് ഇത് ചെയ്യണമെങ്കില് നിര്മാതാക്കളുടെ സംഘടനയിലും സാങ്കേതിക പ്രവര്ത്തകാരുടെ സംഘടനയിലും അംഗത്വം എടുത്തേ മതിയാകൂ . ഈ അംഗത്വം ഒക്കെ എടുത്ത് വരുമ്പോള് ഏതാനും ലക്ഷങ്ങള് കൂടി കൂടുതലായി നല്കേണ്ടി വരും. ഇതിന് പുറമെ ആണ് സംഘടനാ അംഗത്വം ഇല്ലെങ്കില് സിനിമയില് പ്രധാന സാങ്കേതിക മേഖലകളില് ജോലി ചെയ്യാന് സാധിക്കില്ലെന്ന അപ്രഖ്യാപിത നിയമവും നിലനില്ക്കുന്നത് . അംഗത്വം ഇല്ലാതെ ജോലി ചെയ്യുന്നവരെ ഭീഷണിപ്പെടുത്തി സിനിമയുടെ സെറ്റില് നിന്നുമൊഴിവാക്കുന്ന സംഭവങ്ങളുമുണ്ട് .
അതേസമയം ചേമ്പറിന്റെ നീക്കം ഇന്ഡസ്ട്രിക്ക് വലിയ നഷ്ടമുണ്ടാക്കുമെന്നാണ് വിലയിരുത്തല്. പല സിനിമകളും സാറ്റലൈറ്റ് അവകാശത്തിന്റെ ബലത്തിലാണ് രക്ഷപെട്ട് പോകുന്നത്. അത് കൂടി തൊലയ്ക്കാനുള്ള നീക്കമാണിതെന്ന് പല നിര്മാതാക്കളും ചൂണ്ടിക്കാട്ടുന്നു. നിലവില് അന്പതിലധികം സിനിമകളുടെ സാറ്റലൈറ്റ് ഒരു ചാനലും എടുത്തിട്ടില്ല. സിനിമ കാണിക്കാനായി നിര്മാതാക്കള് ചാനല് തുടങ്ങാന് ശ്രമിച്ചെങ്കിലും അത് പരാജയപ്പെട്ടു.
https://www.facebook.com/Malayalivartha