ബിഗ് ബോസ് മലയാളം സീസണ്‍ ഒന്ന് വേദിയില്‍ ആരംഭിച്ച പ്രണയത്തിന് ഇന്ന് സാക്ഷാത്കാരം. പേളി മാണിയും ശ്രീനിഷ് അരവിന്ദും നെടുമ്പാശ്ശേരി സിയാല്‍ കണ്‍വെന്‍ഷന്‍ സെന്ററില്‍ വച്ച് ഇന്നലെ വിവാഹിതരായി. ഇന്നലെ ചൊവ്വര സെന്‍റ്.മേരീസ് പള്ളിയില്‍ വെച്ചായിരുന്നു ചടങ്ങ്. ഇതരമതസ്ഥരായ ഇവരുടെ വിവാഹം പള്ളിയില്‍ വെച്ച്‌ നടത്താന്‍ എങ്ങനെ അനുമതി ലഭിച്ചു എന്ന തരത്തിലുള്ള രീതിയിലുള്ള ചര്‍ച്ചകളും സജീവമായിരുന്നു. ഈ വിഷയത്തില്‍ സമ്ബന്നര്‍ക്കും ദരിദ്രര്‍ക്കും രണ്ട് നിയമമാണോ എന്ന രീതിയില്‍ വരെ ചര്‍ച്ചകളെത്തി. നിരവധി ട്രോളുകളും ഇറങ്ങുകയുണ്ടായി. ചൊവ്വര പള്ളിയിലെ വൈദികനെതിരേയും ഈ വിഷയത്തില്‍ ആരോപണമുയരുകയുണ്ടായി. ഇത് സംബന്ധിച്ച്‌ ചൊവ്വരപള്ളിയിലെ വൈദികനായ ഫാ.ജെയിംസ് ആലുക്കല്‍ വിശദീകരണം നല്‍കിയിരുന്നു. ''ഇതരമതത്തിലുള്ള ഒരു യുവാവിനേയോ യുവതിയേയോ വിവാഹം ചെയ്യുന്നതിന് കത്തോലിക്കാ വിശ്വാസിയായ ഒരു സ്ത്രീക്ക് അനുവാദമുണ്ട്. അതിനായി ഇതരമതസ്ഥനായ യുവാവിനേയോ യുവതിയേയോ മതംമാറ്റി നമ്മുടെ ആളാക്കണം എന്നായിരുന്നു മുമ്ബ് നിയമമുണ്ടായിരുന്നത്. എന്നാല്‍ ഇപ്പോള്‍ അങ്ങനെയല്ല. ഇത്തരത്തില്‍ ഒരു വിവാഹം നടത്തുന്നതിന് അരമനയില്‍ ആദ്യം അപേക്ഷ സമര്‍പ്പിക്കണം. അപേക്ഷയില്‍ തങ്ങള്‍ക്കുണ്ടാകുന്ന കുഞ്ഞിനെ ക്രൈസ്തവ വിശ്വാസിയായി വളര്‍ത്തുന്നതിന് സമ്മതമറിയിച്ചിരിക്കണം. അങ്ങനെയെങ്കില്‍ വിവാഹം നടത്തുന്നതിന് അനുമതി ലഭിക്കും.' - ഫാദര്‍ പറയുന്നു.

റിസപ്ഷന്‍ ഈ മാസം എട്ടിന് പാലക്കാട്ട്. മലയാളം റിയാലിറ്റി ഷോ ആയ ബിഗ് ബോസിന്റെ സെറ്റില്‍ വച്ചാണ് പേളിയും ശ്രീനിഷും പ്രണയത്തിലാകുന്നത്. ബിഗ് ബോസ് സെറ്റില്‍ വച്ച് പരസ്പരം പ്രണയം തുറന്നു പറഞ്ഞ ഇവര്‍ എന്നു വിവാഹിതരാകുമെന്ന് കാത്തിരിക്കുകയായിരുന്നു ആരാധകര്‍.റിയാലിറ്റി ഷോ സെറ്റിലും അതിനു ശേഷവും ഏറെ ആഘോഷിക്കപ്പെട്ട പ്രണയമായിരുന്നു ഇരുവരുടെയും. പ്രണയം സത്യമാണോ എന്നും സംശയങ്ങളും ഗോസിപ്പുകളും പ്രചരിച്ചിരുന്നു. അവരെയൊക്കെ ഞെട്ടിച്ച് കൊണ്ടാണ് താരങ്ങൾ വിവാഹിതരായത്. കഴിഞ്ഞ ജനുവരിയിലായിരുന്നു പേളിയുടെയും ശ്രീനിഷിന്റെയും വിവാഹനിശ്ചയം. കൊച്ചിയില്‍ നടന്ന ചടങ്ങില്‍ അടുത്ത ബന്ധുക്കള്‍ മാത്രമാണ് പങ്കെടുത്തത്. തുടര്‍ന്ന വിവാഹത്തിന്റെ ക്ഷണക്കത്തും ഇരുവരും പുറത്തു വിട്ടിരുന്നു.