ഇന്ത്യയും ന്യൂസിലാൻഡും തമ്മിലുള്ള അഞ്ച് മത്സരപരമ്പരയിലെ രണ്ടാമത്തെ ട്വന്റി-20 ഇന്ന് ക്രൈസ്റ്റ്ചർച്ചിൽ നടക്കും. ഇവിടെ നടന്ന ആദ്യ മത്സരത്തിൽ ഇന്ത്യ നാലുവിക്കറ്റിന് ജയിച്ചിരുന്നു.

ഇന്ത്യൻ സമയം ഉച്ചയ്ക്ക് 12.30 മുതലാണ് മത്സരം നടക്കുക. ഇന്ത്യൻ ഇടംകയ്യൻ ബാറ്റർ ഇഷാൻ കിഷന് കഴിഞ്ഞ മത്സരത്തിനിടെ പരിക്കേറ്റതിനാൽ ഇന്ന് കളിക്കാനാവില്ലെന്നാണ് റിപ്പോർട്ടുകളുള്ളത്. തുടയിലെ പേശിക്കാണ് പരിക്ക്. ഇതുകാരണമാണ് ഇഷാൻ കഴിഞ്ഞ മത്സരത്തിൽ സ്ഥിരം പൊസിഷനായ ഫസ്റ്റ് ഡൗണായി ഇറങ്ങാതിരുന്നത്, പിന്നീട് അഞ്ചാമനായി ക്രീസിലെത്തിയെങ്കിലും ഒരു റൺസെടുത്ത് മടങ്ങേണ്ടതായി വന്നു.

ഇഷാൻ കിഷന് പകരം ഇന്ന് കൗമാരതാരം വൈഭവ് സൂര്യവംശിയെ കളിപ്പിക്കുമെന്നാണ് സൂചനകളുളളത്. അഫ്ഗാനുമായുള്ള പരമ്പര മുതൽ ടീമിലുള്ള വൈഭവിന് ഏഷ്യൻ ഗെയിംസിൽ രണ്ട് മത്സരങ്ങളിൽ മാത്രമാണ് കളിക്കാനായത്. ശേഷം വിൻഡീസുമായുള്ള അഞ്ച് മത്സരങ്ങളിലും ബെഞ്ചിലിരുന്നു.

വൈഭവിനെ കളിപ്പിക്കുകയാണെങ്കിൽ ടീമിന്റെ ബാറ്റിംഗ് പൊസിഷനിൽ മാറ്റം വരുത്തേണ്ടി വരും. വൈഭവ് ട്വന്റി-20 ഫോർമാറ്റിൽ ഓപ്പണറായി മാത്രമാണ് കളിച്ചിട്ടുള്ളത്.

അഭിഷേകും സഞ്ജുവും ചേർന്ന ഓപ്പണിംഗ് ജോഡിയെ മാറ്റി വൈഭവിന് അവസരം നൽകുകയാണെങ്കിൽ സഞ്ജു ഫസ്റ്റ് ഡൗൺ പൊസിഷനിലേക്ക് മാറേണ്ടിവരും. ഓപ്പണറായിറങ്ങിയ കഴിഞ്ഞ അഞ്ച് ട്വന്റി-20കളിൽ മൂന്നിലും സഞ്ജു അർദ്ധസെഞ്ച്വറികൾ നേടിയിട്ടുണ്ടായിരുന്നു.