സുശാന്തിന്റെയും ദിഷയുടെയും മരണങ്ങള് തമ്മില് ബന്ധമുണ്ടോയെന്ന് അന്വേഷിച്ച് സിബിഐ
നടന് സുശാന്ത് സിങിന്റെയും മുന് മാനേജര് ദിഷ സാലിയാന്റെയും മരണങ്ങള് തമ്മില് ബന്ധമുണ്ടോയെന്ന് അന്വേഷിച്ച് സിബിഐ. ഇത് സൂചിപ്പിക്കുന്ന നിര്ണായക തെളിവുകള് സിബിഐ സംഘത്തിന് ലഭിച്ചുവെന്നാണ് റിപ്പോര്ട്ടുകള്. പ്രാഥമിക അന്വേഷണത്തിനു ശേഷം കഴിഞ്ഞയാഴ്ച ഡല്ഹിയിലേക്കു മടങ്ങിയ സിബിഐ സംഘം ഉടന് മുംബൈയില് തിരികെ എത്തുമെന്നും റിപ്പോര്ട്ടുകള് ഉണ്ട്.
സുശാന്തിന്റെ മരണകാരണം കണ്ടെത്താന് നിയോഗിച്ച എയിംസിലെ ഫൊറന്സിക് വിഭാഗം ഉടന് തങ്ങളുടെ പരിശോധനാ റിപ്പോര്ട്ട് സിബിഐയ്ക്കു കൈമാറും. ഇന്നലെ റിപ്പോര്ട്ട് നല്കുമെന്നാണ് നേരത്തെ അറിയിച്ചിരുന്നത്. പോസ്റ്റ്മോര്ട്ടം, ആന്തരിക അവയവ പരിശോധന എന്നിവയുടെ റിപ്പോര്ട്ടുകള് പുനഃപരിശോധിച്ചാണ് റിപ്പോര്ട്ട് തയാറാക്കുന്നത്.
ഇതിന് പുറമേ സുശാന്തിന്റെ മരണവുമായി ബന്ധപ്പെട്ട് ഉയര്ന്ന ലഹരിമരുന്ന് കേസില് താരത്തിന്റെ മുന് മാനേജര്മാരായ ശ്രുതി മോദി, ജയ സഹ എന്നിവരെയും എന്സിബി ചോദ്യം ചെയ്യും. ലഹരി ഇടപാടുമായി ബന്ധപ്പെട്ട സന്ദേശങ്ങളില് ഇരുവരുടെയും പേരുവിവരങ്ങള് ഉണ്ടെന്നാണ് എന്സിബി വ്യക്തമാക്കുന്നത്. റിയ ചക്രവര്ത്തിയുടെ വാട്ട്സാപ്പ് സന്ദേശങ്ങളില് പല ഉന്നതരുടെയും പേര് വിവരങ്ങള് ഉള്ളതായും റിപ്പോര്ട്ടുകളുണ്ട്. ദിഷയുടെയും സുശാന്തിന്റെയും മരണം തമ്മില് ബന്ധമുണ്ടെന്ന് കണ്ടെത്തിയാല് അന്വേഷണം നിര്ണായക ഘട്ടത്തിലേക്കാവും നീങ്ങുക.
https://www.facebook.com/Malayalivartha