അടുത്തിടെ സമൂഹമാധ്യമങ്ങളില്‍ ഏറെ തരംഗമായി മാറിയ ഒന്നായിരുന്നു 10 ഇയര്‍ ചലഞ്ച്. സെലബ്രിറ്റികളും സാധാരണക്കാരുമടക്കം നിരവധിയേറെ പേരാണ് ഈ ചലഞ്ചില്‍ പങ്കെടുത്തത്. ഒരു പതിറ്റാണ്ടുകൊണ്ട് ആളുകളില്‍ വന്നുചേര്‍ന്ന അമ്പരപ്പിക്കുന്ന മാറ്റങ്ങള്‍ തന്നെയായിരുന്നു #10yearchallenge ന്റെ പ്രധാന കൗതുകം. എന്നാല്‍, വേള്‍ഡ് കാന്‍സര്‍ ദിനത്തില്‍ മംമ്ത മോഹന്‍ദാസ് തന്റെ ഫെയ്‌സ്ബുക്കിലൂടെ പങ്കുവെച്ച 10 ഇയര്‍ ചലഞ്ചിന്റെ ചിത്രം കൗതുകത്തേക്കാള്‍ പ്രതീക്ഷയും പ്രചോദനവുമാണ് സമ്മാനിക്കുന്നത്. കാന്‍സര്‍ എന്ന മഹാമാരിയെ അതിജീവിച്ച പോരാട്ടത്തിന്റെയും പോസിറ്റിവിറ്റിയുടെയും തെളിവായി മാറുകയാണ് ചിത്രം.

എനിക്ക് കാന്‍സര്‍ പിടിപ്പെട്ടു, പക്ഷേ കാന്‍സറിന് എന്നെ പിടികിട്ടിയില്ല,' എന്ന് സരസമായി പറഞ്ഞാണ് മംമ്ത തന്റെ കുറിപ്പാരംഭിക്കുന്നത്. എന്റെ ജീവിതം തന്നെ മാറ്റി മറിച്ച വര്‍ഷമായിരുന്നു 2009, എന്റെ കുടുംബത്തിന്റെ എല്ലാ പ്ലാനുകളെയും അതു ബാധിച്ചു. കഴിഞ്ഞ 10 വര്‍ഷങ്ങള്‍ എന്നെ സംബന്ധിച്ച് വെല്ലുവിളി തന്നെയായിരുന്നു. എന്നാല്‍ ഇന്ന് 2019 ലെത്തി നില്‍ക്കുമ്പോള്‍ വീണുപോകാതെ, കരുത്തോടെ അതിജീവിച്ചെന്ന് അഭിമാനത്തോടെ ഞാന്‍ തിരിച്ചറിയുകയാണ്. പോസിറ്റീവ് മനോഭാവത്തോടെയും കരുത്തോടെയും വര്‍ഷങ്ങള്‍ മുന്നോട്ടു നടക്കുക എന്നത് ഏറെ കഠിനമായിരുന്നു. ഞാനത് ചെയ്തിട്ടുണ്ടെങ്കില്‍ അതിനു പിറകില്‍ ചിലരുണ്ട്. എല്ലാ നന്ദിയും അച്ഛനും അമ്മയ്ക്കുമാണ് (നന്ദി എന്ന വാക്കില്‍ എനിക്കുള്ള കടപ്പാട് ഒതുക്കാനാവില്ല). ഒപ്പം തന്നെ, സഹോദരസ്‌നേഹം എന്തെന്ന് എനിക്ക് കാണിച്ചു തന്ന എന്റെ കസിന്‍സ്, എല്ലായ്പ്പോഴും വിളിച്ചും മെസേജ് അയച്ചും ഞാന്‍ ശരിക്കും ഓകെ ആണോ, അതോ ഓകെ ആയി ഭാവിക്കുന്നതാണോ എന്ന് പരിശോധിച്ചു കൊണ്ടിരുന്ന, കെയര്‍ ചെയ്ത പ്രിയപ്പെട്ട കൂട്ടുകാര്‍, എന്നെ തേടിയെത്തിയ നല്ല സിനിമകള്‍, നന്നായി പെര്‍ഫോം ചെയ്യാന്‍ എന്നെ എപ്പോഴും ചലഞ്ച് ചെയ്തുകൊണ്ടിരുന്ന എന്റെ സഹപ്രവര്‍ത്തകര്‍, എന്താണ് ശരി, എന്താണ് തെറ്റ് എന്നി മനസ്സിലാക്കി എനിക്കേറേ അവസരങ്ങളേകിയ പ്രപഞ്ചശക്തി, തന്റെ അതിജീവനയാത്രയില്‍ കൈത്താങ്ങായവരെയെല്ലാം ഓര്‍ക്കുകയാണ് മംമ്ത.

കുറിപ്പിനൊപ്പം കാന്‍സര്‍ ചികിത്സാകാലത്തെ തല ഷേവ് ചെയ്ത ചിത്രവും മംമ്ത പങ്കുവെച്ചിട്ടുണ്ട്. ലോക കാന്‍സര്‍ദിനം, സര്‍വൈവര്‍, നെവര്‍ ഗിവ് അപ്പ്, ഹാപ്പിനെസ്സ്, ചലഞ്ച് തുടങ്ങിയ ഹാഷ് ടാഗുകളോടെയാണ് ചിത്രം പങ്കുവെച്ചിരിക്കുന്നത്.

കാന്‍സര്‍ ചികിത്സയ്ക്കിടയിലും അഭിനയത്തില്‍ സജീവമായിരുന്നു മംമ്ത. രണ്ടു തവണയാണ് കാന്‍സര്‍ മംമ്തയെ കീഴ്പ്പെടുത്തിയത്. അസുഖം ഉണ്ടാക്കുന്ന ബുദ്ധിമുട്ടുകള്‍ക്കിടയിലും സിനിമയില്‍ നിന്നും ബ്രേക്കുകള്‍ എടുക്കാതെ അഭിനയത്തിനൊപ്പം തന്നെ ചികിത്സയും മുന്നോട്ടു കൊണ്ടുപോകാന്‍ മംമ്തയ്ക്കു സാധിച്ചിരുന്നു.

പൃഥിരാജ് നായകനാവുന്ന '9' ആണ് മംമ്തയുടേതായി ഇനി തിയേറ്ററുകളിലെത്താനുള്ള ഏറ്റവും പുതിയ ചിത്രം. പൃഥ്വിരാജിന്റെ നിര്‍മ്മാണകമ്പനിയായ പൃഥിരാജ് പ്രൊഡക്ഷന്‍സും സോണി പിക്ച്ചര്‍ റിലീസിങ് ഇന്റര്‍നാഷണലും ചേര്‍ന്നാണ് 9 നിര്‍മ്മിക്കുന്നത്. ഒരു അച്ഛന്റെയും മകന്റെയും വൈകാരികമായ കഥ പറയുന്ന ചിത്രം സംവിധാനം ചെയ്യുന്നത് ജെനൂസ് മൊഹമ്മദാണ്.