സിനിമാരംഗത്ത് താന്‍ നേരിട്ട ഒരു മോശം അനുഭവത്തെക്കുറിച്ച് തുറന്നു പറയുകയാണ് ഉത്തരേന്ത്യന്‍ നടിയായ സുര്‍വീണ്‍ ചൗള.ഹിന്ദി, പഞ്ചാബി, കന്നഡ, തെലുങ്ക് ഭാഷകളിലുള്ള ചലച്ചിത്രങ്ങളില്‍ അഭിനയിച്ചിട്ടുള്ള സുര്‍വീണ്‍ തനിക്ക് മൂന്ന് തവണ തെന്നിന്ത്യയില്‍ നിന്നും രണ്ടുതവണ ബോളിവുഡില്‍ നിന്നും കാസ്റ്റിംഗ് കൗച്ച് അനുഭവങ്ങള്‍ ഉണ്ടായിട്ടുണ്ട് എന്ന് തുറന്നു പറഞ്ഞിരിക്കുകയാണ്.

ദേശീയ അവാര്‍ഡ് നേടിയ ഒരു യുവസംവിധായകന്‍ തന്നെ ഔദ്യോഗികമായ ആവശ്യത്തിനല്ലാതെ മുംബയിലേക്ക് വിളിച്ചുവെന്നും തന്നോട് അപമര്യാദയായി പെരുമാറിയെന്നും സുര്‍വീണ്‍ പറയുന്നു. പിന്നീട് അയാളുടെ സിനിമയില്‍ നിന്നും താന്‍ പിന്മാറുകയായിരുന്നു എന്നും സുര്‍വീണ്‍ ചൗള വെളിപ്പെടുത്തി. മറ്റൊരു തെന്നിന്ത്യന്‍ സംവിധായകന് തന്റെ ഉടലിന്റെ അളവുകളായിരുന്നു അറിയേണ്ടിയിരുന്നത്. എന്നാല്‍ തന്റെ നിലപാട് വ്യക്തമാക്കിയ ശേഷം അയാളുടെ ചിത്രത്തില്‍ അഭിനയിച്ചില്ല. സുര്‍വീണ്‍ ചൗള പറയുന്നു. ബോളിവുഡിലെ സ്ഥിതിയും വ്യത്യസ്തമായിരുന്നില്ല. കഴിഞ്ഞ ഒരു വര്‍ഷത്തിനിടെ രണ്ടുതവണ ബോളിവുഡില്‍ കാസ്റ്റിംഗ് കൗച്ചിനെ നേരിടേണ്ടതായി വന്നതായും സുര്‍വീണ്‍ ചൗള പറയുന്നു. ഇതുകൂടാതെ കടുത്ത ബോഡി ഷെയ്മിങ്ങും താന്‍ നേരിട്ടിട്ടുള്ളതായി നടി പറഞ്ഞു. ആ സമയത്ത് 56 കിലോ മാത്രം ഭാരമുണ്ടായിരുന്നു തന്നോട് തടി കൂടുതലാണെന്നും അത് കുറയ്ക്കണമെന്നും ഒരു സംവിധായകന്‍ ആവശ്യപ്പെട്ടതായി സുര്‍വീണ്‍ ചൗള പറഞ്ഞു. ടെലിവിഷന്‍ ഷോകളിലും നിരന്തര സാന്നിദ്ധ്യമായ സുര്‍വീണ്‍ ഇന്ന് ഒരു പെണ്‍കുഞ്ഞിന്റെ അമ്മയാണ്.