കസബ വിവാദത്തില്‍ നടി പാര്‍വതിയെ സോഷ്യല്‍മീഡിയയിലൂടെ അധിഷേപിച്ചതിന് പൊലീസ് കേസെടുത്ത പ്രിന്റോ എന്ന യുവാവ് പാവം പയ്യനാണെന്ന് നിര്‍മാതാവ് ജോബി ജോര്‍ജ്. അതുകൊണ്ടാണ് അവന്‍ ജോലി വാഗ്ദാനം ചെയ്തത്. അല്ലാതെ സിനിമയോ, മറ്റ് കാര്യങ്ങളോ കൊണ്ടല്ല. നിരപരാധികള്‍ ക്രൂശിക്കപ്പെടാന്‍ പാടില്ല. പ്രിന്റോയെ നിരവധി തവണ വിളിച്ചെങ്കിലും ഫോണ്‍ സ്വിച്ച് ഓഫ് ആണ്. ഒരു പക്ഷെ, പേടിച്ച് ഫോണ്‍ ഓഫാക്കിയതായിരിക്കാം. എന്തായാലും അവനോട് സംസാരിക്കും. അവന് ജോലി നല്‍കാന്‍ തയ്യാറാണ്. കസബ സിനിമയെ കുറിച്ച് മോശം പറഞ്ഞവരെയാരെയും താന്‍ കുറ്റം പറഞ്ഞിട്ടില്ലെന്നും ഇനി പറയില്ലെന്നും ജോബി വ്യക്തമാക്കി. എല്ലാ ദിവസവും പള്ളിയില്‍ പോകുന്നവനാണ് ഞാന്‍. എന്നിട്ട് ആരെയെങ്കിലും മോശം പറയുന്നതില്‍ അര്‍ത്ഥമുണ്ടോ? എന്നും ജോബി ചോദിച്ചു. 

മനസാ വാചാ കര്‍മണാ അറിയാത്ത കാര്യങ്ങള്‍ക്ക് തനിക്കെതിരെ ചിലര്‍ കേസ് കൊടുത്തിട്ടുണ്ട്. കൂടെ നിന്ന് പണം വാങ്ങിയവര്‍ വരെ അക്കൂട്ടത്തിലുണ്ട്. അതുകൊണ്ട് ഒരുനിരപരാധിയും ക്രൂശിക്കപ്പെടാന്‍ പാടില്ല. ജോലി കൊടുക്കാമെന്ന് ഫെയിസ്ബുക്കിലൂടെ അറിയിച്ചത് പബഌസിറ്റിക്ക് വേണ്ടിയല്ല. ആത്മാര്‍ത്ഥമായി പറഞ്ഞതാണ്. പ്രിന്റോയുടെ നമ്പര്‍ കിട്ടാന്‍ മാര്‍ഗമില്ലായിരുന്നു. അതിന് വേണ്ടിയാണ് പോസ്റ്റിട്ടത്. പിന്നീട് സുഹൃത്തുക്കള്‍ വഴിയാണ് നമ്പര്‍ കിട്ടിയത്.

'മോനേ, നിനക്ക് കഴിയുമെങ്കില്‍ നിന്റെ നമ്പര്‍ അയച്ച് താ. അല്ലെങ്കില്‍ എന്റെ ഓഫീസിലേക്കോ എന്റെ വീട്ടിലേക്കോ നിനക്ക് വരാം. എന്റെ മരണം വരെ ഞാന്‍ നിനക്ക് ജോലി വാഗ്ദാനം ചെയ്യുന്നു. ഇന്ത്യയിലോ ദുബായിലോ യുകെയിലോ ഓസ്‌ട്രേലിയിലോ ലോകത്തിന്റെ ഏത് കോണില്‍ വേണമെങ്കിലും ഞാന്‍ ജോലി മേടിച്ച് തരും'... എന്നാണ് ജോബി ജോര്‍ജ് പ്രിന്റോയ്ക്ക് നല്‍കിയ വാഗ്ദാനം.