റിലീസിനു മുന്‍പേ രാജ്യമാകെ ശ്രദ്ധയമായ ചിത്രമാണ് ഒരു അഡാര്‍ ലവ്. പാട്ടിലെ ഒരു ചെറിയ സീന്‍ കൊണ്ട് ശ്രദ്ധിക്കപ്പെട്ട ചിത്രം. എന്നാല്‍ പിന്നീട് നിരവധി വിവാദങ്ങളും വന്നു. ഏറെ നാളത്തെ കാത്തിരിപ്പിനൊടുവില്‍ ചിത്രം തീയറ്ററുകളിലെത്തിയപ്പോഴും വിവാദങ്ങള്‍ അവസാനിക്കുന്നില്ല. ഇത്തവണ ക്ലൈമാക്‌സിനെച്ചൊല്ലിയാണ് പുതിയ വിവാദം. മാറ്റം വരുത്തിയ പുതിയ ക്ലൈമാക്‌സുമായി ചിത്രം ഇന്ന് തിയറ്ററുകളിലെത്തുമെന്നു സംവിധായകന്‍ ഒമര്‍ ലുലു ഫേസ്ബുക്ക് പേജില്‍ അറിയിച്ചു. ഇന്ന് മുതല്‍ പുതിയ ക്ലൈമാക്‌സും പല മാറ്റങ്ങളുമായി ''ഒരു അഡാറ് ലവ് ' നിങ്ങള്‍ക്ക് മുന്നില്‍ എത്തുകയാണ്. മുന്നേ തന്നെ പടം കണ്ടവര്‍ ,സിനിമ കണ്ട ടിക്കറ്റുമായി ,അഡാറ് ലവ് ഇപ്പോള്‍ കളിക്കുന്ന ,നിങ്ങള്‍ ചിത്രം കണ്ട തിയറ്ററില്‍ ബന്ധപ്പെട്ടാല്‍ പടം രണ്ടാം തവണ സൗജന്യമായി കാണാവുന്നതാണ് (Offer valid only for today ). ഇതായിരുന്നു സംവിധായകന്റെ ഫേസ്ബുക്ക് കുറിച്ച്. 

ചിത്രത്തെ ഡീഗ്രേഡ് ചെയ്യുന്നത് ചിലര്‍ ബോധപൂര്‍വം ശ്രമിക്കുന്നുണ്ടെന്നു സംവിധായകന്‍ നേരത്തെ പറഞ്ഞിരുന്നു. ''ആരാണ് ഇതിനു പിന്നിലെന്ന് അറിയില്ല. ചിത്രം ഇഷ്ടപ്പെട്ട ഒരുപാട് ആളുകളുണ്ട്. സിനിമ ഇറങ്ങുന്നതിനു മുന്‍പേ ഡീഗ്രേഡിങ്ങ് ക്യാംപെയിന്‍ നടക്കുന്നുണ്ട്. ഷോ കഴിയുന്നതിനു മുന്‍പേ നെഗറ്റീവ് റിവ്യൂകള്‍ വന്നുകഴിഞ്ഞിരുന്നു. ഒരുപാട് ആളുകള്‍ ചിത്രത്തെ ടാര്‍ഗറ്റ് ചെയ്തിരുന്നു. ഫെയ്‌സ്ബുക്കില്‍ ആദ്യം ചിത്രത്തെ കുറേ പ്രൊമോട്ട് ചെയ്തു. പിന്നെ ഡീഗ്രേഡ് ചെയ്തു. ചിലര്‍ പറയുന്നു പ്രിയാ വാര്യരോടുള്ള ദേഷ്യമാണെന്ന്, മറ്റു ചിലര്‍ പറയുന്നു, എന്നോടുള്ള ദേഷ്യമാണെന്ന്. എന്താണ് കാരണമെന്ന് എനിക്കറിയില്ല. ''. 

ഇപ്പോഴത്തെ ക്ലൈമാസ് മാറ്റുന്നത് സോഷ്യല്‍ സമ്മര്‍ദം കൊണ്ടു മാത്രമല്ല. ചിത്രത്തിന്റെ നിര്‍മാതാവും ഇതേ കാര്യം നിര്‍ദേശിച്ചിരുന്നു. ഇത് കുടുംബപ്രേക്ഷകരെ കൂടി ഉദ്ദേശിച്ചുള്ള സിനിമയാണ്. അതേസമയം ചങ്ക്‌സ് ഒക്കെ യൂത്തിനെ മാത്രം ടാര്‍ഗറ്റ് ചെയ്ത് നിര്‍മിച്ചതായിരുന്നു. ചില പ്രേക്ഷകര്‍ക്ക് ഇപ്പോഴുള്ള ക്ലൈമാക്‌സ് ഇഷ്ടപ്പെട്ടില്ല. അതേസമയം നിലവിലെ ക്ലൈമാസ് ഇഷ്ടപ്പെട്ടവരുമുണ്ട്. അത്രയും നേരം തമാശയിലൂടെ കഥ പറഞ്ഞ് പെട്ടെന്ന് ഡാര്‍ക്ക് എന്‍ഡിങ്ങ് ആയപ്പോള്‍, കുടുംബപ്രേക്ഷകര്‍ക്ക്, പ്രത്യേകിച്ച് കുട്ടികള്‍ക്കൊക്കെ ഭയങ്കര സങ്കടമാണ്. 

നൂറിന്‍ തന്നെയാണ് ഇപ്പോഴും നായികയെന്നും ഒമര്‍ ലുലു പറയുന്നു: ''പാട്ട് ഹിറ്റായപ്പോള്‍ പ്രിയക്കു വേണ്ടി കുറച്ചു സീനുകള്‍ എഴുതിച്ചേര്‍ത്തിരുന്നു എന്നത് സത്യമാണ്. സിനിമ കാണുമ്പോള്‍ അറിയാം നൂറിനാണ് ഇതിലെ നായികയെന്ന്''. ട്രോളുകള്‍ ആസ്വദിക്കുന്നു. അപ്പോഴും ഇപ്പോഴും. സിനിമ ഇറങ്ങുന്നതിനു മുന്‍പ് ഒരുപാട് ട്രോളുകള്‍ വന്നിരുന്നു, ഇറങ്ങിയതിനു ശേഷവും. ഇപ്പോള്‍ കരിങ്കോഴി ട്രോളുകളൊക്കെ കാണുന്നതല്ലേ? ട്രോളുകളെ കാര്യമായി എടുക്കുന്നില്ല. ഇപ്പോഴാണ് കൂടുതല്‍ ആളുകള്‍ ചിത്രം കണ്ടുതുടങ്ങിയത്. ക്ലൈമാസ് മാറ്റിയെത്തുമ്പോള്‍ ഇനിയും ഒട്ടേറെ ആളുകള്‍ക്ക് ചിത്രം ഇഷ്ടമാകുമെന്നാണ് പ്രതീക്ഷിക്കുന്നതെന്നും ഒമര്‍ ലുലു പറഞ്ഞു.