വണ്‍ ബൈ ടു എന്ന സിനിമ പരാജയപ്പെടാന്‍ കാരണം തിരക്കഥയിലെ പ്രശ്‌നങ്ങളാണെന്ന് ഫഹദ് ഫാസില്‍. ദ ഹിന്ദു പത്രത്തിന് നല്‍കിയ അഭിമുഖത്തിലാണ് താരം ഇക്കാര്യം വെളിപ്പെടുത്തിയത്. ചിത്രീകരണം തുടങ്ങും മുമ്പ് തിരക്കഥ പൂര്‍ത്തിയാക്കിയിരുന്നില്ലെന്നും താരം പറഞ്ഞു. പറഞ്ഞ സമയത്ത് ഷൂട്ടിംഗ് തീര്‍ക്കാത്തതിനെ തുടര്‍ന്ന് നിര്‍മാതാവിന് അധിക ബാധ്യത ഉണ്ടായെന്ന് മുമ്പ് മലയാളി വാര്‍ത്ത റിപ്പോര്‍ട്ട് ചെയ്തിരുന്നു. പിന്നീട് സംവിധായകന്‍ അരുണ്‍കുമാര്‍ അരവിന്ദിനെ നിര്‍മാതാക്കളുടെ സംഘടന ഇതിന്റെ പേരില്‍ വിലക്കി.
വ്യത്യസ്തങ്ങളായ കഥാപാത്രങ്ങള്‍ ചെയ്യാനാണ് ശ്രമിക്കുന്നത്. ഒരു വടക്കന്‍ വീരഗാഥയോ, വാനപ്രസ്ഥമോ എനിക്ക് ചെയ്യാന്‍ കഴിയില്ലെന്നും ഫഹദ് പറഞ്ഞു. ഇയ്യോബിന്റെ പുസ്തകം വളരെ വ്യത്യസ്തമായ കഥാപാത്രമാണ്. അതിന് വേണ്ടി ഒരുപാട് കഷ്ടപ്പെട്ടു. ചിത്രത്തിലെ തോക്ക് ഉപയോഗിക്കാന്‍ ദിവസങ്ങളോളം പരിശീലനം നടത്തിയിരുന്നു. അങ്ങനെയാണ് അതിനുള്ള ബോഡി ലാഗ്വേജ് രൂപപ്പെടുത്തിയത്. മലയാള സിനിമ ഇതുവരെ ചിത്രീകരിക്കാത്ത സ്ഥലങ്ങളിലാണ് സിനിമ ഷൂട്ട് ചെയ്തത്. അതൊക്കെ സാഹസമായിരുന്നു.
വിവാഹത്തിന് ശേഷം തനിക്ക് മാറ്റമൊന്നും വന്നിട്ടില്ലെന്നും താരം വ്യക്തമാക്കി. വ്യക്തിപരമായ തീരുമാനങ്ങളില്‍ മാറ്റങ്ങള്‍ വന്നിട്ടുണ്ട്. രണ്ട് പേര്‍ ഒരുമിച്ച് ജീവിക്കുമ്പോള്‍ സ്വാഭാവികമായും അത് സംഭവിക്കുന്നതാണ്. എല്ലാ കാര്യങ്ങളും പോസിറ്റീവായി കാണാനാണ് എനിക്കിഷ്ടം. ജീവിതത്തില്‍ പുതിയ സാധ്യതകള്‍ കണ്ടെത്താനും ഇഷ്ടമാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha