പുല്‍വാമയില്‍ 40 ജവാന്മാരുടെ ജീവനെടുത്ത ഭീകരാക്രമണത്തിന് പിന്നാലെ രാജ്യത്തെമ്ബാടും എന്നത് പോലെ ബോളിവുഡിലും പാകിസ്താന് എതിരെ രോഷം കത്തിയിരുന്നു. പാകിസ്താനില്‍ നിന്നുളള സിനിമാ താരങ്ങള്‍ക്ക് ഇന്ത്യയില്‍ വിലക്ക് ഏര്‍പ്പെടുത്തുകയുമുണ്ടായി.ഇന്ത്യ തിരിച്ചടിച്ചതിന് പിന്നാലെ അതിര്‍ത്തിയില്‍ സംഘര്‍ഷം തുടരുന്നതോടെ സമാധാനം വേണമെന്ന ആവശ്യം സിനിമാ രംഗത്ത് നിന്നും ഉയരുന്നുണ്ട്.

ഇന്ത്യയിലേയും പാകിസ്താനിലേയും പല താരങ്ങളും സമാധാനം പുനസ്ഥാപിക്കണം എന്ന് ആവശ്യപ്പെടുന്നു. പാകിസ്താന്റെ പിടിയിലായ ഇന്ത്യന്‍ പൈലറ്റ് അഭിനന്ദന്‍ വര്‍ധമാനെ സുരക്ഷിതമായി തിരിച്ച്‌ അയക്കണം എന്ന ആവശ്യവും ശക്തമാണ്. പാക് ജനത പോലും അഭിനന്ദിനെ തിരിച്ചയക്കണം എന്നാവശ്യപ്പെടുമ്ബോഴാണ് ഇന്ത്യന്‍ വൈമാനികനെ അധിക്ഷേപിച്ച്‌ പാക് നടിയായ വീണ മാലികിന്റെ രംഗത്തെത്തിയത്.

അഭിനന്ദന്‍ പാകിസ്താന്റെ കസ്റ്റഡിയിലായതിന് തൊട്ട് പിന്നാലെ വീണ മാലിക് ട്വീറ്റ് ചെയ്തത് ഇങ്ങനെയാണ്. അഭി ഇപ്പോള്‍ എത്തിയതല്ലേ ഉളളൂ. നിങ്ങളെ നല്ല സ്വീകരണം തന്നെയാണ് കാത്തിരിക്കുന്നത് എന്നാണ് ആദ്യത്തെ ട്വീറ്റില്‍ വീണ മാലിക് എഴുതിയിരിക്കുന്നത്.

ചോരയൊലിപ്പിച്ച മുഖവുമായി പാക് സൈന്യം അഭിനന്ദിനെ കൊണ്ടുപോകുന്ന ചിത്രവും നടി പങ്കുവെച്ചിരിക്കുന്നു. മറ്റൊരു ട്വീറ്റ് ബോളിവുഡിനെ ലക്ഷ്യമിട്ടുളളതാണ്. ഹലോ ബോളിവുഡിലെ സുഹൃത്തുക്കളേ.. ഞങ്ങളോട് കളിക്കരുത് എന്നാണ് വീണ മാലികിന്റെ മറ്റൊരു പോസ്റ്റ്. അഭിനന്ദിന്റെ മറ്റൊരു ചിത്രം പങ്കുവെച്ച്‌ മീശയെ പരിഹസിക്കുകയും ചെയ്യുന്നുണ്ട് പാക് നടി.

അതേ സമയം വീണ മാലികിന്റെ ഈ പെരുമാറ്റത്തെ രൂക്ഷമായി വിമർശിച്ച് ബോളിവുഡ് നടി സ്വര ഭാസ്‌കര്‍ രംഗത്തെത്തി. സ്വരയുടെ ട്വീറ്റ് ഇങ്ങനെ: വീണാജീ.. നിങ്ങളെക്കുറിച്ചും നിങ്ങളുടെ വികലമായ മനസ്സിനെ കുറിച്ചും ഓര്‍ത്ത് ലജ്ജിക്കുന്നു. നിങ്ങളുടെ ഈ ആഹ്ലാദം അറപ്പുളവാക്കുന്നതാണ്. പിടിയിലായിട്ടും മാന്യതയും അന്തസ്സും പുലര്‍ത്തുന്ന ഞങ്ങളുടെ ഓഫീസര്‍ ഒരു ഹീറോ ആണ്. വിംഗ് കമാന്‍ഡര്‍ അഭിനന്ദനെ ചോദ്യം ചെയ്യുന്ന നിങ്ങളുടെ ആര്‍മിയിലെ തന്നെ മേജറുടെ മാന്യതയോ അല്ലെങ്കില്‍ സമാധാനം ആവശ്യപ്പെടുന്ന പാക് ജനതയുടെ മാന്യതയോ എങ്കിലും കാണിക്കൂ എന്നാണ് സ്വര ഭാസ്‌കര്‍ ആവശ്യപ്പെടുന്നത്.