കുറേ വര്‍ഷങ്ങളായി ദിലീപ് മലയാളസിനിമയില്‍ തുടര്‍ന്ന് വന്ന അപ്രമാദിത്വത്തിനും അഹങ്കാരത്തിനും പല താരങ്ങള്‍ക്കും അമര്‍ഷവും പ്രതിഷേധവും ഉണ്ടായിരുന്നെങ്കിലും വിലക്കും ഒതുക്കലും ഭയന്ന് മൗനം തുടരുകയായിരുന്നു. നടി ആക്രമിക്കപ്പെട്ട സംഭവത്തില്‍ ദിലീപ് അറസ്റ്റിലായതോടെ പലരും ചെറുതായെങ്കിലും പ്രതിഷേധം രേഖപ്പെടുത്താന്‍ തുടങ്ങി. അമ്മയുള്‍പ്പെടെയുള്ള സംഘടനകള്‍ ഇടപെട്ട് തുടക്കത്തിലേ അത് തടഞ്ഞു. പക്ഷെ, പൊലീസിന് നല്‍കിയ മൊഴിയില്‍ താരങ്ങളും അണിയറപ്രവര്‍ത്തകരും ഉള്ളകാര്യങ്ങള്‍ തുറന്ന് പറഞ്ഞു. ഇത് ദിലീപിനുള്ള ശക്തമായ മറുപടിയാണ്. കുഞ്ചാക്കോബോബനെ പോലുള്ളവരുടെ മൊഴി ദിലീപിന് എതിരാണ് എന്നത് ശ്രദ്ധേയമാണ്. ഇതൊക്കെ കോടതിയില്‍ വിചാരണസമയത്ത് നിര്‍ണായകമാകും. 

ദിലീപുമായി അടുത്തബന്ധം പുലര്‍ത്തിയിരുന്ന മുകേഷ് പോലും ഇപ്പോള്‍ നിലപാട് മാറ്റിയിരിക്കുകയാണ്. സി.പി.എമ്മിന്റെ നിര്‍ദ്ദേശപ്രകാരമാണ് ഇതെന്നറിയുന്നു. മമ്മൂട്ടിയുമായി ദിലീപ് അകന്ന് കഴിഞ്ഞു. ജയിലില്‍ നിന്ന് ഇറങ്ങിയ ശേഷം മമ്മൂട്ടിയെ കാണാനോ, ബന്ധപ്പെടാനോ താരം തയ്യാറായിട്ടില്ല. അമ്മ സംഘടന കെട്ടിപ്പടുത്തതില്‍ പ്രധാനപങ്ക് വഹിച്ച തന്നെ നിര്‍ണായക ഘട്ടത്തില്‍ സംഘടന കൈവെടിഞ്ഞെന്നാണ് ദിലീപിന്റെ പരാതി. ഇതിന് മമ്മൂട്ടി ഉള്‍പ്പെടെയുള്ളവരുടെ ഒത്താശയുണ്ടായിരുന്നു. പൃഥ്വിരാജിനെ പ്രീതിപ്പെടുത്താനാണ് ഇത്തരത്തിലൊരു തീരുമാനം എടുത്തതെന്ന് ദിലീപുമായി അടുപ്പമുള്ള ഗണേഷ്‌കുമാറും വ്യക്തമാക്കിയിരുന്നു. 

കുഞ്ചാക്കോബോബനെയും പൃഥ്വിരാജിനെയും അടക്കം പലരീതിയില്‍ ഒതുക്കാന്‍ ദിലീപ് ശ്രമിച്ചെന്നത് സിനിമയില്‍ എല്ലാവര്‍ക്കും അറിയാവുന്ന കാര്യമാണ്. പൃഥ്വിരാജ് ചിത്രത്തിന്റെ നിര്‍മാതാക്കള്‍ക്ക് ഡേറ്റ് നല്‍കി പ്രൊജക്ടില്‍ നിന്ന് പിന്തിരിപ്പിക്കാന്‍ വരെ ദിലീപ് ശ്രമിച്ചിരുന്നു. സംവിധായകന്‍ തുളസീദാസ് ഇക്കാര്യം പരസ്യമായി വെളിപ്പെടുത്തുകയും ചെയ്തിരുന്നു. ആക്രമണത്തിനിരയായ നടിയെ ചില സിനിമകളില്‍ നിന്ന് ഒഴിവാക്കാന്‍ ദിലീപ് ശ്രമിച്ചിരുന്നതായി കേട്ടിട്ടുണ്ട് കുഞ്ചാക്കോ ബോബനും സിദ്ദിഖും ഇത് സംബന്ധിച്ച് പൊലീസിന് മൊഴി നല്‍കിയിട്ടുണ്ട്. ദിലീപ് ഏതാണ്ട് ഒറ്റപ്പെട്ട അവസ്ഥയിലാണ്. സംഘടനയിലേക്ക് ഇനിയില്ലെന്ന് താരം പലരെയും അറിയിച്ചിട്ടുണ്ട്. 

നടി ആക്രമിക്കപ്പെട്ടത് ഉള്‍പ്പെടെയുള്ള പ്രശ്‌നങ്ങളെ തുടര്‍ന്ന് സമാധനം നഷ്ടപ്പെട്ടതായി ഇന്നസെന്റ് അടുത്തിടെ വ്യക്തമാക്കിയിരുന്നു. അടുത്ത പ്രസിഡന്റ് ആരാകുമെന്ന് ആര്‍ക്കും ഒരുപിടിയുമില്ല. സംഘടനാ പ്രവര്‍ത്തനങ്ങളില്‍ നിന്ന് ഒഴിവാകാനാണ് മമ്മൂട്ടിക്ക് താല്‍പര്യം. വുമണ്‍ ഇന്‍ കളക്ടീവ് സിനിമയും മറ്റ് ചില നടിമാരും തമ്മിലുള്ള അഭിപ്രായഭിന്നതകളും രൂക്ഷമാണ്. പാര്‍വതിയെ പോലുള്ള യുവനടിമാരുടെ അഭിപ്രായപ്രകടനങ്ങളും അതിനെതിരെ യുവസംവിധായകരും ഫാന്‍സുകാരും രംഗത്തെത്തിയിട്ടും ഒരു സംഘടനാ നേതാക്കന്‍മാരും പരസ്യപ്രതികരണത്തിനോ, താക്കീതിനോ തയ്യാറായിട്ടില്ല. ജൂണില്‍ നടക്കുന്ന അമ്മയുടെ ജനറല്‍ ബോഡി യോഗത്തിന് ശേഷമേ സംഘടനയുടെ നിലനില്‍പ്പ് സംബന്ധിച്ച കാര്യങ്ങളെ കുറിച്ച് പറയാനാകൂ.